Read Makassar Version – KITTA' MATANGKASA YEREMIA 33 Bible Online

YEREMIA 33 - Makassar Version – KITTA' MATANGKASA bible

YEREMIA 33

¹Ri wattungku nitahang ija ri paranglakkenga, anggappa' pasang maraeng battu ri Batara,

²ampa'jariai buttaya siagang amparekai kammayatompa ampadongkokai ri tampa'na. Nakana,

³“Akkiokko mae ri Nakke, na Kulappiali; laKupauangko apa-apa ga'gaya siagang appakalannasaka, ia tenayapa nanuassengi.

⁴Balla' karaenna Yehuda siagang sikamma ballaka ri kota Yerusalem le'baki nibongkara' untu' ampakajarreki pattahangnganga mae ri pakkurunna siagang pammuccu'na musua. Mingka iNakke, Batara, Allata'alana Israel, Kukana,

⁵tena matu-matunna angngewai tu Babel, nasaba' anjo kammaya poro lanapakajaiji maya'na tau Kubunoa lanri larroKu siagang lussakKu mae ri ke'nanga. TaerokaMa' anciniki pole anne kotaya, lanri sikamma taunna nagaukangi kaja'dallanga.

⁶Mingka sallang laKupakabajiki ammotere' anne kotaya siagang pandudu'na; lakassaki ammotere' ke'nanga. LaKusarei ke'nanga kasalewangang siagang kaamangngang alla'bia.

⁷Yehuda siagang Israel laKupa'jari porei sangkamma riolo siagang lammentengi ammotere' salaku ummakKu.

⁸LaKutangkasi ke'nanga battu ri dosa-dosana, ia le'baka nagaukang ke'nanga mae ri Nakke; laKupammopporangi dosa-dosana siagang kadorakanna ke'nanga.

⁹Yerusalem la'jari karannuangKu siagang kalompoanna nyawaKu. Sikontu bansaya ri lino la'jari mallaki siagang annekkereki kammayatompa lappakalompoi ri Nakke, punna nalangngereki passala'na kabajikang Kugaukanga untu' pandudu'na Yerusalem, siagang kakalumanynyangngang Kupassareanga mae ri anjo kotaya.”

¹⁰Nakana Batara, “Nakana taua anne tampaka sangkammai parang lompo, tena tau siagang olo'-olo' ammantang anjoreng. Anjo kananna ke'nanga memang annabai, nasaba' kota-kotana Yehuda siagang agang-aganga ri Yerusalem kosong ngasemmi; tena tau yareka olo'-olo' ammantang anjoreng.

¹¹ Mingka anjoreng ri tampaka lania' pole kalangngerang sa'ra karannuang siagang kalompoang pa'mai' kammayatompa sa'ra passua'-suarrang pa'gaukang pa'buntingang. Lania' todong kalangngerang kelong-kelong tau angngerang koro'bang kasukkurang mange ri BallakKu. Lanakana ke'nanga, ‘Appala' sukkurukko mae ri Batara Kaminang Koasaya, lanri Ia bajiki siagang pangngamaseanNa sa'genna satunggu-tungguna.’ Anne pa'rasanganga laKupa'jari kalumanynyangi sangkamma riolo. INakke, Batara, anne akkana.”

¹²Nakana Batara Kaminang Koasaya, “Anne pa'rasangang siagang kota-kotana sangkammaya parang lompo, tena nipammantangngi ri tau yareka olo'-olo'. Mingka manna nakamma, ri bokoangallo lania' ammotere' parang-parang ruku' tampa'na taua akkalawaki gimbala'.

¹³Ri kota-kota ri daera monconga, ri bangkeng buluka, daera Yehuda bageang timboro', siagang ri daerana Benyamin, ri desa-desa niaka ri tammulilina Yerusalem, kammayatompa ri kota-kota Yehuda, lanabilangi ammotere' gimbala'na sikamma pakalawakia. INakke, Batara, anne akkana.”

¹⁴ Nakana Batara, “Lanarapiki sallang wattunna naKurupai janji le'baka Kupare' siagang Israel siagang Yehuda.

¹⁵Ri anjo wattua nia' se're tau adele' battu ri jari-jarina Daud laKupile a'jari karaeng. Anjo karaenga lanagaukangi apa adeleka ri sikontu pa'rasanganga.

¹⁶Tu Yehuda siagang pandudu'na Yerusalem lanipasalamaki siagang laamangi lalang tallasa'na. Kota Yerusalem laniarengi ‘Batara Tumappasalamatta’.

¹⁷ INakke, Batara, a'janji angkanaya tuli lania' sitau battu ri jari-jarina Daud a'jari karaeng ri Israel;

¹⁸ tuli lania' imang-imang battu ri suku Lewi allayaniA' siagang assare ri Nakke koro'bang olo'-olo', gandung, siagang passare nitunua.”

¹⁹Nakana Batara ri nakke,

²⁰“Le'ba'Ma' anynyikko' parjanjiang siagang alloa na bangngia, sollanna anjo alloa siagang bangngia tuli battui punna narapiki wattunna; anjo parjanjianga takkulleai nipela'.

²¹Kammatommi anjo le'ba' tommA' anynyikko' parjanjiang siagang atangKu Daud, angkanaya battu ri jari-jarina tuli lania' tassitau a'jari karaeng; siagang le'ba'Ma' anynyikko' parjanjiang siagang imang-imang jari-jarina Lewi angkanaya ia ke'nanga tuli lallayaniA'. Anjo parjanjiang-parjanjianga takkulleai nikaluppai.

²²LaKutambai jari-jarina atangKu Daud siagang imang-imang suku Lewi, sa'genna anjo ke'nanga a'jari rapangi kassi' ri biring tamparanga jaina siagang bintoenga ri langika tenaya nakkulle nirekeng jaina.”

²³Nakana Batara ri nakke,

²⁴“Le'ba'mi nuparhatikang apa napaua taua mae ri tu Israel siagang tu Yehuda? Nakana ke'nanga angkanaya Kupela'mi anjo ruaya bansa le'baka Kupile. Iaminjo saba'na nanacini' tuna ummakKu, tenamo nabilangi salaku se're bansa.

²⁵Mingka sangkamma bateKu, iNakke, Batara, le'ba' appare' parjanjiang siagang alloa na bangngia, siagang appare' paratorang untu' angngatoroki langika siagang buttaya,

²⁶kammatommi anjo latuli Kuta'galaki parjanjiangKu siagang jari-jarina Yakub, siagang atangKu Daud. Nia' sitau battu ri jari-jarina Daud laKupile untu' ammarenta ri jari-jarina Abraham, Ishak, siagang Yakub. LamangngamaseangA' mae ri ummakKu, siagang Kupa'jari kalumanynyangi ammotere' ke'nanga.”