Read Makassar Version – KITTA' MATANGKASA KAIMANGNGANG 24 Bible Online

KAIMANGNGANG 24 - Makassar Version – KITTA' MATANGKASA bible

KAIMANGNGANG 24

¹Nasuroi Batara anjo Musa

²ampassareangi anne parenta-parentaya mae ri bansa Israel: angngerangko minynya' zaitun tenaya bengkoranna siagang kaminang bajika untu' lampu lalanga ri KemaNa Batara, sollanna akkulle niparinra, nampa a'rinra turus.

³Harun musti naatoroki anjo lampu-lampua battu ri karueng sa'genna bari'basa' ri tampa' kahaderanNa Batara, ri pantaranna gordeng antongkokai Patti Parjanjianga ri Kamara' Kaminang Matangkasaka. Anjo parentaya musti nigaukangi sa'genna satunggu-tungguna.

⁴Harun musti naurusuki lampu-lampua ri bangkeng lampu bulaeng ti'noka sollanna tuli a'rinra lalang ri KemaNa Batara.

⁵ Angngalleko sampulo anrua kilo labu' kaminang baji' nampa apparekko sampulo anrua roti a'bo'dong, massing tasse'rei kilo labu' lalanna sibatua.

⁶Padongkoki anjo rotia na nupa'lonjo' rua, annang roti massing tasse're susung, irate ri meja nilapisika bulaeng ti'no', ia niaka lalang ri KemaNa Batara.

⁷Boliki kamanynyang kaminang bajika ri tassisusunga roti untu' a'jari pammatei angkanaya anjo rotia iamintu koro'bang kanre-kanreang mae ri Batara.

⁸Ri tunggala' allo Pammari-marianga musti nia' roti nipatala lalang ri KemaNa Batara. Iaminjo kawajibanna bansa Israel sa'genna satunggu-tungguna.

⁹ Anjo rotia iami untu' bageanna Harun siagang jari-jarina. Musti nakanrei ke'nanga ri tampa' matangkasaka, nasaba' anjo rotia iamintu bageang sannaka tangkasa'na battu ri koro'bang nipassareanga mae ri Batara untu' sikamma imanga.

¹⁰Ri pakkemaanna tu Israel nia' se're bura'ne. Manggena anjo taua iamintu tu Mesir nampa amma'na iamintu tu Israel niarenga Selomit, ana'na Dibri battu ri suku Dan. Ri se'reang allo a'besereki anjo taua siagang sitau tu Israel ri pakkemaanga. Ri wattunna a'besere', natunrai Allata'ala. Lanri kammana anjo nierammi anjo taua ri tu Israel mange andallekang ri Musa,

¹²na natahang anjo taua siagang natayang kaputusanna battu ri Batara angkanaya apa musti nagaukang ke'nanga mae ri anjo taua.

¹³Nakana Batara mae ri Musa,

¹⁴“Erangi anjo taua assulu' ri pantaranganna kemaya. Sikamma tau le'baka allangngereki attunra anjo taua, musti napadongkoki limanna ri tompo' ulunna anjo taua nampa anjari sa'bi angkanaya salai anjo taua. Nampa sikontu ummaka musti nasambilai batu anjo taua sa'genna mate.

¹⁵Le'baki anjo pa'la'bangi pau anne mae ri bansa Israel: Inai-nai antunrai Allata'ala musti natanggongi kodina kale'bakkanna

¹⁶siagang nihukkung matei. Inai-nai mamo antunrai Batara musti nisambilai siagang batu ri sikontu jama'aka. Anjo hukkunga tappakei untu' tu Israel kammayatompa untu' bansa maraeng ammantang tuliamo ri tangnga-tangngana tu Israel.

¹⁷ Inai-nai ambunoi paranna tau musti nihukkung matei.

¹⁸Inai-nai ambunoi olo'-olo'na paranna tau, musti nasambei anjo olo'-oloka. Dasara'na anne hukkunga iamintu ‘nyawa nisambei nyawa’.

¹⁹Punna nia' tau ampanraki paranna tau, manna pole apa anjo nagaukanga, anjo apa nagaukanga musti nigaukang tongi mae ri anjo taua.

²⁰ Punna annepoki buku, musti nitepo' tongi bukunna. Punna napa'jari buta siali paranna tau, musti nipa'jari buta siali tongi anjo taua. Punna natunrungi paranna tau sa'genna runtung giginna, musti niparuntung tongi giginna anjo taua. Apa-apa mamo nagaukang sa'genna a'jari caca' paranna tau, anjo panggaukang kammaya musti nigaukang tongi mae ri anjo taua salaku pambalasang.

²¹Inai-nai ammuno olo'-olo'na paranna tau, musti nasambei; mingka inai-nai ambunoi paranna tau musti nihukkung matei.

²² Anjo hukkunga tappakei untu' ikau ngaseng, kammayatompa mae ri bansa maraeng niaka ammantang tuli ri alla'nu ngaseng, lanri iNakkemi Batara, Allata'alanu.”

²³Le'baki napabattu Musa sikamma anjo kana-kanaya mae ri bansa Israel, naerammi ke'nanga anjo tau le'baka antunrai Allata'ala assulukang ri pantaranganna pakkemaanga nampa nisambila siagang batu sa'genna mate. Kammaminjo carana tu Israel anggaukangi apa le'baka Naparentakang Batara mae ri Musa.