Read Makassar Version – KITTA' MATANGKASA YESAYA 65 Bible Online

YESAYA 65 - Makassar Version – KITTA' MATANGKASA bible

YESAYA 65

¹ Nakana Batara, “SadiaMa' ero' appiali ri ummakKu, mingka tena nappala' doang ke'nanga mae ri Nakke. SadiaMa' nibattui ri ke'nanga, mingka taerokai ke'nanga amboyA'. Anjo bansaya tena nakkio' ri Nakke, manna pole sadiaMa' lappiali: Anne nia'jA'!

² Tuli sadiaKu ero' antarimai ummakKu, mingka nangai ke'nanga angngewa. Anjo bansaya nagaukangi ja'dalaka siagang ero' kalenna naturukiang.

³Tulusu' napakanassuKu ke'nanga lanri assarena koro'bang ri koko-kokoa mae ri rewata-rewataya siagang attunui kamanynyang ri tampa'-tampa' pakkoro'bangnganna ke'nanga.

⁴Punna bangngi a'lampai ke'nanga mange ri kali'bong-kali'bong batua siagang sikamma kuburuka untu' appala' tangara' mae roh-rohna alusuka. Angnganrei ke'nanga dageng bawi siagang angnginungi je'ne' dageng haranga.

⁵Nakana ke'nanga, ‘Bellako, teako seroi ikambe, saba' ikambe anne tangkasakki' siagang tassa'lakki' battu ri kau ngaseng!’ Tena Kuparrangngi anciniki panggaukanna ke'nanga! A'rinrai larroKu mae ri ke'nanga rapang pepe' tenaya nakkulle mate.

⁶Hukkunganna ke'nanga le'ba'mi tattulisi' ri dallekangKu. Tojeng, tena Kulammantang a'mereki. LaKubalasaki kaja'dallanna ke'nanga

⁷lanri dosana ke'nanga siagang dosana boe-boena ke'nanga. NahinA' ke'nanga lanri attunui kamanynyang untu' rewata-rewataya ri tampa' panynyombanna ke'nanga irate ri bulu'. LaKubalasaki situru' siagang panggaukanna ke'nanga ri wattu allaloa.”

⁸Nakana Batara, “Rappo anggoro' niaka ija je'ne'na tena nanipelaki, mingka nipa'jari je'ne' anggoro'. Kamma tomminjo bansaKu, tena nalanipanraki ngaseng, saba' nia' ija ri ke'nanga anynyomba mae ri Nakke.

⁹Nia' siapa are jaina tau battu ri suku Yehuda laKubarakkaki, siagang turunganna ke'nanga lanapatangi butta pa'moncongangKu. Sikamma tu nipileKu, ia anynyombaya mae ri Nakke lammantangi anjoreng.

¹⁰ UmmakKu lanynyombai ri Nakke; gimbala'na siagang sapina ke'nanga la'rukuki ri Lappara'na Saron siagang Ka'bung Akhor.

¹¹Mingka tena nakamma anjo sarenna tau ambokoiA', tenaya najampangi Sion, bulu' matangkasakKu, assarea passare mae ri Gad siagang Meni, iamintu rewata-rewata kaupakkanga siagang sarea.

¹²Lamate ngasengko passabakkang gau' katerassang. Saba' ri wattungKu akkio', tena nuppiali, siagang ri wattungKu a'bicara, tena nuppilangngeri. La'bi nungaiangngangi angngewaya ri Nakke siagang anggaukangi ja'dalaka.

¹³Sikontutojenna, tau anynyombaya ri Nakke langnganrei, mingka ikau naalleko cipuru'. Langnginungi ke'nanga, mingka ikau turereko. Larannui ke'nanga, mingka ikau nipakasirikko.

¹⁴Sikontutojenna lakkio' rannui ke'nanga, mingka ikau angngarrukko napakamma si'na.

¹⁵Sikamma tau nipileKu lanapakei arennu a'jari pattunra: “Dasi-dasi naNabuno ngasengko Batara Kaminang Tinggia sangkamma ke'nanga!” Mingka tau mannurukia ri Nakke laKusarei areng beru.

¹⁶Tunggala' taua ri anjo pa'rasanganga, ia appalaka barakka', lanapalaki sollanna nibarakkaki ri Allata'ala tamamminraya. Tunggala' taua eroki assumpa; lassumpai lanri arenNa Allata'ala tamamminraya. Saba' kasessang rioloa tappela'mi siagang nikaluppaimi.”

¹⁷ Nakana Batara, “LaKupa'jari langi' berua siagang butta berua. Sikamma kajariang rioloa lanikaluppai siagang talaniu'rangiami.

¹⁸Rannu mako siagang atte'ne pa'mai' mako satunggu-tungguna lanri apa Kupa'jaria. LaKupa'jari Yerusalem beru rassia karannuang, siagang pandudu'na atte'ne-te'ne pa'maiki.

¹⁹ INakke KalengKu larannuA' lanri Yerusalem, siagang late'nei pa'maikKu lanri pandudu'na. Tenamo karru' ri anjo kotaya, siagang tenamo pakkio' appala' tulung.

²⁰Tenamo ana'-ana'na lamate ca'di, na tau toaya lala'bui umuru'na. Tau sibilangngang taung umuru'na lanikanai tau rungka, na matea rioloanganna anjo lanikanai nataba hukkungangKu.

²¹Tau ambangunga balla' na napammantangi kalenna; teai tau maraeng lampammantangi. Lanalamungi ke'nanga siagang poko' anggoro' na nakasia' je'ne' anggoro'na; teai tau maraenga langnginungi. UmmakKu lala'bui umuru'na rapang poko' kayu na nakasia' wassele' karesoanna ke'nanga.

²³Sikontu apa nagaukanga ke'nanga lania' wassele'na, siagang tena nalamate silalonna ana'-ana'na ke'nanga. Ke'nanga siagang turunganna ke'nanga laKubarakkaki satunggu-tungguna.

²⁴Tenapa nappala' ke'nanga, naKuppialimo; tenapa nale'ba' ke'nanga appala' doang naKuturukiammo pappala'na ke'nanga.

²⁵ Serigalaya siagang gimbalaka lasiagangi sipa'rukukang; singaya angnganre rarame sangkamma sapi, siagang ularaka tenamo bahayana. Ri sikontu bulu' matangkasakKu, tenamo lappakarugi siagang a'gau' ja'dala'.”