Read Makassar Version – KITTA' MATANGKASA KAIMANGNGANG 1 Bible Online

KAIMANGNGANG 1 - Makassar Version – KITTA' MATANGKASA bible

KAIMANGNGANG 1

¹Battu ri KemaNa, Nakioki Batara anjo Musa nampa Nasare paratorang-paratorang,

²ia mustia naturuki tu Israel. Punna nia' tau assare olo'-olo' untu' koro'bang nitunu mae ri Batara, akkullei assare sapi, gimbala' yareka bembe.

³Punna sapi napassareang, musti lakia siagang tenaya callanna. Anjo sapia musti naerangi mange ri pakke'bu' KemaNa Batara, sollanna mangngellai Batara mae ri anjo taua.

⁴Nampa musti napadongkoki limanna irate ri tompo' ulunna anjo olo'-oloka, na Natarimamo Batara anjo passarena untu' nipammopporang dosana.

⁵Nampa anjo sapia musti nisamballei ri dallekang pakke'bu'na Kemaya. Cera'na musti napassareangi sikamma imang jari-jarina Harun mae ri Batara, nampa napatiri' anjo ceraka mae ri appaka sa'rinna anjo tampa' pakkoro'bangnganga ri dallekang pakke'bu'na Kemaya.

⁶Nampa anjo taua musti napasuluki kukkulu'na siagang nakere'-kere' anjo olo'-oloka.

⁷Sikamma imanga musti apparinrai pepe' irate ri anjo tampa' pakkoro'bangnganga nampa nasusung kayu tunuanga irateanna.

⁸Kere'-kere'na koro'banga, kammayami ulunna siagang jannana, musti napadongkoki irate ri pepeka.

⁹Anjo taua musti nabissai bone parru'na siagang bongganna anjo sapia; nampa imang tugasaka musti natunu ngasengi anjo ri tampa' pakkoro'banga. Rasanna anjo koro'banga lanapakasannangi nyawaNa Batara.

¹⁰Punna gimbala' yareka bembe napassareang, musti lakia siagang tenaya callanna.

¹¹Anjo taua musti nasamballei anjo olo'-oloka ri bageang warakkanna anjo tampa' pakkoro'bangnganga; nampa imang-imanga musti napatiriki cera'na anjo olo'-oloka mae ri appaka sa'rinna anjo tampa' pakkoro'bangnganga.

¹²Le'baki nikere'-kere' anjo olo'-oloka, sikontu anjo le'baka nikere'-kere', kammayami ulunna siagang jannana musti nipadongkoki ri imanga irateanna anjo tampa' pakkoro'bangnganga.

¹³Nampa anjo taua musti nabissai bone parru'na siagang bongganna anjo olo'-oloka. Nampa musti napassareang ngaseng imanga mae ri Batara, na natunu irate ri tampa' pakkoro'bangnganga. Rasanna anjo koro'bang nitunua lanapakasannangi nyawaNa Batara.

¹⁴Punna jangang-jangang anjo napassareanga, musti bukkuru' yareka jangang-jangang bodobangkeng rungkaya.

¹⁵Musti naerangi imanga anjo jangang-janganga mae ri tampa' pakkoro'bangnganga, nampa naputara' kallonna na natunu ulunna irate ri tampa' pakkoro'bangnganga. Cera'na anjo jangang-janganga musti nipaccoki assulu' mae ri sa'rinna tampa' pakkoro'bangnganga.

¹⁶Parru' pammoneang kanrena siagang sikontu bonena musti nipasulu' ngasengi, nampa nipela' ri pammoneang aua ri rayanganna anjo tampa' pakkoro'bangnganga.

¹⁷Nampa musti nikekke' ri poko' ka'nyi'na, mingka takkulleai sa'genna tassa'la' anjo ka'nyi'na. Nampa musti nitunu anjo jangang-janganga irate ri tampa' pakkoro'bangnganga. Rasanna anjo koro'bang nitunua lanapakasannangi nyawaNa Batara.