Read Makassar Version – KITTA' MATANGKASA KAIMANGNGANG 7 Bible Online

KAIMANGNGANG 7 - Makassar Version – KITTA' MATANGKASA bible

KAIMANGNGANG 7

¹Iaminne paratorang-paratorang ri passala'na koro'bang passambe karugianga. Anjo koro'banga teai sipato' tangkasa'na.

²Olo'-olo' untu' koro'banga musti nisamballei ri tampa' pammolongang untu' koro'bang nitunua, nampa nipatiri' cera'na ri appaka sa'rinna tampa' pakkoro'bangnganga.

³Imanga musti napassareangi irate ri tampa' pakkoro'bangnganga sikontu jannana anjo olo'-oloka, iamintu: Ingkonna a'jannaya, janna niaka antongkoki bone parru'na, lempanna siagang jannana, siagang atenna kaminang bajika.

⁵Yangasenna anjo musti natunui irate ri tampa' pakkoro'bangnganga a'jari koro'bang kanre-kanreang mae ri Batara. Anjo koro'banga iamintu untu' koro'bang passambe karugiang.

⁶Sikamma tu bura'nea lalang ri kaluargana imang-imanga akkullei nakanre anjo dageng koro'banga, mingka musti nakanrei ke'nanga ri tampa' le'baka nipattantu, nasaba' anjo koro'banga teai sipato' tangkasa'na.

⁷Untu' koro'bang pammopporang dosaya siagang koro'bang passambe karugianga sangkammai paratoranna, iamintu: Dageng olo'-olo' nikoro'bangkanga iami bageanna imang tugasaka ampassareangi anjo koro'banga.

⁸Kukkulu'na anjo olo'-oloka bageanna todong imanga.

⁹Tunggala' koro'bang nipatalaya ia nitunua lalang ri pattunuanga yareka nipallua lalang ri pamaja' yareka nilanggaya, a'jari bageanna imang tugasaka ampassareangi anjo wattua.

¹⁰Mingka koro'bang nipatala tenaya nanipallui, baji' nanicampuruka siagang minynya' kammayatompa kalotoroka, yangasenna untu' imang-imang jari-jarina Harun, siagang musti nipasangkamma-kammai bagena mae ri ke'nanga.

¹¹Iaminne paratorang-paratorang ri passala'na koro'bang passiamakkang nipassareanga mae ri Batara.

¹²Punna nipassareang anjo koro'banga untu' appala' sukkuru', anjo olo'-oloka musti nikoro'bangkangi siagang roti tenaya nammake pa'gambang. Anjo rotia akkullei kapala', nipareka battu labu' nipasileoka minynya' zaitun, akkulle tongi roti kalotoro' nipisika siagang nisapua siagang minynya', yareka kanrejawa labu' nipasileoka siagang minynya' zaitun.

¹³Pantaranganna anjo musti nipassareang tongi roti ammakea pa'gambang.

¹⁴Battu ri anjo a'rupa-rupaya roti musti nipassareangi sipa'gang mae ri Batara; iaminjo bageanna imang angngalleai cera'na anjo olo'-oloka nampa napatiri' mae ri tampa' pakkoro'bangnganga untu' koro'bang passiamakkang.

¹⁵Dagenna musti nikanre memang ri allo nipassareanna anjo olo'-oloka, manna sike'de' takkulleai niboli' sa'genna ammuko bari'basa'.

¹⁶Punna nia' tau angngerang koro'bang passiamakkang untu' anrupai tinja'na, yareka untu' koro'bang lanri ero' kalenna, tena naparallu nikanre ngaseng memang anjo alloa. Punna nia' la'binna akkullei nikanre ammukona.

¹⁷Punna ri makatalluna alloa nia' ija tassesa, anjo dagenga musti nitunui sa'genna cappu'.

¹⁸Mingka punna ri makatalluna alloa na nikanre ija anjo dagenga, tenamo nalanitarima anjo koro'banga siagang tenamo nalangngerang barakka' mae ri kalenna anjo tau angngeranga koro'bang, ba'lalo a'jari harammi. Inai-nai angkanrei, salai anjo taua, siagang musti natanggongi kodina.

¹⁹Dageng nitabaya ri apa-apa ra'masa' musti nitunui sa'genna cappu' siagang takkulleai nikanre. Dageng koro'bang passiamakkanga, tau tenaya bawang nara'masa' akkulle angkanrei.

²⁰Punna nia' tau angkanrei anjo dagenga ri wattu ra'masa'na, tenamo nanibilangi anggota umma'Na Allata'ala.

²¹Punna nia' tau angkanrei anjo dageng koro'banga ri wattu le'ba'na nasero apa-apa ra'masaka, baji' na apa-apa battua ri rupataua kammayatompa na apa-apa battua ri olo'-oloka, tena tommo nanibilangi anggota umma'Na Allata'ala.

²²Napassareangi Batara mae ri Musa anne paratorang-paratoranga

²³untu' bansa Israel. Jannana sapia, gimbalaka yareka bembea, takkulleai nikanre.

²⁴Jannana olo'-olo' mate kale-kalea yareka mate nikokkoka ri olo'-olo' sekke', takkulleai nikanre mingka akkullei nipake untu' kaparalluang maraeng.

²⁵Inai-nai angkanrei janna olo'-olo' biasaya nipassareang untu' koro'bang kanre-kanreang mae ri Allata'ala, tenamo nanibilangi anggota umma'Na Allata'ala.

²⁶ Tu Israel, manna pole kemae ammantang, takkulleai angnganre cera' jangang-jangang yareka cera' olo'-olo' maraengannaya.

²⁷Inai-nai andakkai anjo paratoranga, tenamo nanibilangi anggota umma'Na Allata'ala.

²⁸Napassareangi Batara mae ri Musa anne paratorang-paratoranga

²⁹untu' bansa Israel. Inai-nai angngerang koro'bang passiamakkang, musti nasa'laki sipa'gang untu' passare attantu mae ri Batara.

³⁰Ia kalenna musti angngerangi anjo koro'bang kanre-kanreanga. Jannana siagang barambanna anjo olo'-oloka musti nipassareangi a'jari passare nipappicinikang mae ri Batara.

³¹Imanga musti natunui jannana anjo olo'-oloka irate ri tampa' pakkoro'bangnganga, mingka barambanna iami bageanna sikamma imanga.

³²Bongga kananna musti nipassareangi a'jari sumbangang nisa'la'

³³mae ri imang tugasaka ampassareangi cera'na siagang jannana anjo koro'bang passiamakkanga.

³⁴Barambanna siagang bongga kananna iami passare nisa'la' Naallea Batara battu ri passare napappicinikanga bansa Israel siagang nipassareanga mae ri sikamma imanga. Iaminjo sumbanganna bansa Israel mae ri sikamma imanga sa'genna satunggu-tungguna.

³⁵Battu ri kanre nipassareanga mae ri Batara, iaminjo bageang nipassareanga mae ri Harun siagang ana'-ana'na ri allo nilanti'na ke'nanga a'jari imang.

³⁶Ri anjo alloa Batara Naparentakangi mae ri bansa Israel sollanna anjo battua ri passarena ke'nanga, iaminjo a'jari bageanna sikamma imanga. Anjo paratoranga musti naturuki bansa Israel sa'genna satunggu-tungguna.

³⁷Kammaminjo paratorang paratoranga ri passala'na koro'bang nitunua, koro'bang nipatalaya, koro'bang pammopporang dosaya, koro'bang passambe karugianga, koro'bang pallantikanga siagang koro'bang passiamakkanga.

³⁸Napassareangi Batara anjo parenta-parentaya mae ri Musa ri Moncong Sinai, ri wattunna Nasuro bansa Israel assare koro'bang ri parang lompona Sinai.