Read Makassar Version – KITTA' MATANGKASA YEREMIA 30 Bible Online

YEREMIA 30 - Makassar Version – KITTA' MATANGKASA bible

YEREMIA 30

¹Batara, iamintu Allata'alana Israel,

²Nakana ri nakke, “Tulisiki lalang ri se'rea kitta' sikontu apa le'baka Kupau mae ri kau.

³Nasaba' lanarapiki sallang wattunna nalaKupa'jari baji' ammotere' katallassanna ummakKu Israel siagang Yehuda. LaKuerangi ammotere' ke'nanga mange ri pa'rasangang le'baka Kupassareang mae ri boe-boena ke'nanga. Anjo pa'rasanganga lanapatangi ammotere' ke'nanga. INakke, Batara, anne akkana.”

⁴Nakana Batara ri umma' Israel siagang Yehuda,

⁵“Kulangngere'mi pakkio'na tau annekkereka, pakkio'na tau mallaka tenaya naamang nasa'ring.

⁶Coba sai pikkiri' siagang salidiki! Maka akkullei tu bura'nea allassukang ana' lolo? Punna kamma, angngapa Kucini' tunggala' bura'nea pi'lasa' tanja'na anjallakkangi battanna siagang limanna rapang baine eroka ammana'?

⁷Battumi allo sannaka heba'na, allo tenaya sangkammanna. Untu' ummakKu, anjo alloa appakalussaki; mingka laKupasalamaki ke'nanga.”

⁸Nakana pole Batara Kaminang Koasaya ri umma'Na, “Punna battu sallang anjo alloa, laKutepoki anjo lembarang Kupatabaya ri salanggannu, siagang Kulappassangi passikko'nu. Tenamo nula'jari ata pole mae ri bansa maraenga.

⁹La'jari atako mae ri Nakke, Karaeng Allata'alanu, siagang mae ri se'rea jari-jarina Daud ia laKuangkaka a'jari karaeng.

¹⁰ UmmakKu Israel, teako mallakki! AtangKu Yakub, teako annekkereki! Ikau siagang jari-jarinu laKupasalamakko battu ri pa'rasangang bella, tampa'nu nipela'. Lammoterekko siagang lammantangko ri pa'rasangannu siagang amang. Lasannangko lalang tallasa'nu; tena parallu nukamallakkang.

¹¹LabattuA' siagang laKupasalamakko. Bansa-bansa ri tampa'nu Kupela' Kupasisa'la'-sa'la' laKupanraki ngasengi, mingka ikau tena naKupakammako. Memang tena nulata'lappasa' battu ri hukkungang mingka hukkungangKu adeleki situru' katantuang. INakke, Batara, anne akkana.”

¹²Nakana Batara ri umma'Na: “Garrinnu teai sipato' sanna'na, untu' loko'nu tena pa'ballena.

¹³Tena manna sitau ero' angngusahai sollannu ammolle battu ri garrinnu, tena pa'balle untu' lattannu, tena panrannuannu la'jari baji'.

¹⁴Sikontu tumangngainu takkaluppami ri kau; taerokami ampikkiriki kalennu. Kamma musu le'baka a'bakka na nahukkungko siagang palla', lanri jaina dosanu siagang lompona kasalannu.

¹⁵Tea' mako akkunrarengi pole ri passala'na bokka'-bokka'nu, nasaba' tena panrannuang ri kau untu' lakkulle ammolle. Kuhukkung kammako anjo lanri jaina dosanu siagang lompona kasalannu.

¹⁶Mingka kamma-kamma anne sikontu angnga'lukako lania'lu' tongi, siagang sikontu musunnu laniengkaki mange ri butta pammelakkang. LaKujallakkangi tau anjallakkangako, laKuellaki tau angngellakako.

¹⁷Manna pole nakana musunnu, ‘Sion le'ba'mi nipela', siagang taenamo amparhatikangi,’ mingka laKupa'jari bajikko ammotere', siagang laKuballei bokka'-bokka'nu.”

¹⁸Nakana pole Batara: “Ikau, ummakKu laKukamaseangko siagang laKupakabajiki ammotere' katallassannu ri butta passolongang cera' kalennu. Lanibangungi ammotere' Yerusalem, siagang lanipakabajiki balla' karaenna.

¹⁹Pandudu'na lanapujiA' siagang kelong-kelong, siagang akkio' a'rannu-rannu pa'mai'. LaKupa'jari ke'nanga nipakalompo siagang tenamo nanihinai, siagang jaina ke'nanga pila' laKutambai.

²⁰Bansanu laKupa'jari porei sangkamma riolo, siagang ammenteng ammotere' salaku ummakKu. Sikontu anjallakkangai laKuhukkung tongi.

²¹Karaeng ammarentaya ri kau tau battu tonji ri bansanu. Bebasaki ke'nanga a'reppese' ri Nakke punna Kukio' andallekang ri Nakke. Nasaba' inaika barani andallekang ri Nakke ri ero' kalenna? La'jariko ummakKu siagang iNakke a'jari Allata'alanu. INakke, Batara, akkana kamma anjo.”

²³PangngalarroinNa Batara rapangi anging lompo, rapangi anging barubu a'jalloka antujui tau ja'dalaka, siagang tena nalammari punna tenapa na'jari rancanaNa. Ribokoang allo lanapahangi umma'Na anjo passalaka.