Read Makassar Version – KITTA' MATANGKASA YEREMIA 32 Bible Online

YEREMIA 32 - Makassar Version – KITTA' MATANGKASA bible

YEREMIA 32

¹ Ri taung makasampulo pammarentahanna Zedekia karaeng Yehuda, iamintu ri taung makasampulona assagantuju pamarentahanna Nebukadnezar karaeng Babel, a'bicarai Batara ri nakke.

²Anjo wattua tantarana karaeng Babel nabunduki Yerusalem. Nitahanga' ri parang lakkenna balla' karaenga

³ri Karaeng Zedekia lanri nitudua' le'ba' ampa'la'bangi kupau angkanaya akkana kammai anne Batara, “LaKupa'biangi karaeng Babel ambetai siagang angngempoi anne kotaya,

⁴kammayatompa Karaeng Zedekia tena nalata'lappasa'. Lanipassareangi mae ri karaeng Babel, nampa andallekang ri anjo karaenga kammayatompa a'bicara kalenna siagang ia.

⁵Nampa laniengka' Zedekia mange ri Babel siagang ammantang anjoreng sa'genna Kuhukkung. Manna pole nanabunduki tu Babel, mingka tena nakkulle lambetai. INakke, Batara, anne akkana.”

⁶Napaui Batara ri nakke

⁷angkanaya Hanameel, ana' bura'nena purinangku Salum, labattui napala' sollanna kuballi tampa'na ri Anatot ri daera Benyamin. Nasaba' inakkemi bijanna kaminang a'reppeseka akkullea amballi anjo tampaka.

⁸Nampa kamma le'ba' Napaua Batara, battumi Hanameel mae ri nakke ri parang lakkenna balla' karaenga, siagang napala' sollanna kuballi tampa'na. Lanri kammana, tappa' tojemma' angkanaya le'ba' tojemmi a'bicara Batara ri nakke.

⁹Jari kuballimi anjo tampaka battu ri Hanameel, sampulo antuju doe' pera' ballinna. Akkio'ma' siapa are sa'bi, siagang ri dallekanna ke'nanga kutekemmi sura' pammallina, nampa kusare segele' siagang kutimbangi doe'na.

¹⁰

¹¹Nampa kualle anjo sura' pammallia le'baka nisare segele' siagang niaka tattulisi' sara'-sara' kammayatompa katantuang-katantuang nipareka. Kualle tommi salinanna sura' pammalli tenaya nammake segele',

¹²nampa kupassareang anjo ruaya sura' mae ri Barukh ana'na Neria cucunna Mahseya. Kupassareangi anjo ri dallekanna Hanameel kammayatompa sa'bi-sa'bi le'baka antekengi anjo sura'-suraka, siagang ri dallekanna sikamma tau niaka ammempo anjoreng ri paranglakkenga.

¹³Ri dallekanna ngaseng ke'nanga kukana ri Barukh,

¹⁴“Batara Kaminang Koasaya, iamintu Allata'alana Israel, amparentakangi sollanna nualle anne ruaya sura', baji' naaslina kammayatompa salinanna, nampa nupantama' ri se'reang uring niposileoka semeng sollanna attahang sallo.

¹⁵Batara Kaminang Koasaya, iamintu Allata'alana Israel, Nakana angkanaya, balla', tampa', siagang koko anggoro' lanipare' balukangi sallang.”

¹⁶Le'baki kupassareang anjo sura'-sura' pammallia mae ri Barukh, appala' doamma', kukana,

¹⁷“O Batara Kaminang Tinggia, iKattemi ampa'jari langika siagang buttaya lanri koasa siagang kagassingang lompoTa. Tena apa-apa sukkara' mae ri Katte.

¹⁸Kipappicinikangi pangngamaseang satunggu-tungguTa mae ri assa'bu-sa'bua tau, mingka Kihukkung tongi taua lanri dosana tau toana. IKattemi Allata'ala mala'birika siagang porea; arenTa iamintu Batara Kaminang Koasaya.

¹⁹Hebaki rancana-rancanaTa, siagang appakalannasaki sikontu panggaukanTa; Kiciniki sikontu apa nagaukanga rupataua, siagang Kibalasaki ke'nanga situru' panggaukanna ke'nanga.

²⁰Riolo dudu iKatte anggaukangi gau' appakalannasaka siagang apa-apa tenaya nantama ri akkala'na rupataua ri Mesir, siagang sa'genna pole kamma-kamma anne tuli Kigaukanna, baji' naritangnga-tangngana tu Israel kammayatompa ri tangnga-tangngana sikontu bansa maraenga. Lanri kammanami anjo NaKimasahoro' ri kere-keremae.

²¹Lanri koasa siagang kagassingang lompoTa Kierangi umma' Israel assulu' battu ri Mesir. Kigaukangi gau'-gau' appakalannasaka siagang gau'-gau' malompoa appakagegereka ri musu-musua.

²²Pa'rasangang bajika siagang copponga Kipassareang mae ri ke'nanga sangkamma le'baka Kipa'janjiang mae ri boe-boena ke'nanga.

²³Mingka ri wattunna battu ke'nanga mae anrinni ri pa'rasanganga siagang naempoi, tenamo namannuruki ke'nanga ri parenta-parentaTa, kammayatompa taerokai attallasa' situru' ajarang-ajaranTa. Sikontu apa Kiparentakanga mae ri ke'nanga tena manna se're nagaukang ke'nanga. Lanri kammana anjo naKipabattumo sikontu anne balaya mae ri ke'nanga.

²⁴Le'ba'mi nabangung tu Babel tembo'-tembo' angkurungai attammulili kotaya untu' angngallei, na kamma-kamma anne a'bakkami ke'nanga. Pa'bundukang, kacipurang, siagang garring la'jari saba' ri anne kotaya natu'guru' mae ri limanna musua. Kiciniki angkanaya sikontu apa Kipaua a'rupa ngasemmi.

²⁵Mingka manna nakamma mamo, o Batara Kaminang Tinggia, iKatte ansuroa' amballi anne tampaka ri dallekanna sa'bi-sa'bia, manna nasinampe' mamo nanialle anne kotaya ri tu Babel.”

²⁶Nampa Nakana Batara ri nakke,

²⁷“INakkemi Batara, Allata'alana sikontu rupataua. Tena apa-apa sukkara' mae ri Nakke.

²⁸ Anne kotaya laKulappassangi nikoasai ri Nebukadnezar karaeng Babel siagang pasukanna. Lanaallei ke'nanga anne kotaya,

²⁹siagang lanatunui sa'genna la'busu' siagang ngaseng sikamma balla' napammantangngia tau ampakallarroA', lanri iratemi ri pattongko'na sikamma anjo ballaka attunu ke'nanga dupa untu' Rewata Baal, kammayatompa appatiri' anggoro' untu' napassareang mae ri rewata-rewataya.

³⁰Appakkaramula ri riwaya'na ke'nanga, iamintu tu Israel siagang tu Yehuda tena napakasannangi pa'maikKu. Napanaiki larroKu lanri ri panggaukang-panggaukang ja'dala'na ke'nanga.

³¹Appakkaramula ri wattu nibangunna anne kotaya, napakanassu duduMa' pandudu'na. Le'ba'mi Kupattantu untu' laKupanraki ke'nanga,

³²lanri sikontu kaja'dallang nagaukanga tu Yehuda siagang Yerusalem, sikamma karaenga, pagawe pamarentaya, imanga, siagang na'bi-na'bina ke'nanga.

³³NabokoiMa' ke'nanga siagang manna pole tuli Kuajara' ke'nanga mingka tuli tenana naero' mappilangngeri siagang tena naero' angngu'rangi.

³⁴ Ba'lalo balla' nibangunga untu' tampa' anynyomba ri Nakke le'ba' tommi nara'massi ke'nanga lanri naboli'na anjo barhala-barhala appakaringi'-ringi'na ke'nanga anjoreng ri tampaka.

³⁵ Ambangungi ke'nanga tampa'-tampa' pakkoro'bangngang untu' Rewata Baal ri Ka'bung Lappara' Hinom, nampa napassareang ana'-ana'na ke'nanga a'jari koro'bang mae ri Rewata Molokh. Padahala', tale'bakai Kusuro ke'nanga anggaukangi anjo kammaya, ba'lalo tale'bakai ammumba lalang ri pikkirangKu angkanaya lanagaukangi ke'nanga anjo panggaukang appakaringi'-ringi' kammaya siagang napa'jari dorakai tu Yehuda.”

³⁶Batara, Allata'alana Israel, Nakana ri nakke, “Yeremia, nakana bansa Israel lanri pa'bundukang, kacipurang siagang garring natu'guru' anne kotaya mae ri limanna karaeng Babel. Kamma-kamma anne pilangngeri tongi apa laKupaua.

³⁷LaKupasse'rei anne bansaya battu ri sikontu pa'rasangang tampa'na ke'nanga Kupasisa'la'-sa'la' lanri larroKu siagang lussakKu mae ri ke'nanga. LaKuerangi ke'nanga ammotere' mae anrinni siagang Kukellai ammantang anrinni siagang amang.

³⁸La'jari ke'nanga ummakKu, siagang iNakke la'jari Allata'alana ke'nanga.

³⁹LaKusarei ke'nanga poro se're bawang oloang mange ri katallassanga: iamintu, napakalompoA' satunggu-tungguna; anjo kammaya langngerangi kabajikang mae ri kalenna ke'nanga, siagang mae ri jari-jarina.

⁴⁰LapparekKa' parjanjiang mannannungang siagang ke'nanga. Tena Kulammari a'gau' baji' mae ri ke'nanga. LaKupa'jari mallaki ke'nanga siagang mappakalompoi ri Nakke lalang sikontu nyawana sollanna tena nabella ke'nanga ri Nakke.

⁴¹Lasannangi pa'maikKu a'gau' baji' mae ri ke'nanga, naKupammantang ke'nanga anrinni ri anne pa'rasanganga sa'genna satunggu-tungguna.

⁴²Antekamma bateKu le'ba' appabattu bala mae ri anne bansaya, kammatommi anjo laKusarei ke'nanga sikontu apa baji' le'baka Kupa'janjiang mae ri ke'nanga.

⁴³Nakana taua anne pa'rasanganga a'jarimi sangkamma parang luara' tenaya nipammantangngi ri tau siagang olo'-olo', siagang anne pa'rasanganga tu'guru'mi antama ri limanna tu Babel. Mingka iNakke Kukana, sallang sikamma koko-kokoa lanipareki pole balu'-balukang ri anne pa'rasanganga;

⁴⁴sura' pammallina lanitekengi, nisarei segele', siagang nitekengi ri sa'bi-sa'bi. Anjo kammaya lakajariangi ri daerana Benyamin, ri desa-desa tammulilina Yerusalem, ri kota-kota Yehuda, ri kota-kota ri daera monconga, ri daera bangkeng buluka, siagang ri Yehuda bageang timboro'. Anne bansaya laKupakabajiki ammotere' katallassanna ri anne pa'rasanganga. INakke, Batara, anne akkana.”