Read Makassar Version – KITTA' MATANGKASA YEREMIA 20 Bible Online

YEREMIA 20 - Makassar Version – KITTA' MATANGKASA bible

YEREMIA 20

¹Imang Pasyhur ana'na Imer kapala pangawasa' ri Balla'Na Batara. Ri wattu nalangngere'na kupa'la'bang kupau yangasenna anjo passalaka,

²naparentakammi sollangku nitunrung siagang niepong ri Pakke'bu' Lompo Benyamin, pakke'bu' lompo bageang ratena Balla'Na Batara.

³Bari'basa'na pole ammuko, ri le'bakku nilappassang nisikko' ri Pasyhur, kukanamo ri ia, “Areng Napassareanga Batara mae ri kau teai Pasyhur, mingka ‘Pammunoang ri kere-keremae.’

⁴KalenNa Batara angkana, ‘Lanipa'jariko pabuno-buno ri kalennu tonji siagang mae ri agang-agannu tonji. Lanuciniki ke'nanga nibuno ri musunna ke'nanga. Sikontu tu Yehuda laKubalang parekangi nikoasai ri karaeng Babel; sipa'gang battu ri ke'nanga lanaengkaki salaku tunitahang mange ri Babel, nampa la'binna nibunoi.

⁵LaKulappassangi musunna ke'nanga anrampasaki siagang angngengkaki mange ri Babel sikontu kakalumanynyangnganna siagang barang-baranna anne kotaya, ba'lalo barang-barang pisakana sikamma karaenna Yehuda.

⁶Siagang ikau, Pasyhur, siagang sikontu kaluarganu lanijakkala' tongko nampa niengkakko mange ri Babel. Anjorengko lamate siagang nitarawang; kammayatompa sikontu agannu le'baka allangngereki sikamma balle-ballenu.’ ”

⁷Batara, iKatte anynyonyokka' siagang inakke le'ba'ma' ninyonyo'. IKatte la'bi gassingKi' nainakke siagang le'ba'ma Kipadundu. Nicau-caua' ri tunggala' taua, nihina battu ri bari'basa' sa'genna karueng.

⁸Punna kua'bicara, musti ammarranga' sigassing-gassingku, angkana, “Kapallakkang! Bala!” O Batara, Nicau-caua' ri kere-kere wattu, lanri kupabattuna pasanTa.

⁹Mingka punna lalang atingku kukana, “Boli'mi kamma kukaluppai Batara, teama' a'bicara lalang arenNa,” rapammi pepe' pasanNa a'bara ilalang ri ati mailalangku. Le'baki kucoba amparrangngi, mingka ma'nassa tena nakukullei.

¹⁰A'bici'-biciki nilangngere' taua ri kere-keremae, angkana, “Battui mallaka a'la'bang! Umba nilaporoki mae ri pamarentaya!” Ba'lalo sikontu agang bajikku naminasai katu'gurangku. Nakana ke'nanga, “Gassingka lanri panynyonyoppa, nakkulle nibeta, sollanna nikkulle ambalasaki larro niboli'-bolitta ri ia.”

¹¹Mingka iKatte, o Batara, niakKi' angngentenganga'; iKatte tamaka gassinTa na Kikassa'. Anjo ke'nanga angngondangia' siagang anjallakkangia' latu'guruki natena pakkullena. Lasiri'-siriki ke'nanga satunggu-tungguna, salasai sikontu rancanana ke'nanga. Anjo tunana ke'nanga latuli niu'rangi.

¹²Mingka, o Batara Kaminang Koasaya, Kiso'ri rupataua siagang adele'; Kiassengi atinna siagang pikkiranna ke'nanga. Lanri kammana Kisare laloa' pangngellai ancinikKi' ambalasaki kaja'dallanna musua nasaba' kubuammi mae ri Katte parkaraku.

¹³Makkelongko mae ri Batara siagang pujimi nasaba' Ia allappassangi tau nijallakkanga battu ri koasana tau dorakaya.

¹⁴ Nitunrai allo kalassukangku! Boli'mi kamma na'jari tuna wattu nilassukangku ri ammakku.

¹⁵Nitunrai tongi tau angngeranga kabara' ampa'jari sannang duduai manggeku, ri wattunna nipau ri ia, angkana, “Anggappako sitau ana' bura'ne!”

¹⁶Boli'mi kamma anjo angngeranga kabara' a'jari sangkamma anjo kota-kota niancuruka tanikamaseang ri Batara. Boli'mi kamma allangngere' tau ammarrang napakamma pa'risi' ri wattu bari'basa', siagang sa'ra ammarrang ri pa'bundukang ri tangngana alloa.

¹⁷Nasaba' tena nanabunoa' ri wattungku nitianangngang ija, sollangku tuli nitianangngang ri ammakku siagang pammanakkanna a'jari jerakku.

¹⁸Angngapa kumusti nilassukang? Poro untu' pa'risi' siagang kasukkarang? Siagang sollanna allalo tallasakku lalang siri'-siri' bawang?