Read Makassar Version – KITTA' MATANGKASA KAIMANGNGANG 3 Bible Online

KAIMANGNGANG 3 - Makassar Version – KITTA' MATANGKASA bible

KAIMANGNGANG 3

¹Punna nia' tau assare sikayu sapi untu' koro'bang passiamakkang, anjo sapia akkullei laki, akkulle tongi gana, mingka takkulleai nia' caca'na.

²Anjo tau assarea musti napadongkoki limanna ri tompo' ulunna anjo olo'-oloka, nampa nasamballe ri dallekang pakke'bu'na KemaNa Batara. Imang-imang jari-jarina Harun musti napatiriki cera'na anjo sapia mae ri appaka sa'rinna anjo tampa' pakkoro'bangnganga.

³Untu' koro'bang passiamakkanga mae ri Batara, musti napassareangi imanga bageang-bageang kammaya anne: janna anrokokiai bone battanna,

⁴lempanna siagang jannana kammayatompa atenna kaminang bajika.

⁵Yangasenna anjo, siagang koro'bang nitunu maraengannaya, musti nitunui irate ri tampa' pakkoro'bangnganga. Rasanna anjo koro'bang kanrea lanapakasannangi nyawaNa Batara.

⁶Punna anjo nipassareanga iamintu sikayu bembe yareka gimbala' untu' koro'bang passiamakkang, akkullei laki, akkulle tongi gana, mingka takkulleai nia' caca'na.

⁷Punna nia' tau assare sikayu gimbala', musti naerangi mange ri KemaNa Batara.

⁸Anjoreng musti napadongkoki limanna ri tompo' ulunna anjo gimbalaka, nampa nasamballe ri dallekanna Kemaya. Nampa musti napatiri' imanga cera'na anjo gimbalaka mae ri appaka sa'rinna anjo tampa' pakkoro'bangnganga.

⁹Untu' koro'bang passiamakkanga mae ri Batara, musti napassareangi imanga bageang-bageang kammaya anne: jannana anjo gimbalaka, sikontu ingkonna niaka jannana siagang nipolonga ri ampi'na buku dongko'na, jannana anrokokiai bone battanna,

¹⁰lempanna siagang jannana kammayatompa atenna kaminang bajika.

¹¹Imang tugasaka musti natunu ngasengi anjo irate ri tampa' pakkoro'bangnganga untu' a'jari koro'bang nikanre mae ri Batara.

¹²Punna anjo nipassareanga iamintu sikayu bembe, anjo tau assarea musti naerangi mange ri KemaNa Batara.

¹³Anjoreng musti napadongkoki limanna ri tompo' ulunna anjo bembea nampa nasamballe ri dallekanna Kemaya. Imanga musti napatiriki cera'na anjo olo'-oloka mae ri appaka sa'rinna anjo tampa' pakkoro'bangnganga.

¹⁴Untu' koro'bang nikanrea mae ri Batara, musti napassareangi imanga bageang-bageang kammana anne bembea: jannana anrokokiai bone parru'na,

¹⁵lempanna siagang jannana kammayatompa atenna kaminang bajika.

¹⁶Imang tugasaka musti natunu ngasengi anjo sikammaya irate ri tampa' pakkoro'bangnganga. Rasanna anjo koro'bang nikanrea lanapakasannangi nyawaNa Batara. Sikontu jannana anjo olo'-oloka untu' Batara ngaseng.

¹⁷Tena sikali nakkulle tu Israel angnganre janna yareka cera'. Anne paratoranga tappakei sa'genna satunggu-tungguna siagang musti nituruki ri sikontu tu Israel manna pole kemae ammantang.