Read Makassar Version – KITTA' MATANGKASA KAIMANGNGANG 12 Bible Online

KAIMANGNGANG 12 - Makassar Version – KITTA' MATANGKASA bible

KAIMANGNGANG 12

¹Napassareangi Batara mae ri Musa anne paratorang-paratoranga,

²untu' bansa Israel. Punna nia' baine allassukang ana' bura'ne, lalanna tuju allo anjo bainea ra'masaki, sangkamma ri wattunna battu bulanna.

³ Ri makasagantujuna alloa musti nisunnaki ana'na.

⁴Le'ba'na anjo ra'masa' iji anjo bainea lalang tallumpulo antallu allonna lanri napassuluki iji cera'. Takkulleai nasero barang-barang nipakea untu' ibada siagang takkulleai antama' ri KemaNa Batara sa'genna narapi' wattu pannangkasina.

⁵Punna nia' baine allassukang ana' baine, lalanna sampulo angngappa' allonna ra'masaki anjo bainea, sangkamma ri wattunna battu bulanna. Le'ba'na anjo ra'masa' iji pole anjo bainea annampulo angngannang allonna, lanri napassuluki iji cera'.

⁶Punna le'ba'mo wattu pannangkasina, baji' lanri le'ba'na allassukang ana' bura'ne yareka ana' baine, anjo bainea musti angngerangi passare mange ri imanga ri dallekang pakke'bu' KemaNa Batara. Anjo passarea iamintu sikayu ana' gimbala' umuru' sitaunga untu' koro'bang nitunu, siagang sikayu jangang-jangang bodobangkeng rungka yareka bukkuru' rungka untu' koro'bang pammopporang dosa.

⁷Imanga musti napassareangi anjo passarea mae ri Batara siagang nagaukang upacaraya untu' antangkasi kara'massanna anjo bainea, sa'genna a'jari tangkasa'. Jari iaminjo musti nagaukang se'rea baine punna le'ba' ammana'.

⁸ Punna tena pakkullena anjo bainea appasadia sikayu ana' gimbala', musti angngerangi ruang kayu jangang-jangang bodobangkeng yareka bukkuru' rungka: sikayu untu' koro'bang nitunu na sikayu untu' koro'bang pammopporang dosa. Imanga musti nagaukangi upacaraya untu' antangkasi kara'massanna anjo bainea, sa'genna a'jari tangkasa'.