Read Makassar Version – KITTA' MATANGKASA YEREMIA 17 Bible Online

YEREMIA 17 - Makassar Version – KITTA' MATANGKASA bible

YEREMIA 17

¹Nakana Batara, “He bansa Yehuda, le'ba'mi ta'ukiri' dosanu ri atinnu siagang ri sikontu panyingkulu'na tampa'-tampa' pakkoro'bangngannu, niukirika siagang pena bassi battu ri intang.

²Sikamma taunnu assambayangi ri tampa'-tampa' pakkoro'bangnganga siagang benteng-benteng barhala le'baka nabangung untu' rewata niarenga Dewi Asyera ri tunggala' poko' kayu copponga, ri coppo'-coppo'na buluka,

³siagang ri sikamma moncong niaka ri pantaranganna kotaya. Lanri sikontu anjo tampa' panynyombang barhala le'baka nubangung ri sikontu pa'rasanganga siagang lanri sikontu dosa le'baka nugaukang, nalaKusuromo musu-musunnu angngengkaki sikontu pa'barang-barangannu siagang kakalumanynyangngannu.

⁴Latarpassai nupassareang tampa' le'baka Kupassareang mae ri kau, siagang laKupa'jariko ata mae ri musunnu ri pa'rasangang tena sikalia nuassengi. LaKugaukang ngasengi anjo sikammaya lanri allumpana larroKu rapang pepe' a'rinra tenaya nakkulle nibuno pepe'na.”

⁵Nakana Batara, “Punna nabokoiA' taua, Batarana, namanrannuang mae ri rupataua siagang tanjeng ri kagassinganna, laKuhukkungi anjo tau kammaya.

⁶Rapangi lamung-lamung attimboa ri parang, ri butta roso', sino siagang nia' ce'lana, tenaya nale'ba' nakasia' kabajikanga.

⁷Mingka tau manrannuanga ri Nakke latuli Kubarakkaki.

⁸ Ia rapangi poko' kayu ri biring binanga assolonga je'ne'na; a'la'baki aka'na sa'genna je'neka. Tena namalla' ri wattu timoro', tuli moncongbulona leko'na. Manna pole nituju pa'rasanganga ri kakalotorang, tena nalussa' lanri tuli nia'na rapponna.

⁹Atinna rupataua takkulleai nikira-kira kaminang cara'de' ri yangasenna niaka siagang sanna' sikalia garrinna.

¹⁰ INakke, Batara, ansalidiki atia, Kuso'ri pa'mai'na rupataua. Tunggala' taua laKubalasaki situru' panggaukanna siagang Kugauki situru' panggaukanna.”

¹¹Rapang jangang-jangang anggoppoki bayao teai bayaona, kammaminjo tau jekkonga anggappa pa'barang-barangngang. Ri attangnga umuru'na latappela' ngasengi barang-baranna. Ri kala'busang tallasa'na a'butti angkana ia tau dongo' sikali.

¹²Balla'Na Batara rapangi empoang karaeng kala'birang, ri moncong tinggia battu riolo.

¹³Batara, iKatte panrannuanna Israel, ummatTa; sikontu a'bokoa ri Katte la'jari siri'-siri' ngasengi. Lalanynyaki ke'nanga battu ri anne linoa nampa a'lampa mange ri linona tau matea. Nasaba', iKatte kabattuanna je'ne' katallassanga le'ba' maKi' nabokoi, o Batara.

¹⁴Batara, Kipammollea', nakua'jari akkamale. Pasalamakka', nakuakkulle salama'. IKatteji bawang Kupakala'biri'!

¹⁵Nakana taua ri nakke, “Kemae ngasenji anjo pa'garatta'Na Batara? Lappassammi Nagaukang kamma-kamma anne!”

¹⁶Mingka, o Batara, tale'bakaKi' kupassa untu' ampabattui balaya mae ri ke'nanga. Tena todong kuero' sollanna nituju ri kasusaang. Kiassengi anjo, Batara. Kiassengi apa kupaua.

¹⁷TeaKi' a'jari apa appakamalla' ri atingku. IKatte tampa' palariangku punna battu kasukkaranga.

¹⁸Poro Kipakasiriki siagang Kipa'jari mallaki sikamma tau angngondangia' siagang anjallakkangia'. Mingka teaKi' gaukangngi anjo kammaya mae ri nakke, o Batara. Kipabattui balaya mae ri ke'nanga sa'genna ancuru' taba sikali ke'nanga.

¹⁹Nakana Batara ri nakke, “Yeremia, a'lampako mange ri Pakke'bu' Lompo Ra'ya' naoloa sikamma karaeng Yehuda punna assulu' siagang antama' ri kotaya. A'lampa tongko mange ri sikontu pakke'bu' Lompo maraenga ri Yerusalem.

²⁰Pabattui pasangKu mae ri sikamma karaenga siagang sikontu tu Yehuda kammayatompa sikontu pandudu'na Yerusalem allaloa ri sikamma anjo pakke'buka.

²¹ Pabattui kamma anne: ‘Punna tena nuero' mate, teako angngangkaki barang punna allo Pammari-mariang, yareka nanuerang antama' allalo ri sikamma pakke'bu' lompona Yerusalem.

²² Teako anjamai yareka angngerangngi manna barang-barang apa mamo assulu' battu ri balla'nu ri allo Pammari-marianga. Sa'laki anjo alloa untu' iNakke sangkamma le'baka Kuparentakang mae ri boe-boenu.

²³Mingka boe-boenu taerokai mappilangngeri yareka amparhatikangi apa Kupaua mae ri ke'nanga. Kapala batui ke'nanga, siagang taerokai mannuruki yareka nipakainga'.

²⁴Turuki sikontu parentaKu. Teako angngangkaki manna barang-barang apa mamo allalo ri pakke'bu' lompona anne kotaya ri allo Pammari-marianga. Sa'laki allo Pammari-marianga untu' iNakke, siagang teako anjamai apa-apa mamo ri anjo alloa.

²⁵Punna attojeng-tojengko ampajappai anjo parenta-parentaKu, sikamma karaenga siagang sikamma pamarenta ammarentaya sangkamma Daud lantamaki ri sikamma pakke'bu' lompona kota Yerusalem. Ke'nanga siagang tu Yehuda kammayatompa pandudu'na Yerusalem, la'dongko' kareta jarangi, sa'genna a'jari suara' sikali kota Yerusalem.

²⁶Sikamma tau niaka battu ri kota-kota Yehuda, kammayatompa battu ri desa-desa niaka ri tammulilina Yerusalem; laniaki ke'nanga battu ri daera Benyamin, battu ri daera bangkeng buluka, battu ri daera monconga siagang battu ri daera Yehuda bageang timboro'. Langngerangi ke'nanga mange ri BallakKu iamintu olo'-olo' lanipare' koro'bang, baji' lanitunua kammayatompa tenaya, kammayatompa gandung passare, kamanynyang, siagang passare kasukkurang.

²⁷Yangasenna anjo lakajariangi punna mannurukiko mae ri Nakke siagang nusa'la' allo Pammari-marianga untu' iNakke. Teako angngangkaki barang-barang apa mamo allalo ri sikamma pakke'bu' lompona Yerusalem ri anjo alloa. Punna nudakkai anjo parenta-parentaKu, laKutunui pepe' sikamma pakke'bu'na Yerusalem siagang sikamma balla' karaenna sa'genna la'busu'; na anjo pepeka takkulleai nibuno.’ ”