Read Makassar Version – KITTA' MATANGKASA YEREMIA 41 Bible Online

YEREMIA 41 - Makassar Version – KITTA' MATANGKASA bible

YEREMIA 41

¹ Ri bulang tuju anjo taunga, Ismael ana'na Netanya cucunna Elisama a'lampai siagang sampulo tau mange ri Mizpa untu' assibuntulu' siagang Gedalya. (Ismael iamintu sitau bija karaeng, kalase'renna perwira tinggia ri kakaraenganga.) Lalang sipangnganreang ngasenna ke'nanga,

²Ismael siagang anjo sampuloa tau nabi'bu'mi pa'danna ke'nanga nampa nabuno Gedalya, anjo guburnur niangkaka ri tu Babel.

³Nabuno tongi Ismael sikontu tu Yehuda niaka naagang Gedalya ri Mizpa, siagang sikontu tantara Babel sitabanga nia' anjoreng.

⁴Allo ammukona, ri tenanapa naassengi taua angkana nibunoi Gedalya,

⁵nia'mo tau sagantujupulo battu ri Sikhem, Silo, siagang Samaria. Le'baki nacukkuru' janggo'na ke'nanga, nakae-kae pakeanna, siagang nakere'-kere' kalenna ke'nanga. Angngerangi ke'nanga gandung siagang kamanynyang untu' napassareang ri Balla'Na Batara.

⁶Jari assulu'mi Ismael battu ri Mizpa nampa a'lampa angngagangi ke'nanga sibuntulu'. Angngarru'mi nampa nakana, “Umba ki'lampa anciniki Gedalya.”

⁷Tena nasallo battuna ke'nanga ri tangnga-tangnga kotaya, appakkaramulami Ismael siagang sikamma taunna ambunoi ke'nanga. Mingka nia' sampulo battu ri ke'nanga angkana ri Ismael, “Teaki' bunoi ikambe! Nia' ija ruang rupa gandunna ikambe, kammayatompa minynya' zaitun, siagang je'ne' bani. Yangaseng anjo nacokkoi ikambe ri pantaranganna kotaya.” Lanri kammana anjo tenamo nabunoi Ismael ke'nanga, mingka maraenganga nabuno ngasengi nampa napasambila maya'na antama' ri bungunga.

⁹Anjo bungunga iamintu bungung lompo napare' Karaeng Asa ri wattunna nibunduki ri Baesa karaeng Israel.

¹⁰Nampa najakkala' Ismael sikamma ana' bainena karaenga siagang sikontu tau niaka ija ri Mizpa le'baka napassareang Nebuzaradan mae ri Gedalya untu' najagai. Natahangi Ismael ke'nanga nampa a'lampa naerang ke'nanga mange ri daerana Amon.

¹¹Yohanan ana'na Kareah siagang sikontu perwira naaganga nalangngereki kabara'na anjo kaja'dallang nagaukanga Ismael.

¹²Jari ke'nanga siagang ana' buana ke'nanga a'lampai angngondangi Ismael, nampa nagappa ri kollang lompo Gibeon.

¹³Nacini'na Yohanan siagang anjo perwira-perwirana nia' battu, teaimi sipato' rannuna anjo sikamma tau natahanga Ismael,

¹⁴nampa a'giling siagang lari mange ri rombonganna Yohanan.

¹⁵Mingka Ismael siagang sagantujua ana' buana ta'lappasaki, nampa lari mange ri pa'rasangang Amon.

¹⁶Nampa napasse're Yohanan siagang perwira-perwirana sikamma tantaraya, bai'-bainea, ana'-anaka, siagang sikamma pagawe balla' karaenga nitahanga ri Ismael ri wattunna le'ba' nabuno Gedalya.

¹⁷A'jari malla' ngasemmi ke'nanga mae ri tu Babel, lanri Ismael le'baki nabuno Gedalya ia niangkaka ri karaeng Babel a'jari guburnur ri anjo pa'rasanganga. Jari larimi ke'nanga mange ri Mesir. Ri tangngana pa'jappanna ke'nanga, ammantangi ri Kimham ri ampi'na Betlehem.