Read Makassar Version – KITTA' MATANGKASA YEREMIA 37 Bible Online

YEREMIA 37 - Makassar Version – KITTA' MATANGKASA bible

YEREMIA 37

¹ Ri wattunna Nebukadnezar karaeng Babel napecaki Yoyakhin ana'na Yoyakim, naangkaki Zedekia ana'na Yosia a'jari karaeng Yehuda.

²Mingka baji' Zedekia kammayatompa sikamma pagawena siagang sikontu ra'ya'na tena naturuki pasanNa Batara tete ri nakke.

³Karaeng Zedekia nakiringi Yukhal ana'na Selemya, siagang Imang Zefanya ana'na Maaseya untu' battu ampalaki ri nakke sollanna kuappala' doang mae ri Karaeng Allata'ala untu' kasalamakkanna bansaya.

⁴Anjo wattua tenapa nanipantamakka' ri tarungkua siagang bebasa' ija' a'gio' ri tangnga-tangngana ra'yaka.

⁵Tantarana Babel anjo wattua nakurungi Yerusalem, mingka ri wattunna nalangngere' ke'nanga angkanaya a'jappami tantara Mesir battu ri Mesir untu' a'bundu', ammunduru'mi ke'nanga.

⁶Batara, iamintu Allata'alana Israel, Nasuroa'

⁷akkana kamma anne mae ri tunasuroa Zedekia: “Pauangi Zedekia kamma anne, ‘Niaki tantara Mesir a'jappa mae anrinni untu' ambantuko, mingka la'gilingi nampa ammotere'.

⁸Nampa lammotere' tu Babel na nabuccu' anne kotaya, nampa nabeta siagang natunu.

⁹INakke, Batara, ampakaingakko, sollanna tena nanutipu kalennu lanri nupikkiri'na angkanaya a'lampami tu Babel siagang tenamo nalammotere'. Nasaba' ma'nassa lammotereki ke'nanga.

¹⁰Ebara' angkana nubetai sikontu tantarana Babel sa'genna ia ammantanga iamami sannaka loko'na lalang ri kema-kemana ke'nanga, mingka lambangungi ke'nanga nampa natunu anne kotaya sa'genna la'busu'.’ ”

¹¹Tantarana Babel ammunduruki battu ri Yerusalem lanri a'gio'na tantara Mesir mange ri anjo kotaya.

¹²Jari inakke kubokoimi Yerusalem nampa a'lampa mange ri daerana Benyamin untu' antarimai bageang warisikku battu butta pisaka kaluargaku.

¹³Mingka ri wattungku battu mange ri Pakke'bu' Lompo Benyamin, komandang tantara tugasaka anjoreng natahanga' nampa nakana, “Erokko lari a'limbang mange ri tu Babel!” (Anjo komandang tantaraya niarengi Yeria, ana'na Selemya, cucunna Hananya).

¹⁴Appialima' angkana, “Tena! Tena nakuero' lari mange a'limbang ri musua.” Mingka taerokai Yeria ampilangngeria'. Najakkala'ma' nampa naeranga' mange andallekang ri sikamma pagawe pamarentaya.

¹⁵Sanna' larrona ke'nanga ri nakke, siagang naparentakammi ke'nanga sollangku niba'ji nampa nikurung ri balla'na Yonatan, juru tulisi'na pamarentaya. Anjo ballaka nipa'jarimi balla' tarungku.

¹⁶Nipantamakka' ri se'reang kollang irawa butta, nakusallo nitahang anjoreng.

¹⁷Nampa Karaeng Zedekia nasuroi taua angngeranga' mange andallekang ri ia ri balla' karaenga. Anjoreng akkuta'nang cokko-cokkomi ri nakke angkana apaka nia' pasang battu ri Batara. Appialima' angkana, “Nia'.” Nampa kupauang pole angkana, “Lanipassareangki' mae ri karaeng Babel.”

¹⁸Le'baki anjo akkuta'namma' angkana, “Apa kaja'dallangku mae ri katte karaeng yareka mae ri pagaweta, yareka mae ri ra'yaka, sa'genna kipantama' ri balla' tarungkua karaeng?

¹⁹Kemae anjo sikamma na'bita le'baka angkana tena nalabattu karaeng Babel ambundukiki' karaeng siagang anne pa'rasanganga?

²⁰Kamma-kamma anne, karaeng nipakala'birikku, kipilangngeri laloi anne pappalakku. Tea' laloki kiringia' ammotere' mange ri balla' tarungku niaka ri balla'na Yonatan, gassingka matea' sallang anjoreng.”

²¹Jari naparentakammi Karaeng Zedekia sollangku nitarungku ri bageang paranglakkenna balla' karaenga. Jari ammantamma' anjoreng; allo-alloku nisare roti battu ri tampa' papparekang rotia, sa'genna la'busu' ngaseng parsadiaang rotia ri anjo kotaya.