Read Makassar Version – KITTA' MATANGKASA YEREMIA 18 Bible Online

YEREMIA 18 - Makassar Version – KITTA' MATANGKASA bible

YEREMIA 18

¹Nakana Batara ri nakke,

²angkana, “A'lampako mange ri balla'na papare' uringa; anjoreng laKupabattuangko pasangKu.”

³Jari a'lampama' mange ri balla'na papare' uringa na kuciniki sitabang anjama.

⁴Punna kurang baji' pare'na uringa, najama poleangi ammotere' a'jari uring maraeng situru' pare'na apa nakaerokia.

⁵Nampa Nasuroa' Batara ampabattui ri umma' Israel, angkana,

⁶“He ummakKu, maka latena nakkulle Kugaukang sangkamma anjo apa nagaukanga papare' uringa battu ri butta pi'na? Rapang butta pi' lalang ri limanna papare' uringa, kamma tommako anjo lalang limangKu.

⁷Punna ri se'reang wattu Kupattantui Kupasinta', Kuruntung siagang Kuancuru' se'rea bansa yareka kakaraengang,

⁸nampa toba' anjo bansaya battu ri dosana, laKupaonoki anjo pattujungKu.

⁹Kabalekanna, punna Kutappuki untu' ampaentengi yareka ampakajarreki se'rea bansa yareka kakaraengang,

¹⁰mingka ribokoanganna tena naero' mannuruki anjo bansaya ri Nakke nampa nagaukang ja'dalaka, laKupaonoki anjo pattujungko.”

¹¹Nakana Batara ri nakke, “Kamma-kamma anne, pabattui mae ri sikamma tu Yehuda siagang pandudu'na Yerusalem angkanaya kamma-kamma anne apparekKa' rancana untu' ambaliangi ke'nanga, siagang Kupasadiangi ke'nanga hukkungang. Suroi ke'nanga ampamari cara tallasa'na ke'nanga dorakaya kammayatompa napakabajiki panggaukanna ke'nanga.

¹²Mingka lappiali ke'nanga angkana, ‘Apa matu-matunna? Tuli lamannuruki ikambe ri ero' kalenna ikambe! Ikambe massing nagaukangi apa nakaerokia pa'mai'na ikambe ja'dalaka!’ ”

¹³Nakana Batara, “Pakkuta'nangngangi mae ri tunggala' bansaya, angkanaya apaka le'baki kajariang passala' kammaya anne? Le'ba'mi nagaukang umma' Israel apa appakaringi'-ringika!

¹⁴Tena le'bakai lanynya' bosi a'batua battu ri moncong batuna Libanon. Tena le'bakai je'ne' dinging a'lo'loroka ri pa'monconganga a'jari kalotoro'.

¹⁵Mingka ummakKu takkaluppami ri Nakke, nampa attunu dupa untu' barhalaya. Tatto'roi ke'nanga ri oloang mustia naolo ke'nanga riolo dudu, nampa ammengka ri oloang tenayapa nanilappari.

¹⁶Anne pa'rasanganga napa'jarimi ke'nanga tampa' appakaringi'-ringi', siagang tuli a'jari pa'rasangang nicau-cau. Sikontu tau allaloa ammenggong ngaseng ulunna lanri ringi'-ringi'na.

¹⁷Rapang limbu'bu' nairika anging, kammaminjo batena ummakKu laKupasiara' ri dallekanna musua. Punna battu cilakaya, laKubokoi ke'nanga siagang taeroKa' antulungi ke'nanga!”

¹⁸Nakana taua, “Umba kissikongkolo' angngewai Yeremia. Tena naiaja bawang akkulle a'bicara untu' Allata'ala. Tuli lania'na imang akkulle assare pangngajarang, nia' tucara'de' akkulle assare pappakainga'; siagang nia' na'bi akkulle ampabattui mae ri katte sikamma pasang battua ri Allata'ala. Umba nanituntuki ri pangadelanga nampa tenamo nanilangngereki kana-kananna.”

¹⁹Jari appala' doamma' angkana, “O Batara, Kipilangngeri pappalakku; Kiparhatikangi anjo apa napaua musungku ri passala'na kalengku!

²⁰Maka siratangi kabajikanga nibalasa' siagang kaja'dallang? Mingka le'ba'mi ke'nanga angngeke kali'bong sollanna kutu'guru' antama. Kiu'rangi angkanaya le'ba'mi ke'nanga kualle-alleang ri dallekanTa, sollanna tena Kilarro mae ri ke'nanga.

²¹Mingka kamma-kamma anne, Batara, lappassammi mate cipuru' ana'-ana'na ke'nanga yareka mate lalang pa'bundukang. Lappassammi tubai'-bainena ke'nanga tappela' bura'nenna siagang ana'na; lappassammi tubura'-bura'nea mate naalle garring siagang turungkana mate lalang pa'bundukang.

²²Suroi paellaka ti'ring battu ri balla'na ke'nanga, sa'genna ammurici' ke'nanga napakamma malla'. Le'ba'mi ke'nanga angngeke kali'bong sollanna kutu'guru' antama, siagang le'ba'mi ke'nanga attannang sikko' untu' anjakkalakka'.

²³Mingka iKatte, o Batara, Kiassengi sikontu apa narancanakanga ke'nanga untu' angngallei nyawaku. Lanri kammana anjo, teaKi' pammopporangngi ke'nanga; teaKi' lu'luki kasalanna ke'nanga. Kitunrungi ke'nanga sa'genna tu'guru'. Angngalle maKi' tindakang mae ri ke'nanga lanri larroTa.”