Read Makassar Version – KITTA' MATANGKASA KAIMANGNGANG 4 Bible Online

KAIMANGNGANG 4 - Makassar Version – KITTA' MATANGKASA bible

KAIMANGNGANG 4

¹Nasuroi Batara Musa

²ampa'la'bangi napau mange ri tu Israel angkanaya inai-nai tena nasangajakki a'gau' dosa lanri nadakkai kalase'renna parentaNa Batara, musti nipinawangi anne paratoranga.

³Punna anjo dorakaya iamintu Imang Lompoa, sa'genna ta'beso' ngaseng todong bansa Israel sala, musti assarei koro'bang iamintu sikayu sapi laki rungka, ia tenaya callanna, mae ri Batara sollanna nipammopporang salana.

⁴Anjo sapia musti nierangi mange ri pakke'bu' KemaNa Batara. Musti napadongkoki limanna Imang Lompoa ri tompo' ulunna anjo olo'-oloka, nampa nasamballe ri dallekanna Kemaya.

⁵Sipa'gang cera'na musti nierangi antama' ri Kemaya.

⁶Nampa musti najallakkang karemenna antama' ri anjo ceraka siagang naparacci' pintuju ri dallekanna gordeng passimbanna Kamara' Matangkasaka.

⁷Sipa'gang anjo ceraka musti nipasapui ri tanru'-tanru' niaka ri sikamma panyingkulu'na pattunuang dupa bauka ilalang ri Kemaya; nampa la'binnaya musti nipatiriki ri dapara'na tampa' pakkoro'bangngang koro'bang nitunua ia niaka ri dallekanna pakke'bu' Kemaya.

⁸Imanga musti naallei sikontu jannana anjo sapi lakia, iamintu janna anrokokiai bone parru'na,

⁹lempanna siagang jannana siagang atenna kaminang bajika.

¹⁰Yangasenna anjo musti natunu ngasengi irate ri tampa' pakkoro'bang nitunua, sangkamma nigaukanga untu' koro'bang passiamakkanga.

¹¹Mingka dagenna anjo sapia, kukkulu'na, ulunna, bangkenna, bone parru'na kammayatompa parru' lolona,

¹²jari yangasenna, pantaranganna bageang le'baka nisa'la', musti nierangi assulu' ri pantaranganna pakkemaanga. Anjoreng, anjo sapia musti nitunui irate ri kayu pepe' tampa' pammelakkang aua, iamintu tampa' le'baka nisa'la'.

¹³Punna ia dorakaya iamintu sikontu umma' Israel, lanri tenana nakunjungi andakkai kalase'renna parentaNa Batara,

¹⁴jari tena nasallo ri niassennamo anjo dosaya, anjo ummaka musti angngerangi sikayu sapi laki rungka mae ri dallekang KemaNa Batara. Anjo olo'-oloka musti nipassareangi untu' a'jari koro'bang nipammopporanna dosaya.

¹⁵Sikamma pamimping bansaya musti napadongkoki limanna ke'nanga ri tompo' ulunna anjo olo'-oloka, nampa nasamballe ri anjo tampaka.

¹⁶Imang Lompoa musti naerangi sipa'gang cera'na anjo olo'-oloka antama' ri Kemaya.

¹⁷Anjoreng musti najallakkangi karemenna antama' ri anjo ceraka nampa napiracciki sa'genna pintuju ri dallekanna gordeng passimbanna Kamara' Matangkasaka.

¹⁸Sipa'ganga pole musti napasapui mae ri tanru'-tanru' niaka ri sikamma panyingkulu'na pattunuang dupaya lalang ri Kemaya; nampa la'binnaya musti nipatiriki ri dapara'na tampa' pakkoro'bangngang untu' koro'bang nitunua, ia niaka ri dallekang pakke'bu'na Kemaya.

¹⁹Sikontu jannana anjo olo'-oloka musti niallei nampa nitunu irate ri tampa' pakkoro'bangnganga.

²⁰Ia carana sangkammai passare sapi laki nipassareanga untu' nipammopporanna dosaya. Kammaminjo carana Imang Lompoa ampassareangi koro'banga untu' nipammopporanna dosa-dosana ummaka, na nipammopporammo anjo dosa-dosaya ri Batara.

²¹Nampa anjo sapi lakia musti nierangi assulu' na nitunu ri pantaranganna pakkemaanga, sangkamma nigaukanga ri passare sapi lakia untu' koro'bang nipammopporanna dosana kallena anjo Imang Lompoa. Kammaminjo batena nipassareang koro'bang untu' nipammopporanna dosana ummaka.

²²Punna anjo tudorakaya iamintu tau anna'galaka koasa lanri tenana nakunjungi andakkai kalase'renna parentaNa Batara,

²³jari tena nasallo ri le'ba'na nasadari musti assarei koro'bang sikayu bembe laki tenaya callanna untu' nipammopporanna dosana.

²⁴Musti napadongkoki limanna irate ri tompo' ulunna anjo olo'-oloka, nampa nasamballe anjoreng ri bageang wara'na tampa' pakkoro'bangnganga, tampa' pammolonganna olo'-olo' untu' koro'bang nitunua.

²⁵Imanga musti najallakkangi karemenna antama' ri cera'na anjo olo'-oloka nampa napasapu mae ri tanru'-tanru' niaka ri sikamma panyingkulu'na tampa' pakkoro'bangnganga siagang napatiri' la'binna antama' ri dapara'na tampa' pakkoro'bangnganga.

²⁶Nampa sikontu jannana anjo olo'-oloka musti nitunui irate ri tampa' pakkoro'bangnganga, sangkamma nigaukanga ri koro'bang passiamakkanga. Kammaminjo carana imanga ampassareangi koro'banga untu' dosana se'rea tau anna'gala' koasa, na nipammopporammo dosana anjo taua ri Batara.

²⁷ Punna nia' sitau ra'ya' biasa a'gau' dosa lanri tena nakunjungi andakkai kalase'renna parentaNa Batara,

²⁸lintaki ri nasadarinamo musti assarei koro'bang sikayu bembe gana ia tenaya callanna.

²⁹Musti napadongkoki limanna ri tompo' ulunna anjo olo'-oloka, nampa nasamballe ri bageang wara'na tampa' pakkoro'bangnganga ri tampa' pammolonganna olo'-oloka untu' koro'bang nitunua.

³⁰Imanga musti najallakkangi karemenna antama' ri cera'na anjo olo'-oloka, nampa napasapu mae ri tanru'-tanru' niaka ri sikamma panyingkulu'na tampa' pakkoro'bangnganga, siagang napatiri' la'binna antama' ri dapara'na tampa' pakkoro'bangnganga.

³¹Sikontu jannana anjo olo'-oloka musti niallei sangkamma todong nigaukanga ri koro'bang passiamakkanga. Anjo jannaya musti natunui imanga irate ri tampa' pakkoro'bangnganga, sollanna rasanna napakasannangi nyawaNa Batara. Kammaminjo carana imanga ampassareangi koro'banga untu' dosana se'rea ra'ya' biasa, na nipammopporammo dosana anjo taua ri Batara.

³²Punna nia' tau assare sikayu gimbala' untu' koro'bang nipammopporanna dosana, anjo gimbalaka musti gana siagang tenaya callanna.

³³Musti napadongkoki limanna irate ri tompo' ulunna anjo olo'-oloka, nampa nasamballe ri bageang wara'na tampa' pakkoro'bangnganga, ri tampa' pammolonganna olo'-olo' nipassareanga untu' koro'bang nitunu.

³⁴Imanga musti najallakkangi karemenna antama' ri anjo cera' olo'-oloka, nampa napasapu ri tanru'-tanru' niaka ri sikamma panyingkulu'na tampa' pakkoro'bangnganga, siagang napatiri' la'binna naung ri dapara'na tampa' pakkoro'bangnganga.

³⁵Nampa musti nialle ngaseng sikontu jannana anjo olo'-oloka sangkamma nigaukanga ri koro'bang passiamakkanga. Anjo jannaya musti nitunui irate ri tampa' pakkoro'bangnganga, siagang ngaseng koro'bang nikanre maraenganga ia nipassareanga mae ri Batara. Kammaminjo carana imanga ampassareangi koro'bang untu' nipammopporanna dosana anjo taua, na nipammopporammo dosana ri Batara.