Read Makassar Version – KITTA' MATANGKASA KAIMANGNGANG 25 Bible Online

KAIMANGNGANG 25 - Makassar Version – KITTA' MATANGKASA bible

KAIMANGNGANG 25

¹ Irate ri Moncong Sinai a'bicarai Batara mae ri Musa siagang Nasuroi

²ampabattui anne paratorang-paratoranga mae ri bansa Israel. Punna antamakko ri pa'rasangang laNapassareanga Batara mae ri kau, musti nupakalompoi Batara, iamintu kammanne carana: Ri tunggala' taung makatujua takkulleai nujama buttaya untu' a'lamung-lamung.

³Lalanna annang taung musti nulamungi sikamma kokonnu, nuparakai anggoro'nu siagang nupasse'rei wassele' lamung-lamunnu.

⁴Mingka ri tunggala' taung makatujua musti nisa'laki untu' Batara. Jari lalang ri anjo taunga anjo buttaya niboliki siagang takkulleai nijama. Teako lamungi sikamma kokonnu siagang teako parakai sikamma poko' anggoro'nu.

⁵Ba'lalo attimboa kalenna yareka anggoro' tenaya niparakai poko'na, takkulleai nupasse're siagang nuboli', nasaba' anjo taunga iamintu taung pammari-mariang untu' buttaya.

⁶Mingka manna nakamma, anjo buttaya lanasare jako wassele' untu' a'jari kanrenu, kanrena sikamma atannu, tungnganre gajinu, siagang bansa maraeng ammantanga siagang ikau.

⁷Kammayatompa olo'-olo' piaranu siagang olo'-olo' liaraka ri pa'rasangannu. Sikontu apa napa'niaka buttaya akkullei nukanre.

⁸Rekengi pintuju tattuju taung, iamintu patampulo assalapang taung jaina.

⁹Nampa ri tanggala' sampulo bulang tuju, iamintu allo nipammopporanna dosaya, suroi taua appasa'ra tarompe' ri kere-kere mae ri sikontu pa'rasanganga.

¹⁰Musti nusa'laki anjo taung makalimampuloa, siagang nupa'la'bang kabebasanga mae ri sikontu pandudu'na pa'rasanganga. Lalanna anjo taunga sikontu barang-barang le'baka nibalukang musti nipoterangi mae ri uru patannaya yareka mae ri jari-jarina. Inai-nai nibalukang salaku ata musti nipoterangi mae ri kaluargana.

¹¹Teako lamungi kokonnu. Gandung attimboa kalenna yareka rappo anggoro' tenaya niparakai ri kokonnu takkulleai nupasse're siagang nuboli'.

¹²Anjo taunga iamintu taung matangkasa' mae ri kau. Iaji bawang akkulle nukanre apa-apa attimbo kale-kalea ri kokonnu.

¹³Lalang anjo taunga sikontu tampa' le'baka nibalukang musti nipoterangi mae ri uru patannaya.

¹⁴Jari punna a'balukko tampa' mae ri parannu tu Israel, yareka ammalliko tampa' battu ri ia, teako jekkongi batenu anggaukangi anjo a'baluka siagang ammallia.

¹⁵Ballinna anjo tampaka musti nipattantui situru' sallona taunga lalang akkullena angngerang wassele' sa'genna Taung Pammoterang ribokoangannaya.

¹⁶Punna jai taunna, ka'jalaki ballinna anjo tampaka. Mingka punna sike'de'ji jaina taunna, musti lammoroki ballinna, nasaba' anjo nibalukanga iamintu wassele'na anjo tampaka.

¹⁷Teako annipui mae ri parannu tu Israel, mingka paralluko malla' mae ri Batara, Allata'alanu.

¹⁸Turuki sikontu hukkunNa siagang parentaNa Batara, sollanna amang tallasa'nu lalang ri anjo pa'rasanganga.

¹⁹LaNasareko wassele' buttana anjo pa'rasanganga sa'genna angganna' kanrenu siagang salewangangko ammantang anjoreng.

²⁰Mingka gassingka nia' akkuta'nang angkanaya apa lanikanre lalanna anjo taung makatujua, ri wattu tenana nilamungi buttaya siagang tenana nanipasse'rei wassele'na.

²¹Lalang ri taung makaannanga laNabarakkaki Batara buttaya sa'genna angganna' wassele'na untu' tallun taung.

²²Siagang ri wattunna nulamungi kokonnu ri taung makasagantujua, nia' ija anjo wassele' taung makaannanga untu' lanukanre. Ba'lalo kanre-kanreang nupasadiaya lagannaki sa'genna narapi' wattunna nupasse're wassele' lamung-lamunnu anjo taunga.

²³Takkulleai nubalukang tampa'nu untu' situlina, nasaba' anjo tampaka teai ikau pata, passangalinna Allata'ala pata. Ikau poro sanrapang jako tau battu-battu, nisarea ising untu' ampakei anjo tampaka.

²⁴Punna nia' tampa' nibalukang, musti niakui ha'na uru patannaya riolo untu' ampasuluki ammotere' anjo tampaka.

²⁵Punna nia' tu Israel tu'guru' kasi-asi sa'genna tarpassa nabalukang tampa'na, bija pammanakanna kaminang a'reppeseka musti ampasuluki anjo tampaka.

²⁶Punna tena tau ampasuluki, mingka ri allo ri boko a'jari nia' pakkullena siagang anggannaki doe'na untu' ampasuluki anjo tampaka,

²⁷musti nabayaraki anjo tau le'baka amballi anjo tampa'na situru' anggaranna wassele'na anjo tampaka lalang taung-taung labattua sa'genna narapi' Taung Pammoterang labattua. Kammaminjo nanagappamo ammotere' tampa'na.

²⁸Mingka punna tena pakkullena ampasuluki tampa'na, anjo tau amballiai tuli koasai ri anjo tampaka sa'genna Taung Pammoterang labattua. Lalang anjo taunga, anjo tampaka musti nipoterangi mae ri uru patannaya riolo.

²⁹Punna nia' tau a'balu' sibatu balla' lalang kota nikulilingia kalli' tembo', akkullei napasulu' anjo balla'na lalang wattu sitaung, appakkaramula nirekeng battu ri tanggala' nabalukanna anjo ballaka.

³⁰Mingka punna lalanna sitaung natanapasuluka anjo ballaka, tappela'mi ha'na untu' ampasuluki anjo balla'na. Anjo ballaka a'jari napatang tulimi anjo tau amballiai siagang jari-jarina. Lalang ri Taung Pammoterang, anjo ballaka tena nanipoterangi.

³¹Untu' balla' ri desa tenaya nikulilingi ri kalli' tembo' paratorang sangkammaya siagang paratoranna tampaka antabai: uru-uru patannaya nia' ha'na ampasuluki siagang anjo ballaka musti nipoterangi lalang Taung Pammoteranga.

³²Mingka tu Lewi nia' ha'na untu' ampasuluki barang-baranna ri kota-kota napammantangia ke'nanga ri kere-kere wattu nakaerokia.

³³Punna nia' tu Lewi ambalukangi balla'na ri kalase'renna anjo kotaya nampa tena napasuluki, anjo ballaka musti nipoterangi mae ri ia lalang Taung Pammoteranga. Nasaba' anjo balla'na tu Lewia ri kota-kotana ke'nanga iamintu barang situlina ke'nanga ri alla'na bansa Israel.

³⁴Mingka parang rukuka ri tammulilina kota-kotana suku Lewi takkulleai nibalukang. Anjo parang rukuka tu Lewi pata sa'genna satunggu-tungguna.

³⁵ Punna nia' tau julu bansanu ammantanga ri alla'nu tu'guru' kasi-asi siagang takkulleai naongkosi tallasa'na, ikau musti nubantui anjo taua sangkamma tau battu-battua yareka bansa maraeng ammantanga ri alla'nu, sollanna akkulle napatulusu' tallasa'na ri alla'nu.

³⁶ Teako appalakki bunga battu ri apa nupappiinranganga mae ri ia, mingka paralluko malla' ri Allata'alanu, siagang lappassammi anjo taua attallasa' ri alla'nu. Tea tongko angngallei passawallang battu ri kanre nubalukanga mae ri ia.

³⁷

³⁸Iaminjo parentaNa Karaeng Allata'alanu le'baka angngerangko assulu' battu ri butta Mesir untu' ampassareangi pa'rasangang Kanaan mae ri kau, sollanna Ia a'jari Allata'alanu.

³⁹ Punna nia' tau julu bansanu ammantanga ri alla'nu tu'guru' kasi-asi sa'genna nabalukang kalenna salaku ata mae ri kau, anjo taua takkulleai nusuro anggaukangi jama-jamanna ataya.

⁴⁰Anjo taua musti ammantangi ri kau salaku tungnganre gaji siagang anjamai mae ri kau sa'genna narapi' Taung Pammoteranga.

⁴¹Anjo wattua ia siagang sikamma ana'na akkullei nabokoi balla'nu nampa ammotere' mange ri kaluargana siagang ri pa'rasangang boe-boena.

⁴²Anjo tu Israel, iami ata-atanNa Batara; Iami angngerangi ke'nanga assulu' battu ri butta Mesir, na lanri kammana anjo takkulleai ke'nanga nibalukang salaku ata.

⁴³Jari tu Israel ambalukangai kalenna mae ri kau takkulleako a'gau' kasara' mae ri ia. Paralluko malla' mae ri Allata'alanu.

⁴⁴Punna paralluko ri ata, akkulleko ammalli battu ri bansa-bansa maraeng niaka ammantang ri tammulilinu.

⁴⁵Akkulle tongko ammalli ana'-ana' battu ri bansa maraeng ammantang tuliamo ri alla'nu. Ana'-ana'na bansa maraenga ia lassuka ri pa'rasangannu akkullei a'jari ikau pata

⁴⁶siagang akkulle tongi nupa'jari warisi' mae ri sikamma ana'nu untu' a'jari atanna ke'nanga lalang sikontu tallasa'na. Mingka sangkammannu tu Israel takkulleai nukasarri.

⁴⁷Punna nia' tau bansa maraeng ammantanga ri tangnga-tangnganu, a'jari kalumanynyang, nampa nia' julu bansanu tu Israel tu'guru' kasi-asi sa'genna nabalukang kalenna a'jari ata mae ri anjo bansa maraenga yareka mae ri kaluargana

⁴⁸anjo tu Israelka tuli nia'na ha'na nipasulu'. Kalase'renna sari'battanna bura'nea,

⁴⁹yareka purinanna bura'nea, yareka cikalinna yareka kalase'renna bija ma'reppese'na, akkullei ampasuluki. Yareka punna ia kalenna a'jari nia' pakkullena ri boko, akkullei napasulu' kalenna.

⁵⁰Anjo ataya musti assipa'bicarai siagang anjo tau le'baka amballi kalenna. Musti narekengi ke'nanga angkanaya pirang taungi kalenna nibalukang a'jari ata sa'genna narapi' Taung Pammoterang labattua, nampa napattantu siapa jaina napasulukangi kalenna. Anjo anggaranna musti nipattantui situru' gaji nipassareanga mae ri tungnganre gajia.

⁵¹Anjo ataya musti napoterangi ballinna kalenna mae ri anjo tau amballiai kalenna situru' jaina gaji nisareangai mae ri se'rea tungnganre gaji lalang taung-taung tenayapa najappai,

⁵²

⁵³sanrapang angkanaya nisaremi gaji attaung. Anjo karaenna takkulleai a'gau' kasara' mae ri ia.

⁵⁴Punna takkulleai nipasulu' anjo taua lalang kalase'renna anjo caraya, ia siagang sikamma ana'na musti nipakabebasaki lalang Taung Pammoterang labattua.

⁵⁵Se'rea tu Israel takkulleai a'jari ata situlina lalang tallasa'na, nasaba' anjo bansa Israel atanNa ngasengi Batara. Batara angngerangi ke'nanga assulu' battu ri butta Mesir. Iami Batara, Allata'alana ke'nanga.