Read Makassar Version – KITTA' MATANGKASA YEREMIA 34 Bible Online

YEREMIA 34 - Makassar Version – KITTA' MATANGKASA bible

YEREMIA 34

¹ Ri wattunna Nebukadnezar karaeng Babel siagang pasukanna nibantua ri pasukang-pasukang battu ri sikontua bansa siagang bansa tunduka irawanganna, battumi ambunduki Yerusalem siagang kota-kota niaka ri tammulilina, a'bicarami Batara mae ri nakke.

²Nasuroa' a'lampa mange ri Zedekia karaeng Yehuda, nampa akkana kamma anne, “INakke, Karaeng Allata'alana Israel, laKupassareangi anne kotaya mae ri karaeng Babel siagang lanatunui.

³Tena nukkulle lata'lappasa', mingka lanijakkalakko siagang lanipassareangko mae ri ia. Lassigappako siagang la'bicarako kalennu siagang ia, nampa la'lampako mange ri Babel.

⁴Mingka pilangngeri anne kanangKu ri passala'na kalennu, Zedekia! Tena nulamate lalang pa'bundukang,

⁵passangalinna lamateko siagang sannang. Siagang antekamma batena ra'yaka attunu kamanynyang ri wattunna natarawang Daud boenu ammarentaya rioloangannu, kammatommi anjo ra'yaka lattunui kamanynyang untu' ikau. Lasusai ke'nanga lanri kamateannu nanakana, ‘Kodong! Tenami karaenna ikambe!’ INakke, Batara, anne akkana.”

⁶Jari kupabattumi anjo pasanNa Batara mae ri Karaeng Zedekia ri Yerusalem,

⁷ri wattunna sitabang pasukanna karaeng Babel nia' battu ambunduki anjo kotaya. Nabunduki tongi ke'nanga kota Lakhis siagang Aseka, ruaya kota ammakea pattahangngang, attahanga ija ri Yehuda.

⁸Karaeng Zedekia siagang pandudu'na Yerusalem appareki parjanjiang untu' ampakabebasaki

⁹sikamma ata-ata tu Ibrani niaka ri ke'nanga, baji' nabura'ne kammayatompa bainea sollanna tenamo manna sitau battu ri bansa Israel ampare' atai julu bansana.

¹⁰Sikontu ra'yaka siagang sikamma pagawe pamarentaya le'baki appare' parjanjiang untu' ampakabebasaki massing atanna ke'nanga siagang tenamo napare' atai ke'nanga, angkanaya lanalappassang tojeng-tojengi ke'nanga.

¹¹Mingka ri bokoang allo amminrai pikkiranna ke'nanga, nampa naalle ammotere' anjo ata-ataya, siagang napassai ke'nanga a'jari ata ammotere'.

¹²Jari Batara, iamintu Allata'alana Israel, Nasuroa' akkana kamma anne mae ri sikamma anjo taua, “Ri wattunna Kuerang boe-boenu assulu' battu ri Mesir siagang Kupakabebasa' ke'nanga battu ri nipare' ataya, le'ba'Ma' appare' parjanjiang siagang ke'nanga.

¹⁴ Kukana, sikontu ata tu Ibrani le'bakamo allayani annang taung sallona, musti nipakabebasaki ri kala'busanna taung makatujua. Mingka taerokai boe-boenu amparhatikangi yareka ampilangngeri anjo apa Kupaua.

¹⁵Siapa are allo allaloa nupinrai gau'nu nampa nugaukang apa Kungaia. Situju ngasengko untu' ampakabebasaki sikamma ata julu bansanu, siagang apparekko parjanjiang siagang iNakke ri BallakKu.

¹⁶Sikamma pagawe pamarentahanna Yehuda siagang Yerusalem kammayatompa sikamma pagawe balla' karaenga, imang-imanga siagang sikontu pajaga tampa'nu le'ba'mi nuassai anjo parjanjianga lanri ammolong sapi, iamintu nupolong ruai, nampa a'jappako ri alla'na anjo ruang bageang polonganga. Mingka, ribokoanganna amminrai pikkirannu siagang nupakatunA'. Anjo sikamma ata le'baka nulappassang situru' nakaerokia ke'nanga, nuallei ammotere' siagang nupassai ammotere' a'jari atannu. Lanri kammana anjo, iNakke, Batara, Kukana angkanaya nudakkaimi parentaKu, siagang tena nuturuki sara'-sara'na, lanri tenana nanupakabesaki julu bansanu Israel. Jari, kamma-kamma anne, baji'mi naiNakke assareko kabebasang: kabebasang untu' mate lalang pa'bundukang yareka lanri garring, yareka lanri kacipurang. LaKugaukangi mae ri kau sangkamma nugaukanga mae ri sapi nupolonga anjo. LaKupa'jari sannaki malla'na sikontu bansaya ri lino anciniki apa Kugaukanga mae ri kau.

²⁰LaKupassareangko mae ri musu eroka ambunoko. Maya'nu lanikanrei ri jangang-jangang yareka olo'-olo' sekkeka.

²¹Zedekia karaeng Yehuda siagang sikamma pagawe pamarentahanna laKupassareangi mae ri sikamma tau eroka ambunoi ke'nanga. LaKupassareangi ke'nanga mae ri tantarana Babel, ia ambokoia mako ri kamma-kammaya anne.

²²LaKusuroi ke'nanga sollanna ammotere' mae ri anne kotaya, nampa nabunduki, nabeta, siagang natunui. Kota-kota Yehuda laKupa'jari sangkamma parang lompo tenaya nipammantangngi ri tau. INakke, Batara, anne akkana.”