Read Makassar Version – KITTA' MATANGKASA YEREMIA 43 Bible Online

YEREMIA 43 - Makassar Version – KITTA' MATANGKASA bible

YEREMIA 43

¹PasanNa Batara, iamintu Allata'alana Israel, ia mustia kupabattu mae ri ra'yaka, le'ba' ngasemmi kupabattu.

²Nampa Azarya ana'na Hosaya siagang Yohanan ana'na Kareah kammayatompa sikontu tau maraeng tampoa ngaseng, nakana ri nakke, “A'balle-balleko. Tena Nasuroko Karaeng Allata'alana ikambe ampisangkai ikambe untu' a'lampa mange ammantang ri Mesir.

³Barukh ana'na Neria angkompa salako untu' ambaliangi ikambe, sollanna nanikoasai ikambe ri tu Babel siagang akkulle nabuno yareka naengka' ikambe mange ri Babel.”

⁴Baji' Yohanan kammayatompa sikontu perwiraya siagang ra'yaka taerokai anturuki parentaNa Batara untu' ammantang ri Yehuda.

⁵ Yohanan siagang anjo sikontu perwiraya naerangi mange ri Mesir sikamma tau niaka ija ri Yehuda, kammayatompa sikontu tau niakamo ammotere' battu ri pa'rasangang maraeng, tampa'na ke'nanga tassiara'.

⁶Bura'ne, baine, ana'-ana', siagang ana'-ana' tulolonna karaenga ia nipassareanga ri Nebuzaradan mae ri Gedalya untu' nijagai, kammayatompa inakke siagang Barukh, nierang ngaseng maki' mange ri Mesir.

⁷Naewai ke'nanga parentaNa Batara, siagang a'lampa maki' mange ri Mesir sa'genna nirapi' kota Tahpanhes bellana.

⁸Anjoreng Nakanamo Batara ri nakke,

⁹“Angngalleko batu-batu lompo, siagang lamungangi lalang ri buttaya ri dallekang pakke'bu' antamaya ri bangunang pamarentana anjo kotaya. Usahakangi sollanna nacinikko tu Yehuda anggaukangi anjo kammaya.

¹⁰Nampa nupau mae ri ke'nanga angkana iNakke, Batara Kaminang Koasaya, iamintu Allata'alana Israel, laKupabattui atangKu Nebukadnezar karaeng Babel, mae anrinni ri tampaka. Siagang anjoreng ri rateanna batu-batu Kulamunga lalang ri anjo buttaya, lanapaentengi empoang kakaraenganna siagang napaka'rang kema kakaraenganna.

¹¹Labattui Nebukadnezar siagang lanabetai Mesir. Siagang sikamma tau le'baka nipattantu lamate lanri garring, lamatei lanri garring. Tau le'baka nipattantu laniengka' salaku tau nitahang, laniengkaki salaku tau nitahang; tau nipattantua lamate lalang pa'bundukang, lamatei lalang pa'bundukang.

¹²LapparinrA' pepe' ri sikamma balla'-balla' rewatana Mesir, nampa lanatunu karaeng Babel anjo patung-patung barhalaya ri anjo balla' rewataya yareka naengkaki mange ri pa'rasanganna. Rapang sitau pakalawaki antangkasi pakeanna battu ri gantuma, kamma tomminjo karaeng Babel lambarrasaki Mesir, nampa a'lampa ammotere' tena anrompai.

¹³Sikamma patung-patunna barhalaya ri Heliopolis ri Mesir, laniancuru' ngasengi, siagang sikamma balla'-balla' rewataya ri Mesir lanitunui sa'genna la'busu'.”