Read Makassar Version – KITTA' MATANGKASA KAIMANGNGANG 6 Bible Online

KAIMANGNGANG 6 - Makassar Version – KITTA' MATANGKASA bible

KAIMANGNGANG 6

¹ Napassareangi Batara mae ri Musa anne paratorang-paratoranga.

²Se'rea tau musti assarei koro'bang punna dorakai mae ri Batara, lanri tenana naero' ampoterangi apa-apa nabolika paranna tau mae ri ia, yareka natipui paranna tau, yareka nalukkaki barang-baranna, yareka nabuntulu'mi anjo baranga mingka assassalaki nassumpa.

⁴Anjo tau kasalanga musti nabayaraki ammotere' sikontu apa nagappaya ri oloang tenaya nalambusu'. Punna kaassengangi kasalanna, musti a'bayara' gannaki mae ri patanna, nampa nitambai ruampulo parseng.

⁶Untu' koro'bang sambe karugiang anjo taua musti assarei sikayu gimbala' laki yareka bembe laki ia tenaya callanna siagang nitassereka ballinna situru' balliang nipakea ri KemaNa Batara.

⁷Imanga nakoro'bangkangi anjo koro'banga untu' dosana anjo taua, na lanipammopporang ri Batara.

⁸Batara Nasuroi Musa

⁹ampassareangi mae ri Harun siagang ana'-ana'na anne paratorang-paratoranga ri passala'na yangaseng koro'bang nitunua. Imanga musti napadongkoki koro'bang nitunua irate ri tampa' koro'banga siagang naboli' sipattang, na musti tuli a'rinrai pepe'na.

¹⁰Punna a'jari aumo anjo koro'banga, imang ammakea saluara' bodo siagang juba battu ri kaeng lenang, musti naangkaki anjo au niaka jannana battu rate ri tampa' pakkoro'bangnganga nampa naboli' ri sa'rinna tampa' pakkoro'bangnganga.

¹¹Le'baki anjo musti nasambei pakeanna nampa naerang anjo aua assulu' battu ri kemaya, mae ri tampa' le'bakamo nipattantu untu' anjo.

¹²Tunggala' bari'basa' imanga musti nabonei kayu tunuang tampa' pakkoro'bangnganga, naatoroki koro'bang nitunua ri tompo'na, siagang natunu jannana koro'bang passiamakkanga. Pepeka irate ri tampa' pakkoro'bangnganga musti tuli a'rinrai siagang takkulleai mate pepe'na.

¹⁴Iaminne paratorang-paratoranna koro'bang nipatalaya untu' Batara. Anjo koro'banga musti nierangi mange ri dallekanna tampa' pakkoro'bangnganga ri kalase'renna jari-jarina Harun.

¹⁵Musti angngallei sikangkang labu' alusu' siagang minynya' kammayatompa sikontu kamanynyanna, nampa natunu irate ri tampa' pakkoro'bangnganga a'jari pammatei angkanaya yangasenna anjo koro'banga le'ba'mi nipassareang mae ri Batara. Rasanna anjo koro'banga napakasannangi nyawaNa Batara.

¹⁶La'binna anjo labuka musti nipareki roti tenaya nammake pa'gambang siagang nakanrei sikamma imanga ri tampa' le'baka nipattantu untu' anjo, iamintu ri paranglakkenna KemaNa Batara. Iaminjo bageanna sikamma imanga ia Napassareanga Batara mae ri ke'nanga battu ri koro'bang nipatalaya. Anjo kanrea teai sipato' tangkasa'na, sangkamma koro'bang nipammopporanna dosaya siagang koro'bang passambe karugiang.

¹⁸Untu' satunggu-tungguna sikamma bura'ne jari-jarina Harun akkullei nakanre anjo rotia; iaminjo bageang attantuna ke'nanga battu ri kanre-kanreang nipassareanga mae ri Batara. Tau maraenga punna naseroi anjo kanre le'bakamo nikoro'bangkang, langgappai bala lanri koasa katangkassanna anjo koro'banga.

¹⁹Napassareangi Batara mae ri Musa anne paratorang-paratoranga,

²⁰iamintu ri passala'na koro'banga punna nilanti' jari-jarina Harun a'jari imang. Ri allo wattunna nilanti', musti assarei sikilo labu' gandung mae ri Batara. Bageruanna musti napassareangi ri wattu bari'basa', na sesanna ri wattunna karueng.

²¹Anjo labuka musti nipasileoki siagang minynya', nampa nilangga irate ri pa'langganga, nampa nipue-pue na nipassareang a'jari koro'bang nipatala. Rasanna anjo koro'banga napakasannangi nyawaNa Batara.

²²Untu' satunggu-tungguna sikamma jari-jarina Harun nilantika a'jari Imang Lompo musti assarei koro'bang kammaya anjo. Yangasenna anjo koro'banga musti nitunui untu' passare mae ri Batara.

²³Tunggala' koro'bang nipatalaya, ia napassareanga imanga musti nitunu ngasengi, manna sike'de' takkulleai nikanre.

²⁴Batara Nasuroi Musa

²⁵ampassareangi mae ri Harun siagang ana'-ana'na anne paratorang-paratoranga ri passala'na koro'bang pammopporang dosaya. Olo'-olo' untu' koro'bang nipammopporanna dosaya musti nisamballei ri tampa' pammolongang untu' koro'bang nitunua. Anjo koro'banga teai sipato' tangkasa'na.

²⁶Imang ampassareangai anjo koro'banga musti nakanrei anjo koro'banga ri tampa' le'baka nipattantu untu' anjo, iamintu ri paranglakkenna KemaNa Batara.

²⁷Manna inai yareka manna pole apa punna nasero anjo dageng olo'-oloka langgappai bala lanri koasa katangkassanna. Punna nia' silawara' baju nataba racci' cera'na anjo olo'-oloka, anjo bajua musti nisassai ri tampa' matangkasaka.

²⁸Uring butta le'baka nipake untu' ampallui anjo dageng koro'banga musti nireppeki. Punna uring bassi nipake, anjo uring bassia musti nitangkasi nikeso' nampa nitangkasi siagang je'ne'.

²⁹Sikamma tu bura'nea lalang ri kaluargana imang-imanga akkullei nakanre anjo koro'bang sannaka tangkasa'na.

³⁰Olo'-olo' untu' upacara nipammopporanna dosaya niallei sipa'gang cera'na untu' nierang mange ri Kamara' Matangkasaka, musti nitunui sa'genna cappu', na takkulleai nikanre.