Read Makassar Version – KITTA' MATANGKASA YEREMIA 39 Bible Online

YEREMIA 39 - Makassar Version – KITTA' MATANGKASA bible

YEREMIA 39

¹Ri bulang sampulo ri taung makasalapang ri pamarentahanna Zedekia karaeng Yehuda, Nebukadnezar karaeng Babel siagang sikontu tantarana battumi siagang nabundukimi Yerusalem.

²Ri tanggala' salapang bulang appa' taung makasampulo asse're pamarentahanna Zedekia, niruntummi tembo' kotaya ri musu,

³na niallemo Yerusalem. Battumi sikamma pagawena karaeng Babel nampa a'lampa mange ammempo ri Pakke'bu' Lompo Tangngaya. Ri alla'na ke'nanga niaki Nergal-Sarezer, Samgar Nebo, Sarsekim kapala ruma tanggana balla' karaenga, Nergal-Sarezer Rabmag siagang perwira-perwira tantara maraenga.

⁴Ri wattunna Karaeng Zedekia siagang sikontu tantarana naciniki anjo sikontu apa kajarianga, ero'mi ke'nanga lari mange ri Lappara'na Yordan ia memang anjo bangngia. Anjorengi ke'nanga ri koko balla' karaenga angngalle oloang, nampa assulu' battu ri pakke'bu' lompo ampasisambungai ruaya tembo' ri anjo tampaka.

⁵Mingka niondangi ke'nanga ri tantara Babel nampa najakkala' Zedekia ri lappara'na Yerikho. Nampa nierang Karaeng Zedekia mae ri Karaeng Nebukadnezar ri kota Ribla ri daera Hamat, nampa nitappuki hukkungang mate.

⁶Anjoreng tommi ri kotaya nibuno sikamma ana'na ri dallekanna, siagang sikontu pagawena nibuno ngaseng todong.

⁷Le'baki anjo nikocci'mi assulu' matanna Zedekia, nampa nisikko' na nierang mange ri Babel.

⁸Lalang kammana anjo tu Babel natunumi balla' karaenga sikamma balla'na ngaseng ra'yaka, kammayatompa naruntungi tembo'-tembo' kalli'na Yerusalem.

⁹Kala'busanna ra'ya' niaka ija ammantang ri kotaya, siagang sikamma tau le'baka lari a'limbang ri tu Babel, niengka'mi mange ri Babel ri Nebuzaradan, komandang pasukang lompona Babel.

¹⁰Sipa'gang ra'ya' kaminang kasi-asia siagang tenaya barang-baranna, nibokoi ri Yehuda siagang nisarei koko anggoro' siagang koko maraenga.

¹¹Karaeng Nebukadnezar le'baki nasuro Nebuzaradan, iamintu komandang pasukanna, appasulu' parenta kammaya anne.

¹²“A'lampako amboyai Yeremia, siagang jagai baji'-baji'. Teako apa-apai; gaukangi apa nakaerokia.”

¹³Jari Nebuzaradan siagang rua perwira tinggina, iamintu Nebusyazban siagang Nergal-Sarezer kammayatompa sikontu perwira tantara Babel maraenga,

¹⁴naallema' battu ri paranglakkenna balla' karaenga. Nampa napassareanga' ri Gedalya ana'na Ahikam, cucunna Safan, ia mustia angngantarakka' ammotere' siagang salama'. Jari ammantamma' ri alla'na ra'yaka.

¹⁵Ri wattungku nitarungku ija ri paranglakkenna balla' karaenga, Nasuroa' Batara,

¹⁶ampauangi Ebed-Melekh anjo tu Sudanga, angkanaya Batara Kaminang Koasaya, iamintu Allata'alana Israel, akkana kammai anne, “Kamma Kupaua riolo, laKupabattui balaya mae ri anne kotaya, siagang teai kakalumanynyangngang. Lanuciniki anjo passala' kammaya kajariang.

¹⁷Mingka iNakke, Batara laKula'langngiko. Tena nalaKupassareangko mae ri tau nukamallakkanga.

¹⁸Tena nulanibuno, lanri laKupasalamakko. Lasalamaki nyawanu lanri tanjengko mae ri Nakke. INakke Batara, anne akkana.”