Read Makassar Version – KITTA' MATANGKASA KAIMANGNGANG 21 Bible Online

KAIMANGNGANG 21 - Makassar Version – KITTA' MATANGKASA bible

KAIMANGNGANG 21

¹Nasuroi Batara anjo Musa ampabattui anne parentaya mae ri sikamma imang jari-jarina Harun angkanaya, “Se'rea imang takkulleai nara'massi kalenna lanri amminawanna anghaderi upacara panguburanna bija pammanakanna,

²pantaranganna punna anjo matea iamintu amma'na, manggena, ana'na, sari'battang bura'nena,

³yareka sari'battang bainena ia tenayapa na'bunting, siagang ammantanga assiballa' siagang ia.

⁴Takkulleai nara'massi kalenna lanri nahaderina upacara panguburang bijanna bainenna.

⁵ Se'rea imang takkulleai nagondolo' sipa'gang ulunna siagang takkulleai nacukkuru' janggo'na yareka naloko'-lokoki kalenna siagang bassi tarang lanri ero'na napappiassengang angkanaya natujui susa kamateang.

⁶Anjo imanga le'baki nisa'la untu' iNakke pata, jari takkulleai nara'massi arengKu. Ia assare koro'bang kanre-kanreang mae ri Nakke, jari musti tangkasaki.

⁷Se'rea imang takkulleai a'bunting siagang baine le'ba' pagau' salaya yareka baine tenayamo natulolo yareka le'bakamo assisa'la' siagang bura'nenna, lanri anjo imanga iNakke pata.

⁸Bansa Israelka musti naakui imanga salaku tau le'baka nisa'la' untu' iNakke, nasaba' iami assare koro'bang kanre-kanreang mae ri Nakke. INakke Batara; iNakke anne matangkasakKa' siagang Kutangkasi ummakKu.

⁹Punna nia' ana' baine imang a'jari baine pagau' sala, nahinai manggena siagang musti nitunui sa'genna mate.

¹⁰Imang Lompoa le'ba'mi nilanti' ri wattu nitirikinna minynya' upacara ulunna siagang nipatabana pakeang imang lompoa ri kalenna. Lanri kammana anjo takkulleai nabalang parekang a'jari rotto' uu'na yareka nakekkeki pakeanna lanri natujuna kasusaang kamateang.

¹¹Ia le'ba'mi nipassareang mae ri Nakke untu' a'jari iNakke pata, jari takkulleai nara'massi kalenna. Tena todong nakkulle nara'massi KemaKu lanri assulu'na battu ri KemaKu nampa antama' ri balla' niaka tumatena, manna pole naanjo tau matea iamintu manggena yareka amma'na.

¹³Ia akkullea nabuntingi iamintu tuloloa bawang siagang tau battua ri suku kalenna. Takkulleai a'bunting siagang janda yareka tubaine le'bakamo nisa'la' ri bura'nenna, yareka baine le'ba' pagau' sala.

¹⁵Punna nadakkai anne paratoranga, anjo ana'-ana'na sallang, siratanga matangkasa', la'jari ra'masaki. INakke Batara siagang iNakke le'ba' ansa'laki a'jari Imang Lompo.”

¹⁶Naparentakangi Batara mae ri Musa

¹⁷untu' ampaui anne mae ri Harun angkanaya, “Punna nia' jari-jarinu a'jari tusala-salang, takkulleai assare koro'bang kanre-kanreang mae ri Nakke. Anne atoranga tappakei sa'genna satunggu-tungguna.

¹⁸Tau assarea koro'bang takkulleai tau sala-salanga tubuna, iamintu tau butaya, yareka tau pesoka, tau sala-salanga rupanna yareka sala-salanga tubuna maraenga;

¹⁹ia pesoka limanna yareka akkeppanga bangkenna,

²⁰ia a'bukkuka yareka dattuluka, ia pa'risika matanna yareka natabaya garring bukkuleng siagang le'baka assulu' lisere' katauanna.

²¹Sikamma jari-jarina Harun assala-salanga kalenna takkulleai assare koro'bang kanre-kanreang mae ri Nakke.

²²Mingka akkullei nakanre kanre nipassareanga, baji' koro'bang kanre-kanreang matangkasaka kammayatompa koro'bang kanre-kanreang sannaka matangkasa'na.

²³Lanri anjo taua sala-salangi kalenna, takkulleai nareppesi gordeng passimbanna Kamara' Matangkasaka siagang tampa' pakkoro'bangnganga. Takkulleai nara'massi barang-barang le'baka nisa'la' untu' iNakke, lanri iNakkemi Batara, siagang iNakkemi ansa'laki anjo barang-baranga.”

²⁴Iaminjo paratorang-paratorang napabattua Musa mae ri Harun siagang sikamma ana'na, kammayatompa mae ri sikontu bansa Israel.