Read Makassar Version – KITTA' MATANGKASA KAIMANGNGANG 11 Bible Online

KAIMANGNGANG 11 - Makassar Version – KITTA' MATANGKASA bible

KAIMANGNGANG 11

¹Napassareangi Batara mae ri Musa siagang Harun anne paratorang-paratoranga

²untu' bansa Israel. Sikontu olo'-olo' attallasaka ri bontoa ia a'mamaya siagang ampangkaya kanukunna hallalaki siagang akkullei nikanre.

⁴Teako angnganrei unta, palandu' yareka kalinci. Anjo olo'-olo' kammaya harangi manna pole na'mama, nasaba' tena nappangka kanukunna.

⁷Teako angnganrei bawi. Anjo olo'-olo' kammaya harangi, nasaba' manna nappangka kanukunna, mingka tena na'mama.

⁸Tena nakkulle nikanre dagenna siagang manna bakkena takkulleai nisero lanri harangi anjo olo'-olo' kammaya.

⁹Akkullei nukanre sikamma juku' akka'nyika siagang assissika.

¹⁰Sikamma olo'-olo' niaka lalang je'ne' mingka tena nakka'nyi' siagang tena nassissi' harangi, jari takkulleai nikanre siagang takkulleai nisero bakkena.

¹³Ri sikontu jangang-janganga, anne kammaya takkulleai nukanre lanri harangi: jangang-jangang rajawali, kokoci', sikamma balangkoaka, jangang-jangang nasara', kalaa', jangang-jangang unta, camara', beleko' siagang sikamma jangang-jangang kondoa, kiti' balanga, jangang-jangang kasa siagang pa'nyikia.

²⁰Sikontu olo'-olo' kaluaraya ia akka'nyika harangi,

²¹pantaranganna a'lumpaka.

²²Jari katimbanga, nyenynyenga siagang katimbang moncongbuloa akkullei nikanre.

²³Mingka sikamma olo'-olo' kaluara maraenga ia akka'nyika siagang akkaloloka harangi.

²⁴Se'rea tau a'jari ra'masaki sa'genna labu alloa punna naseroi bakkena kalase'renna anne olo'-oloka: olo'-olo' niaka kanukunna pantaranganna a'mamaya siagang appangkaya kanukunna, siagang olo'-olo' appaka bangkenna na nia' pakkaere'na. Inai-nai angngerang bakke olo'-olo' kammaya anjo musti nasassai pakeanna, mingka ra'masa' iji sa'genna labu alloa.

²⁹Balao tanaya, balao lompoa, balao ca'dia, buncini', sikamma tumpanga, landa', padalle', bengkarung, biku siagang bullung, harangi.

³¹Inai-nai anseroi olo'-olo' kammaya anjo yareka naseroi bakkena a'jari ra'masaki sa'genna labu alloa.

³²Punna tu'guru' anjo bakkena olo'-olo' kammaya ri se'rea apa-apa, a'jari ra'masaki anjo apa-apaya. Kammaminjo mae ri kayua, kaenga, kukkuluka yareka kaeng karung, manna pole nanipake untu' apa-apa mamo. Anjo barang-barang kammaya musti niammei lalang ri je'ne', mingka tuli ra'masa'na sa'genna labu alloa.

³³Punna tu'guru' anjo bakkea antama' ri uring buttaya, sikontu apa niaka lalang ri anjo uringa a'jari ra'masa' ngasengi, siagang anjo uringa musti nireppeki.

³⁴Kanre natabaya je'ne' battu ri anjo uringa a'jari ra'masaki, siagang je'ne' niaka lalang ri anjo uringa a'jari ra'masaki.

³⁵Manna barang-barang apa mamo, punna nitujui ri bakke kammaya anjo a'jari ra'masaki. Tampa' pattunuang buttaya nipare', punna nitaba ri anjo bakkea musti nireppeki lanri ra'masa'mi.

³⁶Pantaranganna timbuseng je'neka yareka bungunga, yangasenna maraenga a'jari ra'masaki punna nitaba ri bakke.

³⁷Punna tu'guru' anjo bakkea ri lamungang eroka nipakioro', anjo lamunganga tuli tangkasa'ji.

³⁸Mingka punna sitabang niamme anjo lamunganga lalang ri je'ne' na nitu'guri ri anjo bakkea, anjo lamunganga a'jari ra'masa'mi.

³⁹Inai-nai anseroi bakke olo'-olo' hallalaka a'jari ra'masaki sa'genna labu alloa.

⁴⁰Tau angngeranga yareka tau angnganrea bakke kammaya anjo musti nasassai pakeanna, mingka tuli ra'masa'na sa'genna labu alloa.

⁴¹Sikontu olo'-olo' a'lemereka irate ri tompo'na buttaya, baji' nakkaloloka, appaka bangkenna yareka jai bangkenna, harangi siagang takkulleai nikanre.

⁴³Teako ra'massi kalennu lanri nukanrena olo'-olo' kammaya anjo.

⁴⁴ INakke Karaeng Allata'alanu, lanri kammana anjo jagai kalennu sollannu tuli matangkasa', lanri iNakke matangkasakKa'.

⁴⁵INakkemi Batara angngerangko assulu' battu ri butta Mesir, sollangKu akkulle a'jari Allata'alanu. Musti matangkasakko, lanri iNakke matangkasakKa'.

⁴⁶Iaminjo paratorang ri passala'na olo'-oloka, kammayami jangang-janganga, olo'-olo' attallasaka lalang ri je'ne' siagang a'lemereka ri tompo'na buttaya.

⁴⁷Musti nuassengi nubatei angkanaya kereanga ra'masa' siagang tangkasa', kereanga olo'-olo' akkullea nikanre siagang olo'-olo' tenaya nakkulle nikanre.