Read Makassar Version – KITTA' MATANGKASA KAIMANGNGANG 19 Bible Online

KAIMANGNGANG 19 - Makassar Version – KITTA' MATANGKASA bible

KAIMANGNGANG 19

¹Nasuroi Batara anjo Musa

² ampabattui mae ri bansa Israel anne parentaya angkana, “Paralluko matangkasa', nasaba' iNakke Karaeng Allata'alanu matangkasakKa'.

³ Sikontu taua musti napakala'biriki anrong manggena, siagang napakalompo Allo Pammari-marianga sangkamma Kuparentakanga. INakke Karaeng Allata'alanu.

⁴ Teako anynyombai barhala. Teako appareki patung battu ri bassi-bassiang nampa nusomba. INakke Karaeng Allata'alanu.

⁵Punna assareko olo'-olo' untu' koro'bang passiamakkang, pinawangi paratorang-paratorang Kupassareanga, sollanna Kutarima anjo koro'banga.

⁶Dagenna musti nikanre ri allo nisamballena anjo olo'-oloka yareka ammukona. Dageng niaka ija tassesa ri makatalluna alloa musti nitunui sa'genna cappu',

⁷lanri harammi anjo dagenga. Punna nikanre iji anjo dagenga, tena naKutarimai anjo koro'banga.

⁸Inai-nai angkanrei anjo dagenga salami lanri tena najampangi apa nisa'laka untu' iNakke. Anjo tau kammaya tenamo nanibilangi anggota ummakKu.

⁹ Punna akkattoko, teako kattoi gandung attimboa ri biring-biring kokonnu, siagang teako ammoteri ampa'rappungi gandung tassesaya ri le'ba'namo nukatto.

¹⁰Teako ammoteri mange ri koko anggoro'nu untu' appasse're rappo-rappo anggoro' ammantanga tassesa ri le'ba'namo nualle sikali rapponna. Kammayatompa rappo-rapponna tu'gurukamo teako allei. Boli'mi anjo kammaya untu' tau kasi-asia siagang tau battu-battua. INakke Karaeng Allata'alanu.

¹¹ Teako a'lukakki, annipui yareka a'balle-ballei.

¹² Teako a'janji lanri arengKu punna tena nuttojeng-tojeng ero' anrupai anjo janjia, nasaba' lanri kammana anjo nuhinami arengKu. INakke Karaeng Allata'alanu.

¹³ Teako paccoki parannu tau yareka teako alle passai barang-baranna. Sawala'na tau anjamaya ri kau teako tahangngi, manna pole nasipattanja.

¹⁴ Teako tunrai tau tongoloka siagang teako attannangi batu pattato'roang ri dallekanna tau butaya. Paralluko appakala'biri' siagang malla' mae ri Nakke, saba' iNakke Karaeng Allata'alanu.

¹⁵ Musti lambusukko punna angngadeliko; teako battala' mangei ri tu kasi-asia siagang teako mallakki mae ri tau kalumanynyanga.

¹⁶Teako appa'la'bangngi pitina ri alla'na tu'julu bansanu, sollanna tena nu'jari passabakkang namate parannu tau. INakkemi Batara.

¹⁷ Teako pammoli'-molikangngi parannu tau, manna pole inai. Pakabajiki punna nia' passisala-salannu manna pole inai nuagang sisala-sala, sollanna tena nudoraka passabakkang tau maraeng.

¹⁸ Teako appasibalassi panggaukang kodi siagang teako kabirissi parannu tau, mingka kamaseangi parannu tau sangkamma nukamaseanna batangkalennu. INakke Batara.

¹⁹ Mannurukiko ri parenta-parentaKu. Teako appa'buntingi olo'-olo' tenaya nasangkamma. Teako a'lamungi ruang rupa lamungang ri se'rea butta. Teako ammakei pakeang battu ri ruang rupaya bannang nitannung.

²⁰Punna nia' tu bura'ne a'janji ero' ambalukangi ata bainena mae ri bura'ne maraenga untu' napa'jari baine piarana, nampa anjo tau eroka amballi tenapa nabayaraki, na anjo patannaya ata assikatinroangi rolong siagang anjo ataya, anjo tau ruaya musti nihukkungi; mingka takkulleai nihukkung mate, nasaba' manna antekamma anjo bainea atanna tongiji.

²¹Anjo bura'nea musti angngerangi sikayu gimbala' laki mange ri dallekang pakke'bu' KemaKu untu' koro'bang passambe karugiang.

²²Imanga musti nakoro'bangkangi anjo gimbalaka lalang ri upacara pannangkasia, sollanna nipammopporang dosana anjo taua. Na iNakke, Allata'ala lampammopporangi.

²³Punna antama' mako sallang ri pa'rasangang Kanaan nampa a'lamungko a'rupa-rupa rappo-rappoang anjoreng, lalanna tallun taung rioloangannaya musti nubilang harangi rappo-rapponna siagang takkulleai nukanre.

²⁴Lalang ri taung makaappa'na sikontu rapponna musti nupassareangi mae ri Nakke untu' ampappicinikangi pappala' sukkuru'nu mae ri Nakke, Batara.

²⁵Lalang taung makalima nampami akkulle nukanre rapponna. Punna nugaukang ngaseng sikontu anjo paratoranga, lapila' jai rapponna anjo poko' rappo-rappoannu. INakke Karaeng Allata'alanu.

²⁶ Teako angnganrei cera'. Teako ammakei pangngassengang baca-baca.

²⁷ Teako goncingi uu'nu ri sa'ri ulunnu yareka janggo'nu.

²⁸Teako cacaki bukkulennu untu' appare' pammatei yareka bokkaki kalennu a'jari pammatei ri kasusannu lanri kamateangko. INakke Batara.

²⁹ Teako pakatunai anggaranna ana'nu bainea siagang teako lappassangngi a'jari baine sala ri balla'-balla' passambayangang rewataya. Lanri appakammanu anjo nanura'massi pa'rasangannu, siagang la'la'bangi anjo panggaukang sala kammaya anjoreng.

³⁰ Pakalompoi Allo Pammari-marianga siagang pakalompoi tampa' nitangkasia untu' anynyomba mae ri Nakke. INakke Batara.

³¹ Teako a'lampai appala' tangara' mae ri sanro appareka passisambungang siagang roh-rohna tau matea. Punna nugaukangi kammaya anjo, a'jari ra'masakko. INakke Karaeng Allata'alanu.

³²Angngalikko siagang pakala'biriki tau toaya. Paralluko mappakala'biri' siagang malla' mae ri Nakke, nasaba' iNakkemi Batara.

³³ Teako ampanggaukang kodi mae ri bansa maraeng niaka ammantang ri pa'rasangannu.

³⁴Pasangkammai batenu appanggaukang mae ri ke'nanga siagang mae ri julu bansanu siagang kamaseangi ke'nanga sangkamma nukamaseanna batangkalennu. U'rangi angkanaya ikau le'ba' tonjako a'jari bansa tubattu-battu ri Mesir. INakke Karaeng Allata'alanu.

³⁵ Teako pa'dongo'-dongokangngi parannu tau lanri ammakeko ukkurang, timbangang yareka pa'baku' tenaya nannaba.

³⁶Pakei metere', timbangang siagang pa'baku' annabaya. INakke Karaeng Allata'alanu, siagang iNakkemi le'ba' angngerangko assulu' battu ri butta Mesir.

³⁷Turuki sikontu hukkungKu siagang parentaKu. INakke Batara.”