Read Makassar Version – KITTA' MATANGKASA KAIMANGNGANG 17 Bible Online

KAIMANGNGANG 17 - Makassar Version – KITTA' MATANGKASA bible

KAIMANGNGANG 17

¹Nasuroi Batara anjo Musa

²ampassareangi anne paratorang-paratoranga mae ri Harun, sikamma ana'na siagang sikontu bansa Israel.

³Punna nia' tu Israel assare koro'bang sapi, gimbala' yareka bembe mae ri Batara, anjo olo'-oloka musti nasamballei ri dallekang pakke'bu' KemaNa Batara. Punna anjoreng ri tampa' maraenga nasamballe, nadakkaimi hukkunNa Batara lanri appasolongi cera'. Tenamo nanibilangi anggota umma'Na Allata'ala.

⁵Ia ero'na anjo parentaya iamintu sollanna naerang bansa Israel mange ri KemaNa Batara sikontu olo'-olo' nipassareanga ia biasaya nasamballe ke'nanga ri kokoa. Musti naerangi ke'nanga anjo passarea mange ri imanga ri dallekang pakke'bu' KemaNa Batara nampa nasamballe anjoreng untu' koro'bang passiamakkang.

⁶Imanga musti napatiriki cera'na anjo olo'-oloka mae ri sikamma sa'rinna anjo tampa' pakkoro'bangnganga ri dallekang pakke'bu' KemaNa Batara, nampa natunu jannana sollanna anjo rasanna napakasannangi nyawaNa Batara.

⁷Bansa Israel musti tamamminrayai mae ri Batara, siagang tena sikali-kali nakkulle anynyamballe ke'nanga olo'-olo' ri koko-kokoa untu' passare mae ri sikamma jing ja'dalaka. Anjo paratoranga musti nituruki sa'genna satunggu-tungguna.

⁸Punna nia' tu Israel yareka bansa maraeng ammantang tulia ri alla'na tu Israel assare koro'bang nitunu yareka koro'bang maraengang

⁹mae ri Batara, musti napassareangi ri dallekang pakke'bu' KemaNa Batara. Punna anjorengi ri tampa' maraenga napassareang, takkulleami nibilang anggota umma'Na Allata'ala.

¹⁰ Punna nia' tu Israel yareka bansa maraeng ammantang tulia ri alla'na tu Israel angnganre cera', lanihukkungi ri Batara siagang takkulleami nibilang anggota umma'Na Batara.

¹¹ Nyawana sikamma apa attallasaka niaki lalang ri cera'na. Lanri kammana anjo Naparentakangi Batara sollanna sikontu ceraka nipatiriki irate ri tampa' pakkoro'bangnganga sollanna nitangkasi dosa-dosana ummaka. Ceraka iamintu nyawaya, antangkasi dosaya.

¹²Iaminjo saba'na nabansa Israelka yareka bansa maraeng ammantang tulia ri alla'na ke'nanga tanipa'biangngai angnganre cera'.

¹³Punna nia' tu Israel yareka bansa maraeng ammantang tulia ri alla'na ke'nanga anjakkala' jangang-jangang yareka olo'-olo' maraengannaya iamintu tenaya naharang, musti napasuluki cera'na anjo olo'-oloka nampa natambungi siagang butta.

¹⁴Nyawana sikamma apa attallasaka niaki lalang ri cera'na. Lanri kammana minjo Napappisangkangi Batara mae ri bansa Israelka angnganre cera'. Sikamma tau anggaukangai anjo apa Nipappisangkanga, tenamo nanibilangi anggota umma'Na Allata'ala.

¹⁵Sikamma tu Israelka yareka bansa maraeng angnganrea dageng mate kalenna, yareka mate nikokko' ri olo'-olo' sekke', musti nasassai pakeanna nampa a'je'ne' siagang attayang sa'genna labu alloa, nampami a'jari tangkasa'.

¹⁶Punna tena nagaukangi kammaya anjo, musti natanggongi kodina kale'bakkanna.