Read Makassar Version – KITTA' MATANGKASA YEREMIA 19 Bible Online

YEREMIA 19 - Makassar Version – KITTA' MATANGKASA bible

YEREMIA 19

¹Nasuroa' Batara a'lampa ammalli bongki, nampa kukio' siapa are pamimpinna bansaya siagang siapa are imang-imang toaya,

² untu' a'lampa siagang ke'nanga mange ri Ka'bung Lappara' Hinom allalo ri Pakke'bu' Lompo Beling. Anjoreng musti kupa'la'bangi kupabattu apa Napappasangnganga ri nakke.

³Musti akkana kamma' anne, “He sikamma karaenna Yehuda siagang pandudu'na Yerusalem! Pilangngeri eroka Kupau, iNakke Batara Kaminang Koasaya, Allata'alana Israel, angkanaya, lappabattuA' bala lompo mae ri anne tampaka, sa'genna ta'bangka tau allangngerekai.

⁴Kugaukangi anjo passalaka lanri anne bansaya nabokoiMa'. Narantassi anne tampaka lanri assarena koro'bang mae ri rewata-rewata tenaya naassengi ke'nanga, tenaya naassengi boe-boena ke'nanga siagang sikamma karaenna tu Yehuda. Nabonei tommi ke'nanga anne tampaka cera'na tau tenaya nasala.

⁵ Appaentengi ke'nanga tampa' pakkoro'bangngang untu' Rewata Baal, untu' ampassareangi ana'-ana'na ke'nanga a'jari koro'bang nitunu, padahala' tale'bakai Kusuro ke'nanga anggaukangi anjo kammaya, ba'lalo anjo kammaya tale'bakai ammumba lalang ri pikirangKu.

⁶Lanri kammana anjo, nia' sallang nanarapiki wattunna naanne tampaka tenamo naniarengi Tofet yareka Ka'bung Lappara' Hinom, passangalinna Ka'bung Lappara' Pammolongang.

⁷Ri anne tampaka laKupassalasai sikontu rancanana tu Yehuda siagang pandudu'na Yerusalem. LaKubalang parekangi ke'nanga nibeta ri musu-musunna siagang nibuno lalang ri pa'bundukanga. LaKubalang parekangi maya'na ke'nanga nikanre ri jangang-jangang siagang olo'-olo' sekke'.

⁸LaKupabattui bala lompoa ri anne kotaya sa'genna sikamma tau ammaloa anjoreng lata'bangkai siagang lamalla' ngasengi.

⁹Lanikurungi ri musu anne kotaya, siagang nausahakangi nabuno pandudu'na. Teai sipato' heba'na batena musua angkurungi, sa'genna sikamma tau niaka lalang ri anne kotaya lasikanre-kanrei para ia sipa'gangngang, ba'lalo ana' kalenna nakanre ngaseng.”

¹⁰Nampa Nasuroa' Batara anreppeki anjo bongkia ri dallekanna ngaseng anjo tau niaka amminawang ri nakke.

¹¹Musti kupauangi ke'nanga angkanaya akkana kammai anne Batara Kaminang Koasaya, “Anne bansaya siagang kotaya laKuancuruki sa'genna a'jari rapang bongki anjo reppeka tenayamo nakkulle nipakabaji' ammotere'. Lanitarawangi maya'-maya'na ke'nanga ri taua ri Tofet, lanri tenamo tampa' pa'jerakkang maraeng.

¹²Anne kotaya siagang pandudu'na laKupa'jari sangkamma Tofet.

¹³Sikontu balla' niaka ri Yerusalem siagang sikontu balla' karaenga ri Yehuda lanipa'jari rantasaki sangkamma Tofet; lanri irate ri tompo'na sikamma anjo ballaka le'ba'mi taua attunu dupa untu' rewata-rewata ri langi', siagang assare koro'bang anggoro' untu' rewata-rewata maraeng.”

¹⁴Nampa kubokoi Tofet, tampakku nisuro ampabattui pasanNa Batara. A'lampa' mange ri paranglakkeng Balla'Na Batara ammenteng anjoreng, nampa kupauang sikontu taua,

¹⁵angkanaya Batara Kaminang Koasaya, Allata'alana Israel, akkana kammai anne, “Lanri kapala batunu siagang taerokako mappilangngeri, laKupabattui sikontu balaya mae ri anne kotaya siagang sikontu desa niaka ri tammulilina, iamintu bala le'baka Kurancana.”