Read Makassar Version – KITTA' MATANGKASA KAIMANGNGANG 5 Bible Online

KAIMANGNGANG 5 - Makassar Version – KITTA' MATANGKASA bible

KAIMANGNGANG 5

¹Anjo koro'bang nipammopporanna dosaya parallui nipassareang: Punna nia' tau nikellai assare kasa'biang ri pangadelanga, mingka tena nassare kasingarang ri anjo passala' le'baka nacini' yareka nalangngere', sa'genna nakasia' baji'-kodina.

²Punna nia' tau anggaukangi kasalanga lanri tena nakunjungi sa'genna a'jari ra'masa', ebara'na naseroi olo'-olo' matea, nampa ri boko nasadari anjo kasalanna.

³Punna nia' tau anggaukangi kasalanga mingka tena nakunjungi iamintu naseroi barang ra'masa' battua ri rupataua, nampa ri boko nasadari anjo kasalanna.

⁴Punna nia' tau anggaukangi kasalanga lanri assumpa sambarangangi untu' anggaukangi apa-apaya, nampa ri boko nasadari anjo kasalanna.

⁵Untu' sikamma anjo kasalang kammaya, parallui naakui taua kasalanna.

⁶Na untu' antangkasi anjo dosana, musti angngerangi anjo taua sikayu gimbala' yareka bembe gana untu' napassareang mae ri Batara. Imanga musti napassareangi anjo koro'banga sollanna nipammopporang dosana anjo taua.

⁷Mingka punna tena pakkullena anjo tau kasalanga appasadia gimbala' yareka bembe untu' antangkasi dosana, musti angngerangi sipasang jangang-jangang bukkuru' yareka jangang-jangang bodobangkeng rungka, sikayu untu' koro'bang nipammopporanna dosana, nampa sikayu pole untu' koro'bang nitunu.

⁸Anjo jangang-janganga musti nierangi mae ri imanga. Imanga musti napassareangi la'bi riolo jangang-jangang nipattantua untu' koro'bang nipammopporanna dosaya. Kallonna anjo jangang-janganga musti naputaraki, mingka takkulleai sa'genna sisa'la' siagang ulunna.

⁹Cera'na anjo jangang-janganga musti niparacciki mae ri sa'rinna tampa' pakkoro'bangnganga, nampa la'binna nipaccoki assulu' ri dapara'na tampa' pakkoro'bangnganga untu' a'jari koro'bang pammopporang dosa.

¹⁰Le'baki anjo napassareang tongi imanga anjo jangang-jangang makaruaya untu' koro'bang nitunu, situru' paratoranga. Kammaminjo carana imanga ampassareangi koro'banga untu' antangkasi dosana anjo taua, na nipammopporang ri Batara.

¹¹Punna tena pakkullena anjo tau kasalanga appasadia sipasang bukkuru' yareka jangang-jangang bodobangkeng untu' koro'bang nipammopporanna dosaya, musti angngerangi sikilo labu'. Anjo labuka takkulleai nipasileo' siagang minynya' zaitun yareka nipasierang kamanynyang, nasaba' anjo koro'banga iamintu koro'bang nipammopporanna dosaya, teai koro'bang nipatala.

¹²Anjo labuka musti nierangi mange ri imanga. Imanga musti naallei sikangkang anjo labuka a'jari pammatei angkanaya le'ba'mi napassareang ngaseng anjo koro'banga mae ri Batara. Anjo labu' sikangkanga musti nitunui irate ri tampa' koro'banga salaku koro'bang kanre-kanreang. Iaminjo koro'banna sollanna nipammopporang dosana.

¹³Kammaminjo carana nipassareang koro'banga untu' dosana anjo taua, na lanipammopporang dosana ri Batara. La'binna anjo labuka iaminjo a'jari bageanna imanga, sangkamma ri koro'bang gandunga.

¹⁴Napassareangi Batara mae ri Musa anne paratorang-paratoranga.

¹⁵Punna nia' tau tena nakunjungi anggaukangi dosaya lanri takkaluppai ampassareangi sikamma passare parallua mae ri Batara, anjo taua musti angngerangi koro'bang passambe karugiang. Anjo koro'banga iamintu musti sikayu gimbala' laki yareka bembe laki ia tenaya callanna, siagang nianggaraka situru' tasserang ballinna ri KemaNa Batara.

¹⁶Anjo taua musti nabayaraki apa nakaluppaia riolo, nampa nitambai ruampulo parseng. Nampa musti napassareang anjo olo'-oloka mae ri imanga, nampa nakoro'bangkang imanga anjo olo'-oloka untu' pannangkasina dosana anjo taua, na lanipammopporang dosana ri Batara.

¹⁷Punna nia' tau tena nakunjungi anggaukangi dosaya lanri nadakkaina kalase'renna parentaNa Batara, anjo taua salai siagang musti natanggongi kodina anjo kasalanna.

¹⁸Untu' koro'bang sambe karugiang musti angngerangi anjo taua sikayu gimbala' laki yareka bembe laki ia tenaya callanna siagang nitassereka anggaranna situru' anggarang nipakea ri KemaNa Batara. Imanga nakoro'bangkangi anjo passarea untu' pannangkasina dosana anjo taua, na lanipammopporang ri Batara.

¹⁹Iaminjo koro'bang sambe karugiang untu' kasalanna anjo taua mae ri Batara.