Read Makassar Version – KITTA' MATANGKASA YEREMIA 24 Bible Online

YEREMIA 24 - Makassar Version – KITTA' MATANGKASA bible

YEREMIA 24

¹ Ri se'reang wattu, ri le'ba'namo Yoyakhin ana' bura'nena Yoyakim karaeng Yehuda siagang sikamma tau anna'galaka pamarentahang ri Yehuda, sikamma pajamaya, sikamma panrea, niengka' ri Nebukadnezar karaeng Babel, nampa nierang salaku tunitahang battu ri Yerusalem mange ri Babel, Nasarema' paccini' Batara. Nia' kucini' rua baku' rassi siagang rappo ara ta'dongko' ri dallekang Balla'Na Batara.

²Anjo baku' makase'rea rassi rappo ara baji'-bajika ngaseng, sangkamma rappo ara bungasaka; nampa anjo baku' makaruaya rassi rappo ara bottoka ngaseng, sa'genna takkullea nikanre.

³Nampa Nakana Batara ri nakke, “Yeremia, apa nucini'?” Appialia' angkana, “Rappo ara, Batara. Ia baji'-bajika sanna' baji'na, siagang ia bottoka sanna' botto'na sa'genna takkullea nikanre.”

⁴Jari Nakanamo pole Batara,

⁵“Sikamma anjo tau Kulappassanga niengka' mange ri Babel Kupasanrapangi anjo rappo ara baji'-bajika; lanri kammana anjo, iNakke, Batara, Allata'alana Israel, laKugaukangi bajika mae ri ke'nanga.

⁶LaKujagai ke'nanga siagang laKuerangi ke'nanga ammotere' mae anrinni ri pa'rasanganga. LaKupabangungi ke'nanga, tena naKuruntungi; laKulamungi, tena naKubi'buki ke'nanga.

⁷LaKusarei ke'nanga kaerokang untu' ampahangi angkanaya iNakkemi Batara. Na la'jarimo ke'nanga ummakKu, siagang iNakke a'jari Allata'alana ke'nanga, lanri lammotereki ke'nanga mae ri Nakke lalang sikontu pa'mai'na.

⁸Mingka Zedekia karaeng Yehuda, siagang sikamma pamarenta a'reppeseka ri ia, kammayatompa sesanna tu Yerusalem tuli ammantanga anrinni ri pa'rasanganga anne yareka a'letteka mange ri Mesir, yangasenna ke'nanga laKugauki sanrapang anne rappo ara bottoka ngaseng, tenaya nakkulle nikanre. INakke, Batara anne akkana.

⁹LaKupa'jari cilakai ke'nanga sa'genna sikontu bansaya ri sikontu linoa a'jari malla' ngasengi. Kemae-kemae ke'nanga Kupasiara', lanicau-caui ke'nanga, dipa'jari kakkallang siagang nicalla-calla. Arenna ke'nanga lanipakei a'jari pattunra.

¹⁰LaKupabattui mae ri ke'nanga pa'bundukanga, kacipuranga, siagang garringa sa'genna mate ngaseng ke'nanga siagang tenamo ammantang tassesa anrinni ri pa'rasangang le'baka Kupassareang mae ri ke'nanga siagang boe-boena ke'nanga.”