Read Makassar Version – KITTA' MATANGKASA YEREMIA 13 Bible Online

YEREMIA 13 - Makassar Version – KITTA' MATANGKASA bible

YEREMIA 13

¹Nasuroa' Batara a'lampa mange ammalli lipa' bodo battua ri kaeng lenang nampa kupake, mingka takkulleai kutallangngang antama' ri je'neka.

²Jari a'lampama' mange amballi anjo lipa' bodoa, nampa kupake.

³Nampa a'bicaramo Batara ri nakke, Nakana,

⁴“A'lampako mange ri Binanga Efrat, siagang cokkoi anjo lipa' bodoa ri alla'-alla'na batua.”

⁵Jari situru' parentaNa Batara, a'lampama' nampa kucokko anjo lipa' bodoa ri ampi'na Binanga Efrat.

⁶Siapa are wattu ribokoanganna, Nasuroma' pole a'lampa Batara mange ri Binanga Efrat untu' angngallei anjo lipa' bodoa.

⁷Jari a'lampama', nampa kupasulu' anjo lipa' bodoa battu ri tampa'na kucokko. Nama'nassa jappo'mo anjo lipaka, siagang tena sikalimo matu-matunna.

⁸Nampa a'bicaramo pole Batara mae ri nakke, angkana,

⁹“Kammaminjo caraKu angngalle tindakang mae ri tu Yehuda siagang pandudu'na Yerusalem. LaKuancuruki anjo kabarroang ta'liwa'na ke'nanga.

¹⁰Anne bansa ja'dalaka sanna' kapala batuna siagang taerokai mannuruki ri Nakke. Anynyombai siagang napa'jari atai kalenna ke'nanga mae ri rewata-rewata maraenga. Lanri kammana minjo nala'jari ke'nanga rapang anjo lipa' bodo tenaya matu-matunna.

¹¹Rapang lipa' bodo tassikko' jarreka ri aya'na tau ampakeai, kammami anjo erokKu sollanna tassikko' umma' Israel siagang Yehuda mae ri Nakke. Lanri kammanami anjo na'jarimo ke'nanga ummakKu ampa'jariai arengKu nipuji siagang nipakalompo. Mingka, taerokai ke'nanga mannuruki ri Nakke.”

¹²Nakana Karaeng Allata'ala ri nakke, “Yeremia, pabattui anne pasangKu mae ri tu Israel angkanaya tunggala' bongki pammoneang anggoroka musti nibonei anggoro' sa'genna rassi. Lappiali ke'nanga angkana, ‘Apa saba' natanaassenga ikambe angkanaya tunggala' bongkia musti nipirassi siagang anggoro'?’

¹³Jari pauangi ke'nanga angkanaya sikamma taua anrinni ri pa'rasanganga, sikamma karaeng jari-jarina Daud, sikamma imanga, na'bia, siagang sikontu pandudu'na Yerusalem laKubonei anggoro' sa'genna nabengo.

¹⁴Nampa laKupasiruppa ke'nanga massing para ia. Tau toa siagang tau rungka laKupakamma ngaseng nampa tena nalanipammopporang. LaKupanraki ke'nanga, tena Kupassayangi yareka tena naKukamaseangi. INakke, Batara, anne akkana.”

¹⁵Umma' Israel, le'ba'mi a'bicara Batara! Teako tampoi, mappilangngeri mako ri Ia!

¹⁶Musti nupakalompoi Karaeng Allata'alanu lalang tenanapa Napabattui sassanga, siagang tatto'ro bangkennu ri pa'monconganga, lalang anjo singara' numinasaia taNapinrayapi a'jari sassang.

¹⁷Punna kuttu nyawanu mappilangngeri, la'mere'-merekia' angngarru'. Pacce pa'maikku angkarruki anjo katampoannu. Lammattiki je'ne' matangku lanri niengka'na umma'Na Batara salaku tunitahang.

¹⁸Nakana Batara ri nakke, “Suroi karaenga siagang amma'na naung battu ri empoang kakaraenganna, nasaba' anjo songko' karaeng ga'gana tu'guru'mi battu ri ulunna.

¹⁹Kota-kotana Yehuda ri bageang timboroka nikurungi ri musu, siagang tenamo akkulle antarrusuki anjo pakkurunga. Sikontu tu Yehuda niengka' ngasengi mange ri butta pammelakkanga.”

²⁰Nakana Batara mae ri pandudu'na Yerusalem, “Parhatikangi! Nia'mi musu-musunnu battu wara'! Kemaeji sikamma tau eroka nula'langngi siagang sannaka nukalompoanna ri pa'mai'?

²¹Apa lanukana sallang punna sikamma tau nupare' aganga ambetako siagang angkoasaiko? Tantu lapa'risiki nusa'ring rapang baine eroka ammana'.

²²Gassingka akkuta'nangko angkana angngapa nabattu ngaseng anjo sikammaya antujuko, angngapa nanikae pakeannu siagang angngapa nanigau' bawangko. Parallui nuasseng angkanaya nakajariang anjo sikammaya lanri lompo duduna dosanu.

²³Maka akkullei tau le'lenga ampinrai kalenna, yareka macanga ampelaki ballanna? Tantu tena! Kammatommi anjo ikau biasaya a'gau' ja'dala', tena olonu lakkulle anggaukangi bajika.

²⁴LaKupasisa'la'-sa'lakko rapang awang niirika ri anging battua ri paranga.

²⁵Iaminjo sarennu le'baka Kupattantu, lanri nukaluppaingKu, siagang lanri tappa'nu mae ri rewata-rewata takontutojenga.

²⁶KalengKu angkaei pakeanga battu ri kalennu sollannu a'jari assolara' siagang a'jari siri'-siri'.

²⁷Le'ba'mi Kucini' nugaukang sikamma apa-apa tenaya naKungai. Kucini'mi nuondang rewata-rewata maraenga ri buluka siagang ri kokoa, rapang sitau bura'ne a'lingu-lingu ero' mae ri bainenna taua, yareka jarang laki balere' dudua mae ri jarang ganaya. He pandudu'na Yerusalem, cilaka mako! Angngapapi nulata'lappasa' battu ri sikontu kaja'dallanga?”