Read Makassar Version – KITTA' MATANGKASA YEREMIA 4 Bible Online

YEREMIA 4 - Makassar Version – KITTA' MATANGKASA bible

YEREMIA 4

¹Nakana Batara, “He umma' Israel, punna erokko ammotere', ammotere' mako mae ri Nakke. Pelaki rolong anjo barhala-barhala Kukabirissia, nampa majarre' mako mae ri Nakke.

²Punna assumpako lanri arengKu siagang lambusukko nuadele' siagang tojeng lalang tallasa'nu, lanapalaki sikontu bansaya sollanna Kubarakkaki ke'nanga, kammayatompa lamammuji ke'nanga mae ri Nakke.”

³ Nakana Batara mae ri pandudu'na Yehuda siagang Yerusalem, “Jamai buttanu tenayapa nujamai; teako appakioroki bine ri tampa' napattimboia poko'-poko' akkatinting.

⁴Ta'gala' jarreki janjinnu siagang iNakke, Batara, siagang sa'laki kalennu untu' iNakke, he pandudu' Yehuda siagang Yerusalem. Punna tena, lallumpai larroKu siagang la'rinrai rapang pepe' tenaya nakkulle nibuno manna pole ri nai. Yangasenna anjo kammaya lanatujuko lanri panggaukang-panggaukang ja'dala'nu.”

⁵Tuiki tarompe'nu ri sikontu pa'rasangang! Bajiki batenu akkio' siagang lompoi. Suroi lari pandudu' Yehuda siagang Yerusalem mange ri kota-kota niaka tembo' pattahanganna.

⁶Picinikiangi oloang mangea ri Sion, bulu'Na Batara, a'liliko linta', teako ammantangngi a'mereki. Appabattui Batara bala siagang kaancurang lompo battu wara'.

⁷Rapang singa assuluka battu ri paccokkoanna kamma tomminjo a'lampami pammanrakia ri bansa-bansa battua ero' ampanraki Yehuda. Laruntungi Yehuda a'jari kamma loro tampa' tenaya napammantangngi tau.

⁸Lanri kammana, angngarru' siagang appiraung mako, ammake mako kaeng karung tanra susanu. Lanri a'rinra-rinrana larroNa Batara tenapa nammono' battu ri Yehuda.

⁹Nakana Batara, “Ri anjo alloa sikamma karaenga siagang sikamma pamarentaya latappela'mi sumanga'na; sikamma imanga lannekkereki siagang sikamma na'bi-na'bia lata'bangkai.”

¹⁰Nampa kukanamo, “O Batara Kaminang Tinggia, Kiballe-balleimi tu Yehuda siagang pandudu'na Yerusalem! Kikana angkana lania' kaamangngang, nampa kamma-kamma anne nyawana ikambe niancangi ri pa'dang.”

¹¹Lania' wattunna sallang anjo tu Yehuda siagang pandudu'na Yerusalem anggappai kabara' angkanaya ammiriki anging bambanga battu ri paranga tattuju mae ri ke'nanga. Anjo anginga teai anging biasa, anri'bakanga bawang awang,

¹²passangalinna anging lompo battua lanri parenta KalenNa Batara, untu' ampitujui hukkungang umma'Na.

¹³Ciniki, ammumbami musua sanrapang rammang. Kareta-kareta pa'bundu'na rapangi anging barubu, jarang-jaranna gassingangngangi larina najangang-jangang rajawali. Cilaka maki'! Panra' maki'!

¹⁴Yerusalem, pelaki kaja'dallanga battu ri atinnu sollannu nipasalama'. Siapapi sallona anjo pikkirang-pikkirang ja'dalaka lanuboli' ri atinnu?

¹⁵Appakkaramula battu ri kota Dan, kammayatompa battu ri pa'moncongang Efraim, battumi sikamma tunisuroa angngerang kabara' kodi.

¹⁶Napakaingaki ke'nanga bansa-bansaya siagang napabattuangi pandudu'na Yerusalem angkanaya nia'mi battu bella mae musua. La'gora-gorai ke'nanga ero' ambunduki kota-kota Yehuda

¹⁷siagang lanatammulili Yerusalem rapang tau akkammika koko. Nakajariang ngaseng anjo sikammaya lanri tu Yehuda nabaliangi Batara. Le'ba'mi a'bicara Batara.

¹⁸Yehuda, kalennu tonji ampabattui anjo balaya mae ri kalennu. Batenu attallasa' siagang sikamma panggaukannu a'jari passabakkang mae ri sikontu anjo passessa ampa'rissiai atinnu.

¹⁹Tamaka sessana atingku, takutahangngami pa'risika. Takukulleami ampakasanannangi kalengku annenrengi nyawaku ri barambangku, lanri kulangngere'na sa'ra tarompeka, siagang gora assa'raya ero' a'bundu'.

²⁰Ma'mole-molei battu balaya angngancuruki sikontu pa'rasanganga. Ti'ring nipanraki kemaku, nikae-kaei kaenna.

²¹Siapapi sallona lakucini' tau a'bunduka sipaccappu'? Siapapi sallona lakulangngere' sa'ra tarompe' appakatongoloka?

²²Nakana Batara, “tolo sikali anjo ummakKu, tamangngassengai ke'nanga ri Nakke. Rapanji ke'nanga ana'-ana' tenaya namappilangngeri tenaya pammahanna manna sike'de'; cara'deki ri kaja'dallanga, tena apa-apa nakulle ri kabajikanga.”

²³Accinika' mae ri buttaya, kosongi naroso' nicini', acconga' nai' ri langi', angngapa natena apa-apa accaya.

²⁴Kuciniki monconga siagang bulu'-bulu' tinggia teai sipato' batena ta'goccang.

²⁵Tena kucini' rupatau, manna jangang-janganga anri'ba' ngasemmi.

²⁶Butta copponga a'jari parang kalotoro'mi, ancuru'mi kotaya tassimbung-simbung, lanri tamaka larroNa Batara mae ri umma'Na. (

²⁷Napaui Batara angkanaya sikontu linoa la'jari parang lompoi, mingka tena nalaNapanraki taba sikali.)

²⁸Lasusai buttaya, sassang makkapuki langika. Le'ba'mi akkana Batara siagang talaNapinrayami rancanaNa. Le'ba'mi Napattantu Natappuki talammonokai manna sike'de'.

²⁹Nilangngere'mi sa'ra jaina pasukang a'jaranga siagang angngeranga pana, nasiposoimo taua ri palaria. Romanga napantamakki ke'nanga, bulu' batua naambi'. Sikontu kotaya a'jari sino ngaseng, tenamo tau ero' ammantang anjoreng.

³⁰He Yerusalem, nibokoi mako na tena apa-apa akkulle nugaukang! Untu' apa nummake baju eja nanubelo-beloi kalennu siagang bulaeng na pera', kammayatompa numodei matannu siagang paccalla'? Tena matu-matunna numodei kalennu, nasaba' sikamma tanrinnu taerokami mae ri kau, ba'lalo ero'mi ke'nanga angngallei nyawanu.

³¹Allangngereka' sa'ra kunrareng rapang baine eroka ammana'; rapang baine lolo allassukanga ana' bungasa', kammaminjo karru'na Yerusalem siagang sukkara'na a'mai'. Akkaeng-kaengi limanna nakkunrareng, angkana, “Bala kugappa — lanibunoa' ri musua!”