Read Makassar Version – KITTA' MATANGKASA YEREMIA 29 Bible Online

YEREMIA 29 - Makassar Version – KITTA' MATANGKASA bible

YEREMIA 29

¹ Annulisikka' sura' mae ri imang-imanga, na'bi-na'bia, pamimping-pamimping bansa attallasaka ija, kammayatompa mae ri sikontu tau maraengannaya, ia le'baka niengka' battu ri Yerusalem mange ri Babel ri Nebukadnezar.

²Anjo suraka kutulisiki ri le'ba'na niengka' Karaeng Yoyakhin, amma'na, pagawe-pagawe balla' karaenga, pagawe-pagawe pamarentahang Yehuda siagang Yerusalem, sikamma pajama-pajamaya, kammayatompa sikamma panrea, mange ri butta pammelakkanga.

³Kusuro erangi anjo suraka ri Elasa ana'na Safan, siagang Gemarya ana'na Hilkia ia nisuroa battu ri Zedekia karaeng Yehuda mange ri Nebukadnezar karaeng Babel. Anjo suraka kammai anne bonena,

⁴“Kammaminne kananNa Batara Kaminang Koasaya, Allata'alana Israel, mae ri sikontu tau Napelaka battu ri Yerusalem mange ri Babel:

⁵‘Ammantang mako antureng. Bangungi balla'nu. Apparekko koko siagang kasia'mi wassele'na.

⁶A'buntingko sollannu anggappa ana', siagang lappassammi a'bunting todong ana'-ana'nu sollanna angngappa todong ke'nanga ana'. Musti katambangi jainu, siagang takkulleai kurang.

⁷Anjamako untu' kasalewanganna kota-kota nupammantangngia Kupela'. Appala' doangko mae ri nakke untu' kaparalluanna anjo kota-kotaya, nasaba' punna akkallumanynyangi anjo kotaya, ikau pole akkalumanynyang tongko.

⁸INakke Batara Kaminang Koasaya, Allata'alana Israel, ampakaingakko sollanna tena nupassareangi kalennu nitipu ri na'bi-na'bi niaka ammantang ri tangnga-tangnganu yareka ri nai-nai mamo nakanaya kalenna akkullei ke'nanga natappu apa lakajarianga ri allo labattua. Teako parhatikangngi so'na-so'nana ke'nanga.

⁹Napakei ke'nanga arengKu untu' ancaritai mae ri kau apa-apa tenaya natojeng. Tena naKusuroi ke'nanga. INakke, Batara, anne akkana.’

¹⁰ Nakana Batara, ‘Punna ganna'mo wattua tujupulo taung untu' Babel, laKuparhatikangko pole ammotere', siagang laKurupai janjingKu untu' angngerangko ammotere' mae ri anne tampaka.

¹¹Sai iNakke KalengKu angngassengi rancana-rancanaKu mae ri kau ngaseng? Anjo rancana-rancanaya tena nalanaerangko mae ri kapanrakanga, mingka untu' kasalewangannu siagang untu' ansareko panrannuang baji' untu' allo nudallekanga.

¹²Jari lappala' tulungko mae ri Nakke. Labattuko mae ri Nakke appala' doang, nampa laKupiali pappala' doannu.

¹³ LanuboyA' nampa lanubuntulukKa', lanri attojeng-tojenna pa'mai'nu amboyA'.

¹⁴Tojeng, lanubuntulukKa'. LaKupasse'reko battu ri tangnga-tangngana tunggala' bansaya siagang battu ri pa'rasangang tampa'nu nipasisa'la'-sala' nipela'. LaKuerangko ammotere' mange ri pa'rasangang kabattuannu anne, siagang laKupakabajiki ammotere' katallassannu. INakke, Batara, anne akkana.’

¹⁵Turu' ri panggappanu, Nasaremako Batara na'bi-na'bi ri Babel.

¹⁶Pilangngeri apa kananNa Batara ri sesena karaeng ammarentaya kamma-kamma anne, iamintu karaeng jari-jarina Daud, siagang ri sesena pandudu'na anne kotaya, iamintu bija pammanakannu tenaya niengkaki mange ri butta pammelakkanga siagang ikau ngaseng.

¹⁷Nakana Batara Kaminang Koasaya, ‘INakke lappabattu pa'bundukang, kacipurang, siagang garring mae ri ke'nanga. LaKugauki ke'nanga sanrapang rappo-rappo ara sannaka botto'na, sa'genna takkullea nikanre.

¹⁸LaKuondang tojengi ke'nanga siagang pa'bundukang, kacipurang, siagang garring sa'genna sikontu bansaya ri sikontu linoa la'jari mallaki anciniki ke'nanga. Kemae-kemae Kupasisa'la'-sa'la' ke'nanga, anjorengi lamalla' siagang lannekkere' taua anciniki apa kajarianga mae ri ke'nanga. Lanicau-caui ke'nanga, siagang arenna ke'nanga lanipakei a'jari kana pattunra.

¹⁹Yangasenna anjo kammaya kajariangi mae ri ke'nanga, lanri tena naturuki pasangKu tenaya ammari-marina Kupabattu mae ri ke'nanga tete ri atangKu na'bi-na'bia. Taerokai ke'nanga amparhatikangi anjo pasangKu.

²⁰Na ikau ngaseng Kupelaka mange ri Babel, pilangngeri anne kanangKu, Batara.’

²¹Batara Kaminang Koasaya, Allata'alana Israel, le'ba'mi a'bicara ri sesena Ahab, ana' bura'nena Kolaya, siagang ri sesena Zedekia ana' bura'nena Maaseya ia ampakei arenNa Batara untu' ampabattui mae ri kau apa-apa tenaya natojeng. Napaui Batara angkanaya laNapassareangi ke'nanga mae ri kakoasanna Nebukadnezar karaeng Babel, lambunoai ke'nanga ri dallekanna matannu.

²²Napunna anjo sikamma tau le'bakamo niengka' battu ri Yerusalem mange ri Babel eroki natunra taua, angkanai ke'nanga, ‘Poro Nagaukang lalo Batara mae ri kau sangkamma le'baka Nagaukang mae ri Zedekia siagang Ahab, le'baka nitunu attallasa' ri karaeng Babel.’

²³Kammami anjo sarenna ke'nanga, lanri le'ba'na nagaukang dosa-dosa lompoa ri Israel, iamintu: a'gau' bawangi ke'nanga, siagang napakei arenNa Batara untu' ancaritai apa-apa tenaya natojeng. Anjo kammaya sisalai siagang ero'Na Batara. Naassengi apa nagaukanga ke'nanga, siagang ia KalenNa a'jari sa'bi angngewai ke'nanga. Kammami anjo le'baka Nakana Batara.”

²⁴Batara Kaminang Koasaya, Allata'alana Israel, Nasarea' pasang untu' mae ri Semaya, tu Nehelam, lanri le'baki Semaya akkiring sura' lalang areng kalenna mae ri sikontu pandudu'na Yerusalem, mae ri Imang Zefanya ana'na Maaseya, siagang mae ri sikontu imang maraenga. Lalang ri anjo sura'na Semaya nakana mae ri Zefanya,

²⁶“Le'ba' mako Naangka' Batara a'jari imang ansambeangi Yoyada, siagang kamma-kamma anne ikaumi kaminang tinggia empoannu ri Balla'Na Batara. Ia tugasa'nu iamintu amparentakangi sollanna sikamma tau pongoroka, nakanaya kalenna na'bi, nisikkoki rante bassi kallonna.

²⁷Mingka angngapa natena nungngalle tindakang mae ri Yeremia anjo tu Anatot ia ampanggaukang na'bia ri tangnga-tangngana bansata?

²⁸Anjo taua musti nitongkoki bawana, nasaba' napaui mae ri sikamma taunta ri Babel angkanaya lasallo iji ke'nanga lammantang anjoreng. Na lanri kammana anjo, nakana, musti ambangungi ke'nanga balla' siagang appareki ke'nanga koko nampa nakasia' wassele'na.”

²⁹Anjo suraka nabacakanga' Imang Zefanya.

³⁰Lanri kammana anjo Nasuroma' Batara

³¹akkiring kabara' ri passala'na Semaya mae ri sikontu Israel nipelaka ri Babel. Iaminne anjo kabaraka, “Anjo Semaya a'bicarai mae ri kau sanrapang angkanaya na'bi kalenna; padahala' iNakke, Batara, tena naKusuroi. Lanri napa'jari tappa' mako mae ri kana balle-ballea,

³²siagang lanri nasuro mako ambaliangA', jari laKuhukkungi siagang jari-jarina. Tena manna sitau battu ri ke'nanga lammantang ri tangnga-tangngana ikambe untu' anciniki apa-apa baji' Kugaukanga mae ri sikontu ummakKu. INakke, Batara, anne akkana.”