Read Makassar Version – KITTA' MATANGKASA KAIMANGNGANG 26 Bible Online

KAIMANGNGANG 26 - Makassar Version – KITTA' MATANGKASA bible

KAIMANGNGANG 26

¹ Nakana Batara, “Teako appareki barhala yareka teako appaentengi patung yareka benteng batu niukirika untu' nusomba. INakkemi Karaeng Allata'alanu.

²Pakalompoi allo-allo Pammari-marianga siagang allo-allo lompo agama maraengannaya, kammayatompa pakala'biriki tampa' le'baka nisa'la' untu' nipake anynyomba mae ri Nakke. INakkemi Batara.

³ Punna nuturuki paratorang-paratorangKu siagang parenta-parentaKu lalang tallasa'nu,

⁴lappaturungA' bosi punna narapi' wattunna, sa'genna angngerang wassele' buttaya siagang a'rappo poko' kayu rappo-rappoanga.

⁵Lalla'bi-la'bi wassele'na buttanu, sa'genna akkatto ijako gandung, nanarapi'mo sedeng wattu pangngalleanna rappo anggoroka. Siagang punna narapi'mo wattunnu la'lamung gandung, tenapa nule'ba' angngalle ngasengi rappo anggoro'nu. Lagannaki kanre-kanreannu siagang lasalewangangi tallasa'nu lalang ri pa'rasangannu.

⁶LaKujagai kaamananna pa'rasangannu sa'gennu akkulle tinro sannang siagang tena numalla' manna pole ri nai. LaKupa'lanynyaki sikamma olo'-olo' sekkeka battu ri pa'rasangannu, siagang latenamo pa'bundukang ri pa'rasangannu.

⁷Lakkullei nubeta musu-musunnu;

⁸poro lima bawang tau nakkulle nabeta musua sibilangngang siagang sibilangngang tau akkullei nabeta sampuloa sa'bu musu.

⁹LaKubarakkakiko siagang laKupa'jari jai ana' cucunnu. Sikamma apa Kupa'janjianga mae ri kau mattantu laKurupainna.

¹⁰Lalla'bi-la'bi wassele' buttanu, sa'genna angganna' lanukanre untu' sitaung. Ba'lalo tarpassa nupasuluki la'binna taung allaloa battu ri pammolikanna sollanna nia' tampa' pammolikang untu' kattoang berua.

¹¹NiakKa' lammantang ri alla'nu lalang ri KemaKu, siagang tena nalaKutollakko.

¹² INakke larrurungangko; iNakke la'jari Allata'alanu, na ikau la'jari ummakKu.

¹³INakke, Karaeng Allata'alanu, angngerangko assulu' battu ri butta Mesir sollanna tenamo nu'jari ata. Le'ba'mi Kutepoki kakoasang anjallakkangako, siagang Kupa'jari mako tau maradeka.”

¹⁴ Nakana Batara, “Punna tena nupilangngeriA' siagang tena nugaukangi parentaKu,

¹⁵punna nudakkai parjanjiang Kupareka siagang ikau kammayatompa taerokako anturuki sikamma apa le'baka Kupattantu siagang parenta-parentaKu,

¹⁶laKuhukkungko. LappabattuA' bala mae ri kau, garring siagang rammusu' tenaya nakkulle niballei sa'gennu a'jari buta siagang ta'ronang-ronang tallasa'nu. La'lamung-lamungko mingka tena nanugappai wassele'na, nasaba' labattui musu-musunnu ambetako siagang ampaccappuki sikamma apa-apa nulamunga.

¹⁷LaKuhukkungko, sa'gennu nibeta ri musu-musunnu siagang nikoasai ri tau angkabirisiako. La'jari teai sipato' malla'nu sa'gennu lari, manna natenaja tau angngondangko.

¹⁸Punna le'ba' nukasia' ngaseng anjo hukkunganga natenapa numannuruki ri Nakke, laKutambai anjo hukkungangKu a'jari a'lappi tuju.

¹⁹Teai sipato' tamponu, mingka laKupatundu' ngasengko. Tena nalabattu bosia, sa'genna a'jari kalotoro' siagang kassa' kamma bassi buttanu.

²⁰Sikontu pakkaresoannu tena ngaseng matu-matunna, nasaba' tena nalangngerang wassele' buttanu siagang tena nala'rappo lamung-lamunnu.

²¹Punna tulusu' angngewa ijako mae ri Nakke siagang taerokako mannuruki mae ri Nakke, laKutambai pole hukkungannu a'lappi tuju.

²²LaKupabattui olo'-olo' sekkeka ri tangnga-tangnganu. Anjo olo'-olo' sekkeka lanakokkoki ana'-ana'nu, lanabunoi olo'-olo' piaranu siagang lanapaccappukko, sa'gennu a'jari sike'de' dudu mamo tassesa, siagang la'jari sinoi sikamma oloanga lalang ri pa'rasangannu.

²³Punna le'ba' nukasia' ngaseng anjo hukkunganga natena ijapa nupilangngeriA', mingka tulusu' nuewaKu,

²⁴laKupangngajariko siagang Kuhukkungko a'lappi tuju la'bi battala'na na hukkungang rioloa.

²⁵Lappa'niakKa' pa'bundukang ri tangnga-tangnganu lanri nudakkaina parjanjiangKu siagang ikau. Siagang punna asse'reko ri kotanu untu' a'boya pa'la'langngang, lappabattuA' garring tenaya nakkulle niballei, sa'gennu tarpassa manyara mae ri musunnu.

²⁶Lakala'busangko ri kanre, sa'genna punna nia' sampulo baine, se're mami pattunuang roti naparalluang untu' antunui roti niaka ri ke'nanga. Lanipakammai ransung anjo kanrea, siagang punna le'baki nukanre, tulusu' cipuru'nu ija.

²⁷Punna le'baki nukasia' sikontu anjo hukkunganga nutulusu' angngewa ija mae ri Nakke, siagang taerokako mannuruki mae ri Nakke,

²⁸la'jari larroMa' ampangngajariko, siagang laKuhukkungko pole a'lappi tuju la'bi battala'na na hukkungang rioloa.

²⁹Lanaalleko cipuru', sa'genna nukanre ana' kalennu.

³⁰LaKuancuruki sikamma tampa' panynyombannu ri bulu'-buluka, Kurumbangi sikamma tampa' pakkoro'bangngannu untu' attunu dupa, nampa Kupasambila sikamma maya'nu mae ri rumbanna anjo sikamma barhalanu. ErokKa' Kusa'ring ta'langnge

³¹naKuancuru' kota-kotanu, tampa'-tampa' panynyombannu, siagang tena naKutarimai sikamma koro'bannu.

³²LaKuancuru' tabasikali pa'rasangannu, sa'genna ta'bangka sikali sikamma musu angngalleai pa'rasangannu anciniki antekamma heba'na anjo kapanrakanga.

³³Lappa'niakKa' pa'bundukang ri pa'rasangannu siagang laKupasimbung-simbungko mae ri pa'rasanganna bansa maraenga. Lammantangi ta'ronang sikamma kokonnu siagang laKulappassangi a'jari loro kota-kotanu.

³⁴Ri anjo wattua, iamintu ri nia'nu ri pammelakkanga ri pa'rasanganna musu-musunnu, anjo buttanu tenaya nale'ba' ammari-mari nujama-jama ri wattunna nupammantangngi, lammantangi ta'ronang siagang langgappai kasampatang untu' ammari-mari.

³⁶Sikamma taunnu ia niaka ri pammelakkang ri pa'rasangang maraenga, laKupa'jari teai sipato' malla'na, sa'genna manna sa'ra leko' kayu nairi'ja bawang anging nalangngere' nalarimo napakamma malla'. Lalariko sanrapang tau niondanga lalang ri pa'bundukanga, nampa tu'gurukko manna natenaja musu ri ampi'nu.

³⁷Lalariko siagang lasilappo-lappoko para ikau, manna natenaja tau angngondangko. Na tena nukkulle angngewai musu-musunnu.

³⁸Lamateko ri pammelakkanga, niancuru' pa'rasangannu ri musu-musunnu.

³⁹Naia niaka sike'de' ammantang tassesa battu ri kau, attallasaka ri pa'rasanganna musunnu, lata'ronang-ronangi lanri dosa kalenna siagang dosana boe-boena.

⁴⁰Mingka lanaakui jari-jarinu dosana ke'nanga siagang dosana boe-boena ke'nanga, ia tamannurukia siagang angngewaya mae ri Nakke,

⁴¹sa'gengKu angngalle tindakang angngewai ke'nanga nampa Kubongka ke'nanga mange ri pa'rasanganna musu-musunna ke'nanga. Kala'busanna, punna tundu'mo jari-jarinu siagang le'ba'mi najappai hukkunganga lanri dosana siagang mangngewana ke'nanga mae ri Nakke,

⁴² laKuu'rangimi parjanjiangKu siagang Yakub, Ishak siagang Abraham. LaKuberui janjingKu untu' ampassareangi anjo buttaya mae ri bansaKu.

⁴³Mingka anjo buttaya musti nikosongi rolong ri pandudu'na niaka, sollanna akkulle ammari-mari tojeng. Siagang anjo ummakKu musti najappai ngasengi anjo hukkungang Kupabattua mae ri ke'nanga lanri taero'na anturuki paratorang-paratorangKu siagang parenta-parentaKu.

⁴⁴Mingka manna ri nia'na ija ke'nanga ri pa'rasanganna musua, tena nalaKubokoi yareka tena nalaKuancuru' tabasikali ke'nanga. Nasaba' punna Kuancuruki ke'nanga, battuanna Kutappu'mi parjanjiangKu siagang ke'nanga, sa'dangkang iNakke anne Batara, Allata'alana ke'nanga.

⁴⁵LaKuberui parjanjiang Kupareka siagang boe-boena ke'nanga, ri wattunna Kupappicinikang kakoasangKu mae ri sikontu bansaya, iamintu Kueranna ummakKu assulu' battu ri butta Mesir, sollanna iNakke, Batara, a'jari Allata'alana ke'nanga.”

⁴⁶Iaminjo hukkung-hukkung siagang parenta-parenta Napassareanga Batara irate ri Moncong Sinai mae ri Musa untu' bansa Israel.