Read Makassar Version – KITTA' MATANGKASA YEREMIA 21 Bible Online

YEREMIA 21 - Makassar Version – KITTA' MATANGKASA bible

YEREMIA 21

¹Zedekia karaeng Yehuda nasuroi mae ri nakke Imang Pasyhur ana'na Malkia, siagang Imang Zefanya ana'na Maaseya. Nasuroi ke'nanga ampabattui mae ri nakke anne pappala'na angkana,

² “Appalakko pitunju' battu ri Batara untu' ikatte, nasaba' nikurummi kotata ri Nebukadnezar karaeng Babel siagang pasukanna. Gassingka lappa'niaki gau' malompo Batara untu' ikatte, na Napassa Nebukadnezar ampamonoki ammotere' pasukanna.”

³Nampa a'bicaramo Batara ri nakke, siagang kusuromi sikamma anjo tunisuroa

⁴ampabattui mae ri Karaeng Zedekia angkanaya Batara, Allata'alana Israel, akkana kammai anne, “Zedekia, laKubetai pasukannu a'bunduka angngewai karaeng Babel siagang pasukanna. Sikamma sanjatana tantaranu laKupa'gompoi ri tangnga-tangngana kotaya.

⁵KalengKu lambundukiko siagang kagassingangKu, lalang allumpana larroKu.

⁶Pandudu'na anne kotaya laKubunoi; baji' rupatau kammayatompa olo'-olo' lamate naallei garring lompo.

⁷Ikau siagang sikamma pagawenu kammayatompa sikamma tau ta'lappasaka battu ri pa'bundukanga, kacipurang siagang garring, yangasenna laKulappassangko najakkala' Karaeng Nebukadnezar siagang musu-musu eroka ambunoko. Lanabuno ngasengko Nebukadnezar, tena nalanapammopporangko siagang tena nalanakamaseangko. INakke, Batara, anne a'bicara.”

⁸Nampa Nasuroa' Batara akkana kamma anne ri umma'Na, “Pilangngeri! INakke, Batara, assareko kasampatang ampilei kalase'renna: oloang mangea ri katallassanga, yareka oloang mangea ri kamateanga.

⁹Tunggala' tau ammantanga ri kotaya lamatei lanri pa'bundukang, kacipurang, yareka lanri garring. Mingka tau assuluka manyara mae ri tu Babel angkurungai anne kotaya, lata'lappasaki siagang talanibunoai.

¹⁰Le'ba'mi Kupattantu angkana laKuancuruki anne kotaya, siagang tena naKupassayangi. Anne kotaya laKupassareangi mae ri karaeng Babel; lanatunui sa'genna cappu' taba sikali. INakke, Batara, anne akkana.”

¹¹Nasuroa' Batara ampabattui anne pasanga mae ri kaluargana karaeng Yehuda, jari-jarina Daud, angkana, “Pilangngeri anne iNakke, Batara, angkana. Usahai sollanna nipajappa kaadelanga allo-allona. Lappassangi tau nipaccoka battu ri kakoasanna tau papaccoka. Punna tena, anjo kaja'dallang nugaukanga lanapa'rinrai larroKu rapang pepe' a'rinra lompoa natakkullea nibuno pepe'na.”

¹³Nampa Nakana Batara mae ri Yerusalem, “He Yerusalem! La'bi tinggiangngangi pa'dongkokannu nasikamma ka'bung lappara' niaka ri tammulilinu. Sangkammako bulu' batu ammenteng tinggia' nai' ri parang lapparaka, mingka iNakke langngewako. Nukana kalennu angkana tena manna sitau akkulle ambundukiko yareka anrumbangi tembo'-tembo' pattahangannu,

¹⁴mingka iNakke langhukkungko lanri panggaukannu. Balla' karaennu laKutunui, kammayatompa yangaseng-ngasenna apa niaka ri tammulilina lanitunu tongi. INakke, Batara, anne akkana.”