Read Makassar Version – KITTA' MATANGKASA YESAYA 8 Bible Online

YESAYA 8 - Makassar Version – KITTA' MATANGKASA bible

YESAYA 8

¹Nakana Batara mae ri nakke, “Angngalleko se're batu pannulisang, ia lompoa, nampa nutulisi' siagang hurupu' a'nassa anne: ‘Panrampasang Lacciri', Pangngellakkang Tippaka’.

²Akkiokko rua tau akkullea nipatappa' a'jari sa'bi, iamintu Imang Uria siagang Zakharia, ana'na Yeberekhya.”

³Siapa are wattu ribokoanganna attianammi turiballakku. Ri wattunna lassu' anjo ana'na ikambe, Nakanamo Batara ri nakke, “Arengi antu anaka ‘Panrampasang Lacciri', Pangngellakkang Tippaka.’

⁴Saba' ri tenanapa nalompo-lompo antu anaka nakkulle angkana ‘Bapa'’ siagang ‘Amma'’, sikontu kakalumanynyangnganna Damsyik siagang sikontu barang narampasaka tu Samaria lanilalingi ri karaeng Asyur.”

⁵Nakanamo pole Batara ri nakke,

⁶“Anne bansaya natollaki je'ne' ci'nong battua ri pangka Binangana Syiloah, na sannang ri Karaeng Rezin siagang Karaeng Pekah.

⁷Lanri kammana anjo, iNakke Batara, laKupabattui karaeng Asyur siagang tantarana untu' ambunduki Yehuda. La'bakkai maju ke'nanga, rapang Binanga Efrat allumpa-lumpa sa'genna a'ba biring-birinna.

⁸Lanatujui ke'nanga Yehuda rapang a'ba narapika sa'genna kallong tinggina nammantang je'neka ri kere-keremae.” Narurungangki' Allata'ala! Takka'rangi ka'nyi'Na alla'langi pa'rasanganta.

⁹Annekkere' mako nu'rappungang, he sikontu bansaya! Pilangngeri he sikamma cappa'-cappa' buttaya! Sadiako untu' a'bundu', mingka siagang pa'mai' annekkereka! Iyo, sadia-sadiako, mingka lalang malla'nu!

¹⁰Apparekko rancana, mingka tena nia' anjari. Angngalle mako kaputusang, mingka tena matu-matunna, saba' ikambe Narurungangki' Allata'alana ikambe.

¹¹Nikoasaia' ri Batara siagang Napakaingaka' sollanna tena kupinawangi anjo oloang naoloa anjo bansaya. Nakana,

¹² “Teako arengi passikongkolang apa nakanaya ke'nanga passikongkolang, siagang teako mallakki ri apa-apa nakamallakkanga ke'nanga.

¹³U'rangi angkanaya iNakke, Batara Kaminang Makoasaya, tangkasakKa'. INakkeji bawang musti nukamallakkang.

¹⁴ Lanri sanna'na tangkasakKu, iNakke la'jari batu natatto'roi ra'ya' Yehuda siagang Israel, siagang sikko' angngalleai pandudu'na Yerusalem.

¹⁵Jai tau latatto'ro siagang laloko'. Lata'loposoki ke'nanga antama' ri sikkoka.”

¹⁶Ikau ngaseng, ana'-ana' gurungku, musti nuboliki siagang nuparakai sikamma pasang Napassareanga Allata'ala mae ri nakke.

¹⁷ Le'baki Batara Nacokko KalenNa battu ri turunganna Yakub, umma'Na, mingka inakke tappaka' siagang manrannuanga' mae ri Ia.

¹⁸ Annemi inakke siagang ana'-ana' Napassareanga Batara mae ri nakke. Batara Kaminang Makoasaya ammarenta ri Bulu' Sion, ansuroi ikambe battu a'jari pammatei mae ri umma' Israel.

¹⁹Mingka lanisuroko ri taua appala' pangngunju' battu ri sanro-sanroa, ia a'bici'-bicika siagang a'gio'-gioka muncenna. Lanakana anjo taua, “Sai siratangki' appala' pangngunju' battu ri sikamma nyawana tau matea untu' kaparalluanna tau attallasaka?”

²⁰Appiali mako kamma anne, “Pilangngeri ajaranNa Batara! Tau tenaya na'bicara situru' anjo pangngajaranga, tena panrannuanna.”

²¹Sikamma tau cilakaya siagang tau cipuruka a'dete'mi ri anjo pa'rasanganga. Lanri cipuru'na, a'larro-larromi ke'nanga sa'genna natunrai karaenga siagang Allata'alana ke'nanga. Manna accini' kemae ke'nanga, nai'

²²yareka naung, tena apa-apa lanacini' ke'nanga pantaranganna kasukkarrang siagang sassang kammayatompa bayang-bayang appakamallaka. Lanipelaki ke'nanga mae ri anjo tampa' sassanga.

²³Mingka tena nasatunggu-tungguna lanakasia' kasukkarranga anjo pa'rasanganga. Daera napammantangia suku-suku Zebulon siagang Naftali le'baki nikana tuna ri Batara. Mingka ri wattu labattua sallang, Ia lassarei kalompoang sikontu daeraya battu ri Tamparang Tangngaya anrai' sa'genna ba'leanna Binanga Yordan, ba'lalo sa'genna Galilea napammantangia bansa maraeng.