Read Makassar Version – KITTA' MATANGKASA KAIMANGNGANG 22 Bible Online

KAIMANGNGANG 22 - Makassar Version – KITTA' MATANGKASA bible

KAIMANGNGANG 22

¹Nasuroi Batara anjo Musa

²ampabattui anne parentaya mae ri Harun siagang sikamma ana'na angkanaya, “Gaukangi siagang siratannaya apa napassareanga bansa Israel untu' iNakke, sollanna tena nanura'massi areng matangkasakKu. INakke Batara.

³Punna nia' jari-jarinu ia ra'masaka anreppesi sikamma passare matangkasa' le'baka nasa'la' bansa Israel untu' iNakke, takkulleami a'jari palayang ri tampa' pakkoro'bangnganga. Anjo paratoranga tappakei sa'genna satunggu-tungguna. INakke Batara.

⁴Punna nia' jari-jarina Harun nataba garring bukkuleng iamintu garring sala, yareka garring baine sa'genna assulu' je'neka battu ri katauanna, tena nipa'biangi angkanrei kanre passare matangkasaka punna tenapa natangkasa' kalenna. Se'rea imang a'jari ra'masaki punna naseroi barang ra'masaka lanri le'baki nataba maya'. A'jari ra'masa' tongi punna assulu' je'ne' kebo'na battu ri katauanna,

⁵yareka nasero olo'-olo' ra'masaka yareka tau ra'masaka.

⁶Se'rea imang, manna pole apa passabakkanna na'jari ra'masa', tuli ra'masa'na sa'genna labu alloa. Siagang punna labumo alloa tenapa nakkulle angnganre kanre nipassareang ri Batara punna tenapa nale'ba' a'je'ne'.

⁷Punna labumo alloa a'jari tangkasa'mi siagang akkullemi nakanre, lanri iaminjo kanrena.

⁸Tena nipa'biangi angnganre dageng olo'-olo' mate kalenna yareka mate nikokko' ri olo'-olo' sekke'. Punna nakanrei, a'jari ra'masaki. INakke Batara.

⁹Sikontu imanga musti naturuki paratorang-paratorang Kupassareanga. Punna tena, salai ke'nanga siagang tena tamatena, lanri nadakkai ke'nanga anjo paratorang-paratorang matangkasaka. INakke Batara, siagang iNakke ansa'laki ke'nanga untu' KalengKu.

¹⁰Anjo passare nisa'laka untu' iNakke imangaji bawang siagang kaluargana akkulle angkanrei; tau maraenga takkulleai, manna pole nasiballa' anjo imanga yareka manna pole natungnganre gajina imanga.

¹¹Mingka punna ata-ata naballia anjo imanga siagang doe' kalenna yareka nilassukangi lalang ri balla'na, akkullei nakanre bageanna anjo imanga.

¹²Ana' bainena se'rea imang ia a'buntinga siagang bura'ne tenaya naimang, takkulleai nakanre anjo passarea.

¹³Mingka ana' bainena imanga ia a'jari jandayamo yareka le'bakamo nisa'la' natena ana'na nampa ammotere' mange ri balla'na manggena kammayatompa a'jari tanggonganna manggena, akkullei nakanre bageanna manggena. Kaluarganaji bawang imanga akkulle angkanrei anjo passarea.

¹⁴Punna nia' tau teai kaluargana imanga tena nakunjungi nanakanre kanre nipassareanga mae ri Batara, musti assarei passambe mae ri imanga na natambai ruampulo parseng.

¹⁵Sikamma imanga takkulleai nara'massi passare le'baka nisa'la' untu' KalengKu

¹⁶lanri nalappassanna nakanre tau tenaya nakkulle angkanrei anjo passarea. Anjo kammaya napa'jari salami anjo taua siagang lanitujui ri hukkungang. INakke Batara, siagang iNakke ampakatangkasaki anjo passarea.”

¹⁷Nasuroi Batara anjo Musa

¹⁸ampassareangi mae ri Harun siagang sikamma ana'na kammayatompa sikontu bansa Israel anne paratorang-paratoranga. Punna nia' tu Israel yareka bansa maraeng ammantang tuliamo ri alla'na tu Israel assare koro'bang untu' anrupai tinja'na, yareka koro'bang ero' kalenna, anjo olo'-olo' napassareanga musti laki siagang tenaya callanna sollanna akkulle nitarima.

²⁰ Teako assarei olo'-olo' niaka callanna nasaba' taerokai Batara antarimai.

²¹Punna nia' tau assare koro'bang passiamakkang mae ri Batara untu' anrupai tinja'na yareka untu' koro'bang ero' kalenna, anjo olo'-oloka takkulleai nia' callanna, sollanna akkulle nitarima.

²²Teako assarei koro'bang olo'-olo' buta mae ri Batara, yareka tepoka bukunna yareka lokoka, yareka niaka lattanna siagang a'nanai, yareka natabaya garring bukkuleng yareka puru-puruanga. Olo'-olo' kammaya anjo teako passareangngi untu' koro'bang kanre-kanreang irate ri tampa' pakkoro'bangnganga.

²³Untu' koro'bang ero' kalennu, akkulleko assare olo'-olo' tenaya nabaji' kalenna; mingka punna untu' anrupai tinja', anjo olo'-olo' kammaya tena nakkulle nitarima.

²⁴Teako assarei mae ri Batara iaminjo olo'-olo' panraka, yareka tassappika, yareka bokkaka, yareka nipelaka lisere' butona. Anjo kammaya takkulleai nigaukang ri pa'rasangannu.

²⁵Olo'-olo' piara nigappaya battu ri bansa maraenga takkulleai nipassareang untu' koro'bang kanre-kanreang. Olo'-olo' kammaya anjo nibilang niaki callanna siagang takkulleai nitarima.

²⁶Ana' sapi, ana' gimbala' yareka ana' bembe beru lassuka musti ammantangi ri anronna lalang tuju allo. Nampami punna le'ba'mo anjo akkullemi nitarima untu' koro'bang kanre-kanreang.

²⁸Teako koro'bangkangi anrong sapia yareka anrong bembea siagang ana'na ri allo sangkammaya wattunna.

²⁹Punna assareko koro'bang kasukkurang mae ri Batara, gaukangi anjo kammaya situru' paratorang, sollanna nanitarima anjo koro'bang nupassareanga.

³⁰Kanre memammi anjo koro'banga anjo alloa, siagang teako boliki ammantang manna pole sike'de' untu' ammuko.

³¹Nakana Batara, “Turuki parenta-parentaKu; iNakke Batara.

³²Teako ra'massi areng matangkasakKu. Sikontu bansa Israel musti anynyombai mae ri Nakke Kaminang Matangkasaka. INakke Batara siagang ampa'jariako tangkasa'.

³³INakke angngerangko assulu' battu ri butta Mesir, sollanna iNakke a'jari Allata'alanu. INakke Batara.”