Read Makassar Version – KITTA' MATANGKASA YESAYA 9 Bible Online

YESAYA 9 - Makassar Version – KITTA' MATANGKASA bible

YESAYA 9

¹ Bansa attallasaka lalang ri sassanga lacciniki singara' lompo. Ia ammantanga lalang ri bayang-bayang kamateanga lanisingari ri cayana singaraka.

² O, Batara, Kisarei ke'nanga karannuang lompo, Kipa'jari ke'nanga makkio' rannu. Rannui ke'nanga lanri kabajikanTa, rapang tau a'rannu-rannua wattu napasse'rena wassele' kattoanna, yareka a'bage barang nirampasa'.

³Le'ba'mi Kialle erangngang battala'na siagang lembarang battala'na ri salangganna. Nibetai anjo bansa nangaia anjallakkang ampaccokai ummatTa. Sanrapang ri jammang allaloa ri wattu Kibetana tantara Midian.

⁴A'lappe'-lappeki sa'ra sapatuna tantaraya na bajunna rassi cera', lala'busu' nikanre ri pepe'.

⁵Nia' sitau ana' lassu' untu' ikatte; nisareki' sitau ana' bura'ne. Ia la'jari pamimpinta. Laniarengi: “Tumappakainga' Cara'de'”, “Allata'ala Pore”, “Mangge Mannannungang”, “Karaeng Passiamakkang”.

⁶Ammarentai salaku turunganna Daud, kakoasanNa tamaka lompona. Tuli laamangi na salewangang pa'rasanganNa; pamarentahanNa ta'dongkoki rate ri hukkung siagang kaadelang anne kamma siagang satunggu-tungguna. Batara Kaminang Makoasaya, mattantu laNarupaina.

⁷ Napabattumi Batara hukkunganga mae ri kakaraenganna Israel.

⁸Sikontu bansa Israel siagang pandudu' Samaria lanaassengi angkana Batara anggaukangi anjo kammaya. Kamma-kamma anne borroi siagang tinggi langgai ke'nanga. Nakana ke'nanga,

⁹“Rumbammi sikamma bangunang balla' batua, mingka lappare' poleangi ikambe balla' batu beru. Le'ba'mi nita'bang sikamma poko' kayu araya, mingka lanasambei ikambe siagang kayu camara Libanon kaminang bajika.”

¹⁰Napagio'mi Batara musunna ke'nanga untu' angngewai ke'nanga.

¹¹Bansa Siria bageang iraya siagang bansa Filistin bageang ilau' angngempoi daerana Israel. Mingka tuli larroNa ija Batara siagang tuli Nahukkunna ija ke'nanga.

¹²Tena ijapa nassesse' lalang bansa Israel, manna pole nanihukkummo ri Batara Kaminang Makoasaya; tena ijapa natoba' ke'nanga mae ri Ia.

¹³Lanri kammana anjo lalang sialloji bawang Nahukkung Batara sikamma pamimpinna siagang ra'ya'na Israel. Napolongi ulunna nampa Napela' ulunna siagang ingkonna.

¹⁴Ulunna, iamintu tutoa-toana siagang tunipakalompona, na ingkonna iamintu sikamma na'bi assarea pangngajarang sala.

¹⁵Sikamma pamimpinna anjo bansaya napasala oloammi siagang napa'jari lingumi ra'yaka.

¹⁶Anjo bansaya a'bokomi siagang panra'mi; yangasenna ke'nanga a'bicara sala mami. Lanri kammana anjo tena manna sitau tau rungka Nipata'lappasa' ri Batara. Tena Nakamaseangi sikamma jandaya siagang ana'-ana' kukanga. Mingka tuli larroNa ija siagang tuli Nahukkunna ija Batara ke'nanga.

¹⁷A'rinrai rapang pepe' kaja'dallanna ke'nanga na nakanre sa'genna cappu' rompo' katintinga. Rinrana rapangi romang akkanre, jai sikali nai' umbunna.

¹⁸Sanna' larroNa Batara Kaminang Koasaya, na hukkunganNa rapangi pepe' a'rinra lompo; nampa anjo bansaya napare' kayu tunuang sa'genna cappu' nakanre pepe'. Tena manna sitau angkamaseangi sari'battanna.

¹⁹Ri sikontu anjo pa'rasanganga massing a're'bu'mi siagang sambarang mami apa-apa nakanre, mingka tena bassoro'na ke'nanga. Ba'lalo massing para iami sikanre-kanre sipa'agangngang!

²⁰A'bundu'mi tu Manasye siagang tu Efraim, nampa assama ke'nanga angngewai Yehuda. Mingka tuli larrona ija Batara siagang tuli Nahukkunna ija ke'nanga.