Read Makassar Version – KITTA' MATANGKASA KAIMANGNGANG 16 Bible Online

KAIMANGNGANG 16 - Makassar Version – KITTA' MATANGKASA bible

KAIMANGNGANG 16

¹Ri wattunna matemo ruaya ana'na Harun, iamintu ri wattunna napassareang pepe' tenaya Nakaerokangi Batara, Nakanamo Batara ri Musa,

² “Pabattuangi sari'battannu Harun, angkanaya ri wattu le'bakaji bawang nipattantu nakkulle antama' ri Kamara' Kaminang Matangkasaka, iamintu kamara' nisimbanga siagang gordeng, lanri anjoremMa' ampappicinikangi KalengKu lalang ri rammanga irateanna pa'rangka'na Patti Parjanjianga. Punna nadakkai Harun anjo paratoranga, tena tamatena.

³ Ri cara assarea bawang sapi laki rungka untu' koro'bang pammopporang dosa siagang sikayu gimbala' laki untu' koro'bang nitunu, nakkulle antama' Harun ri Kamara' Kaminang Matangkasaka.”

⁴Nampa pole musti naparhatikangi Harun anne paratorang-paratoranga. Ri wattu tenanapa nantama' ri Kamara' Kaminang Matangkasaka musti a'je'neki, nampa napake pakeang imanga, iamintu baju, saluara' bodo, passikko' aya' siagang soro'bang, yangasenna battu ri lenang.

⁵Nampa umma' Israel musti napassareangi mae ri Harun ruang kayu bembe laki untu' koro'bang pammopporang dosa siagang sikayu gimbala' laki untu' koro'bang nitunu.

⁶Musti napassareangi Harun sikayu sapi laki untu' koro'bang pammopporang dosa mae ri kalenna siagang sikontu kaluargana.

⁷Anjo ruaya bembe laki battu ri umma' Israel musti naerangi mange ri dallekang pakke'bu' KemaNa Batara.

⁸Anjoreng musti ammuangi loterei siagang rua batu; se'rea nisarei pammatei “untu' Batara”, na se'reanga nisarei pammatei “Azazel”.

⁹Bembe nipilea untu' Batara musti nipassareangi untu' koro'bang pammopporang dosa.

¹⁰Bembe nipilea untu' Azazel musti niboli' attallasaki ri dallekanNa Batara nampa nibongka mange ri parang lompoa untu' Azazel, sollanna nitangkasi dosa-dosana umma' Israel.

¹¹Punna le'baki napassareang siagang nasamballe Harun sapi lakia untu' pammopporang dosa kalenna siagang dosana sikontu kaluargana,

¹²musti naallei tampa' pepe'ka battu ri tampa' pakkoro'bangnganga nampa nabonei bara pepe' sa'genna rassi siagang ruang kangkang dupa alusuka, nampa naerang mange ri Kamara' Kaminang Matangkasaka.

¹³Anjo dupaya musti natunui ri dallekanna Patti Parjanjianga, sa'genna natongko' anjo pa'rangka'na Patti Parjanjianga siagang umbunna siagang takkullea nacini' Harun, nasaba' punna naciniki, tena tamatena.

¹⁴Nampa musti angngalle Harun sike'de' cera'na anjo sapia, nampa napiracciki siagang karemenna bageang dallekanna pa'rangka' Patti Parjanjianga siagang pintuju mae ri dallekanna Pattia.

¹⁵ Le'baki anjo musti nasamballei Harun anjo bembea untu' koro'bang pammopporang dosana umma' Israel. Cera'na anjo bembea musti nierangi mange ri Kamara' Kaminang Matangkasaka, nampa niparacci' ri bageang dallekanna pa'rangka'na Patti Parjanjianga siagang ri dallekanna Pattia, sangkamma le'baka nigaukang siagang cera'na sapi lakia.

¹⁶Kammaminjo carana imanga ampakatangkasaki Kamara' Kaminang Matangkasaka battu ri kara'massanna Israel siagang battu ri sikontu dosana ke'nanga. Musti nitangkasi KemaNa Batara, ia niaka ri tangnga-tangnga pakkemaanna bansa Israel siagang nitabaya ri kara'massanna ke'nanga.

¹⁷Appakkaramula anjo wattua nantama' Harun ri Kamara' Kaminang Matangkasaka untu' anggaukangi upacara pannangkasia; sa'genna assulu' poleang, takkulleai manna sitau nia' lalang ri anjo Kemaya. Le'baki nagaukang upacaraya untu' kalenna, untu' kaluargana siagang untu' sikontu bansa Israel,

¹⁸musti assuluki Harun siagang a'lampa mange ri tampa' pakkoro'bangngang koro'bang nitunua untu' ampakatangkasaki anjo tampa' pakkoro'bangnganga. Musti angngallei sike'de' cera'na sapia siagang cera'na bembea nampa napasapu ri tanru'-tanru' niaka ri sikamma panyingkulu'na anjo tampa' pakkoro'bangnganga.

¹⁹Naparacciki sike'de' anjo ceraka siagang karemenna sa'genna pintuju mange ri rateanna anjo tampa' pakkoro'bangnganga. Kammaminjo carana ampakatangkasaki tampa' pakkoro'bangnganga battu ri kara'massanna bansa Israel sollanna a'jari tangkasa'.

²⁰Le'baki nagaukang upacara pannangkasia ri Kamara' Kaminang Matangkasaka siagang bageang-bageang maraenga battu ri KemaNa Batara kammayatompa tampa' pakkoro'bangnganna, musti napassareangi Harun sikayu bembe attallasaka, ia nipilea untu' Azazel.

²¹Musti napadongkoki rua-rua limanna irate ri tompo' ulunna anjo bembea nampa naakui ngaseng sikontu kasalanna, dosana siagang gau' salana bansa Israel. Lanri kammana anjo nipalette' ngasemmi sikontu kasalanna bansa Israel mae ri ulunna anjo bembea. Nampa kalase'renna tau nisarea tugasa' musti nabongkai anjo bembea mange ri parang lompoa.

²²Anjo bembea naerang ngasemmi sikontu dosana bansa Israel mange ri daera kalotoroka, ia tenaya napammantangangi tau siagang musti nalappassangi anjoreng ri parang lompoa.

²³ Le'baki anjo musti antamaki Harun ri Kemaya, nasungke pakeang imang napakea wattunna antama' ri Kamara' Kaminang Matangkasaka, nampa naboli' pakeanna anjoreng.

²⁴Nampa musti a'je'ne' ri se'reang tampa' le'baka nipattantu nampa napake ammotere' pakeang kalenna. Le'baki anjo musti assuluki nampa napassareang koro'bang nitunua untu' pammopporanna dosa kalenna siagang dosana bansa Israel.

²⁵Jannana anjo olo'-oloka untu' koro'bang pammopporang dosa musti nitunui rate ri tampa' pakkoro'bangnganga.

²⁶Anjo tau allappassangiai bembea untu' Azazel ri parang lompoa musti nasassai pakeanna siagang a'je'neki ri wattu tenanapa nammotere' mange ri pakkemaanga.

²⁷ Sapi lakia siagang bembea untu' koro'bang pammopporang dosa, ia nieranga cera'na antama' ri Kamara' Kaminang Matangkasa' untu' pammopporanna dosaya, musti nierangi assulu' ri pantarang pakkemaanga nampa nitunu. Kukkulu'na, dagenna siagang bone parru'na anjo ruaya olo'-olo', musti nitunu ngasengi.

²⁸Tau antunuai musti nasassai pakeanna siagang a'je'neki ri wattu tenanapa nammotere' ri pakkemaanga.

²⁹ Anne paratorang-paratoranga musti nituruki sa'genna satunggu-tungguna. Ri tanggala' sampulo bulang tuju, tu Israel siagang bansa maraeng ammantang tulia ri alla'na ke'nanga musti appuasai siagang tanipa'biangai anjama, nasaba' anjo alloa iamintu allo teai sipato' matangkasa'na. Anjo alloa musti nigaukangi upacaraya untu' antangkasi bansa Israel battu ri sikontu dosana ke'nanga sollanna a'jari matangkasa'.

³²Imang Lompoa, ia le'bakamo nilanti' siagang nisa'la' untu' Allata'ala ansambeangi manggena, musti nagaukangi anjo upacara pannangkasia. Musti napakei pakeang tugasa'na,

³³nampa nagaukang upacara pannangkasi Kamara' Kaminang Matangkasaka, bageang-bageang maraenga ri KemaNa Batara, tampa' pakkoro'bangnganga, imang-imanga siagang sikontu bansa Israel.

³⁴Anjo upacaraya musti nigaukangi sikali sitaung untu' ampakatangkasaki bansa Israel battu ri sikontu dosana ke'nanga. Iaminjo paratorang-paratorang mustia nituruki sa'genna satunggu-tungguna. Nagaukammi Musa situru' anjo apa Naparentakanga Batara mae ri ia.