Read Makassar Version – KITTA' MATANGKASA YEREMIA 38 Bible Online

YEREMIA 38 - Makassar Version – KITTA' MATANGKASA bible

YEREMIA 38

¹Nasuroa' Batara ampabattui anne pasanga mae ri ra'yaka angkana, “Anne kotaya laKupassareangi mae ri tantara Babel, siagang lanibetai ri ke'nanga. Inai-nai ammantang lalang ri kotaya lamatei lalang pa'bundukang, yareka lanri kacipurang yareka lanri garring. Mingka inai-nai assulu' nampa napassareang kalenna mae ri tu Babel, tena nalanibunoi; lasalamaki nyawana.” Sefaca ana'na Matan, Gedalya ana'na Pasyhur, Yukhal ana'na Selemya, siagang Pasyhur ana'na Malkia nalangngere' ngasengi ke'nanga anjo sikontu apa kupaua.

⁴Jari a'lampami anjo sikamma pagawea mae ri karaenga nampa angkana, “Anne taua musti nihukkung matei. Nasaba', lanri akkana kammana napanaungi sumanga'na sikontu tantaraya siagang tau maraenga ammantanga ri anne kotaya. Tena natulungi ra'yaka, passangalinna nacilakai ke'nanga.”

⁵Appialimi Karaeng Zedekia nakana, “Baji'mi! Gaukammi mae ri ia situru' ero'nu, tena kukkulle ampisangkaiko.”

⁶Nampa naallea' ke'nanga siagang napanaunga' siagang otere' antama' ri bungunna Malkia ana' bura'nena karaenga, niaka lalang ri paranglakkenna balla' karaenga. Tena je'ne'na anjo bungunga, poro peo'ji bawang lalang; nakuantama'mo ri peoka anjo.

⁷Anjo wattua nia' sitau tu Sudan anjama ri balla' karaenga. Arenna iamintu Ebed-Melekh. Nalangngereki angkanaya nipantamakka' ri anjo bungunga. Ri wattunna karaenga sitabangi ammimping rapa' ri Pakke'bu' Lompo Benyamin,

⁸a'lampami Ebed-Melekh mange anjoreng na nakana ri karaenga,

⁹“O Karaeng Mala'birikku, anjo panggaukanna ngaseng taua tena nabaji'. Napantamaki ke'nanga Na'bi Yeremia ri bungunga; ma'nassa lamate cipuruki sallang lalang, nasaba' la'busu'mi kanrea ri anne kotaya.”

¹⁰Nampa nakanamo karaenga ri Ebed-Melekh, “Angngerangko tau tallu nampa nupasulu' Yeremia battu ri anjo bungunga lalang tenanapa namate.”

¹¹Jari a'lampami Ebed-Melekh siagang anjo tau tallua mange ri gudanna balla' karaenga, angngalle kaeng-kaeng toa anjoreng, nampa napanaung siagang otere' mae ri nakke lalang bungunga.

¹²Nasuroa' Ebed-Melekh ampantamaki anjo kaeng-kaenga ri epaku untu' a'jari pa'ganjala', sollanna tena napa'risia' anjo otereka. Nakuturukimo anjo parentana Ebed-Melekh.

¹³Nampa nabesokka' ke'nanga nai' assulu' ri anjo bungunga. Le'baki anjo, anjoremma' ri paranglakkenna balla' karaenga nitahang.

¹⁴Ri se'reang wattu maraeng, Karaeng Zedekia nasuroi taua angngeranga' mange andallekang ri ia ri pakke'bu' lompo makatalluna Balla'Na Batara. Nakana ri nakke, “Erokka' akkuta'nang ri kau, siagang musti nupiali silambusu'na. Teako niakki apa-apa nucokko.”

¹⁵Appialima' angkana, “Punna kupau kontutojenga, ma'nassa lakihukkung matea' karaeng; siagang punna kusareki' pappakainga', tena nakiero' anturuki anjo pappakaingaka karaeng.”

¹⁶A'janji cokko-cokkomi Karaeng Zedekia ri nakke, nakana, “Lanri arenNa Allata'ala mattallasaka, iamintu Allata'ala assareaki' tallasa', assumpa' angkanaya tena nalaKubunoko yareka tena naKupassareangko mae ri tau eroka ambunoko.”

¹⁷Jari kupaumi mae ri Zedekia angkanaya Batara Kaminang Koasaya, Allata'ala nisombaya ri tu Israel, akkana kammai anne, “Punna manyarako mae ri pagawe-pagawena karaeng Babel, tena nulanibuno, siagang anne kotaya tena todong nalanitunui. Ikau siagang kaluarganu lasalamakko.

¹⁸Mingka punna taerokako manyara, anne kotaya latu'guruki antama' ri limanna tu Babel. Lanatunui ke'nanga sa'genna la'busu', siagang manna ikau tena todong nulata'lappasa'.”

¹⁹Appialimi karaenga angkana, “Mallakka' mae ri tau bansata lariamo a'limbang mae ri tu Babel. Gassingka napassareanga' mae ri ke'nanga nampa nisessa'.”

²⁰Appialima' angkana, “Tena! Tena nalanipassareangki' mae ri ke'nanga karaeng. Kupala' dudui mae ri katte sollanna kituruki pasanNa Batara; yangasenna sallang la'jappa bajiki, siagang tena kilanibuno karaeng.

²¹Mingka punna teaki' ampassareangi kalenta karaeng, le'ba'mi Nappappicinikang Batara apa lakajarianga.

²²Lalang ri anjo paccinikku, kuciniki sikontu baine niaka ija ri balla' lompoa ri Yehuda nire'resangi assulu' mange ri pagawe-pagawena karaeng Babel. Lalang a'jappana ke'nanga nakana, ‘Nipattolo-toloangi karaenga ri agang-agang baji'na, nampa nikoasai ri ke'nanga. Kamma-kamma anne ta'loposo'namo bangkenna antama' ri peoka, ammunduru' ngasemmi ke'nanga.’ ”

²³Kukana pole, “Sikontu ana'na siagang bainenna karaenga lanierangi mange ri tu Babel. Manna kalenna karaenga tena todong nalakkulle ta'lappasa' battu ri ke'nanga. Lanijakkalaki karaenga ri karaeng Babel, siagang anne kotaya lanitunui sa'genna la'busu'.”

²⁴Nampa nakana Zedekia, “Teako pauangngi manna pole inai ri passala'na anne passibicaranta, sollanna tena nalalang bahaya nyawanu.

²⁵Punna nalangngere' sikamma pagawea angkanaya le'baka' a'bicara siagang ikau, labattui ke'nanga mae ri kau nakkuta'nang ri passala'na passibicaranta. La'janji ke'nanga angkanaya talanabunoako, punna nucarita ngaseng mae ri ke'nanga.

²⁶Pau mami angkanaya nunyonyoka' sollanna tena kukiringko ammotere' mange ri tarungkua nampa mate anjoreng.”

²⁷Tasalloai ri le'ba'na anjo, battumi sikontu pagawea nampa akkuta'nanga tojeng ri nakke. Kupaumi mae ri ke'nanga sangkamma le'baka naparentakang karaenga ri nakke. Lanri kammana anjo tenamo apa-apa akkulle nagaukang ke'nanga lanri tena manna sitau akkulle angngassengi passibicaranna karaenga siagang inakke.

²⁸ Tulusu' nitahangku ri paranglakkenna balla' karaenga sa'genna narapi' allonna nialle Yerusalem ri musua.