Read Makassar Version – KITTA' MATANGKASA YESAYA 63 Bible Online

YESAYA 63 - Makassar Version – KITTA' MATANGKASA bible

YESAYA 63

¹ “Inaika anjo niaka battu ri Bozra ri Edom? ejai bajunna, pakeanna accayai; teai sipato' gammara'na batena a'jappa.” “INakkemi Batara akkullea appasalama' siagang battua angngerang kabara' pammetang.”

²“Angngapa naeja kammanjo pakeanta, sangkamma bajunna papacco' rappo anggoroka?”

³ “Kale-kalengKu antama' ri pammaccokang anggoroka tena battu ri ummakKu antulungA'. Kuonjo'-onjokangi bansa-bansaya lalang larroKu, rapang tau angngonjo'-onjokanga rappo anggoro'. Tappaccoki cera'na ke'nanga na nabasai bajungKu, nara'massi sikontu pakeangKu.

⁴Le'ba'mi Kurancanakang allo pa'balassanga, siagang wattu kalappassanga mae ri ummakKu.

⁵ A'boyA' tau, mingka tena akkulle antulungA', lannasakKa' lanri tenana akkulle ambantuA'. Nampa kagassingang KalengKu antulungA', kalarroangKu ambantuA'.

⁶Lalang kalarroangKu a'rinra-rinraya, Kuonjo'-onjokangi bansa-bansaya; Kuancuruki ke'nanga, naKutumpa cera'na ke'nanga naung ri buttaya.”

⁷Eroki kukabarrang pangngamaseanNa Batara lanri sikontu gau'Na kumammuji ri Ia. Allumpa-lumpai bateNa ambarakkaki umma'Na, lanri nia'na pangngamaseanNa na tena la'busu'na anjo pangngamaseanNa.

⁸Nakana Batara, “Tojeng, anjo ke'nanga ummakKu, ana'-ana' tenaya nappakala'ba pa'mai'.” Na Ia a'jari Mappasalama'na ke'nanga,

⁹Ia KalenNa nituju ri kasusaanna ke'nanga. Tena Nakkiring Batara tunisuro yareka tunisare koasa; Ia KalenNa allappassangi ke'nanga lanri pangngamaseanNa siagang pangngarimanginNa. Tuli Naparakai ke'nanga battu riolo.

¹⁰Mingka angngewai ke'nanga siagang napakasi'na pa'mai'Na Batara. Jari ta'bale'mi a'jari musunNa ke'nanga KalenNa a'bundu' ambaliangi ke'nanga.

¹¹Nampa angngu'rangimo ke'nanga ri rewasa' allaloa, ri jammanna Musa, atanNa Batara. Akkuta'nangi ke'nanga angkana, “Kemae Batara, anrurungangai sikamma pamimpinna umma'Na allalo ri tamparanga? Kemae Batara ampassareangai koasaNa mae ri ke'nanga?

¹² Kemae Batara le'baka anrurungangi Musa siagang limanNa makassaka, ambage ruayai je'neka ri dallekanna ke'nanga sollanna masahoro' arenNa satunggu-tungguna?

¹³Kemae Batara anrenrengai ke'nanga a'jappa ilalang ri je'ne' lantanga? Rapang jarang allalo ri parang lompoa, tena le'bakai tatto'ro ke'nanga.”

¹⁴Naerangi Batara ke'nanga mae ri tampa' pammantangnganga, rapang olo'-olo' piara niemba mange ri paranga untu' a'ruku'. Kammaminjo bateNa anrurungangi umma'Na, sollanna nipakala'biri' arenNa.

¹⁵O Batara, Kiparhatikangi battu ri suruga, battu ri pammantangang matangkasatTa siagang mala'birika. Kemae pangngamaseanTa siagang kabaranianTa? Kemae kalammoranTa siagang pangngarimanginTa? Tea' laloKi' tahangngi anjo untu' ikambe.

¹⁶Sai iKatte manggena ikambe? Abraham siagang Yakub tanaassengai ikambe. Mingka iKatte o Batara, iKatte Manggena ikambe, Mappasalama'na ikambe battu riolo dudu.

¹⁷O Batara, angngapa Kibalang parekangi ikambe lingu? Angngapa Kipa'jari terasaki nyawana ikambe sa'genna tamallakka ikambe mae ri Katte? Ammotere' lalo maKi' lanri ata-atanTa, lanri ummatTa, pisakaTa.

¹⁸Angngapa Kilappassangi musua angngonjo'-onjokangi BallatTa, siagang nara'massi taua bulu' matangkasatTa?

¹⁹IKatte ampa'jari ikambe rapang tena le'bakaKi' makoasa mae ri kambe; rapang tena le'bakai ikambe a'jari ummatTa.