Read Makassar Version – KITTA' MATANGKASA YEREMIA 44 Bible Online

YEREMIA 44 - Makassar Version – KITTA' MATANGKASA bible

YEREMIA 44

¹A'bicarai Batara ri nakke ri passala'na sikontu tu Israel niaka ammantang ri Mesir, iamintu ri kota Migdol, Tahpanhes, Memfis, siagang ri daera timborang.

²Iaminne pasanNa Batara Kaminang Koasaya, iamintu Allata'alana Israel, mae ri ke'nanga, angkana, “Kalennu ngaseng le'ba' anciniki bala le'baka Kupabattu mae ri Yerusalem siagang kota maraenga ri Yehuda. Sa'genna pole kamma-kamma anne anjo kota-kotaya ancuru' ngasengiji siagang tena nanipammantangngi.

³Nakajariang ngaseng anjo sikammaya lanri dorakai pandudu'na, sa'genna napakallaroA'. Assarei ke'nanga koro'bang siagang anynyombai mae ri rewata-rewata tenaya nale'ba' nasomba ke'nanga, tenaya nale'ba' nusomba yareka nasomba boe-boenu.

⁴Tulusu' Kusuroi battu ata-atangKu sikamma na'bia mae ri kau, ampisangkaiko anggaukangi anjo kaja'dallang tenaya Kungai.

⁵Mingka taerokako mappilangngeri siagang taerokako amparhatikangi. Taerokako ammari anggaukangi kaja'dallanga, iamintu assare koro'bang mae ri rewata-rewataya.

⁶Iaminjo saba'na naKutumpa lussakKu siagang pangngalarroingKu mae ri kota-kota Yehuda siagang agang-aganga ri Yerusalem. Yangasenna Kutunui sa'genna a'jari loro-loro siagang kalotoro' sangkamma akkullea nicini' kamma-kamma anne.

⁷Siagang kamma-kamma anne, iNakke, Batara Kaminang Koasaya, iamintu Allata'alana Israel, akkuta'nangA' angkana apa saba'na nanugaukang anjo apa-apa appabattua bala lompo mae ri kalennu. Apaka erokko ampanraki sikontu taua — bura'ne, baine, ana'-ana', siagang ana' lolo — sa'genna tena manna sitau battu ri bansanu ammantang?

⁸Apa saba'na nanugaukang apa-apa ampabattuai larroKu? Battuko mae siagang ammantangko ri Mesir, pa'rasangang tenaya nuassengi, nampa anynyombako barhala siagang assareko koro'bang mae ri anjo rewata-rewataya! Apaka erokko angngancuruki kalennu sollannu nihina ri sikontu bansaya ri lino siagang nipake arennu salaku pattunra?

⁹Apaka nukaluppaimi sikontu kaja'dallang nigaukanga ri butta Yehuda siagang ri agang-aganga ri kota Yerusalem, iamintu nigaukanga ri boe-boenu, ri karaeng-karaeng Yehuda siagang bainenna ke'nanga, siagang nugaukanga siagang bainennu?

¹⁰Mingka sa'genna kamma-kamma anne taerokako ampakatunai kalennu siagang attallasa' situru' hukkung Kupassareanga mae ri kau siagang mae ri boe-boenu.

¹¹Lanri kammana anjo, iNakke, Batara Kaminang Koasaya, Allata'alana Israel ambaliangko siagang angngancuruki sikontu Yehuda.

¹²Siagang punna nia' battu ri tu Yehuda ammantanga tassesa, tuli ero'na a'lampa mange ri Mesir untu' ammantang anjoreng, lapanra' kabusuki ke'nanga. Kabusu'na ke'nanga, lompo ca'di, lamatei ri Mesir lalang pa'bundukang yareka lanri kacipurang. Lamallaki taua anciniki ke'nanga, siagang lanihinai ke'nanga ri taua. Arenna ke'nanga lanipakei a'jari pattunra.

¹³Sangkamma bateKu anghukkungi Yerusalem, kamma tomminjo bateKu langhukkungi ke'nanga ammantanga ri Mesir. Lamatei ke'nanga lalang pa'bundukang, lanri kacipurang yareka lanri garring.

¹⁴Battu ri tu Yehuda tassesaya, ia a'lampayamo mange ri Mesir untu' ammantang anjoreng, tena manna sitau lata'lappasa' yareka attallasa'. Tena manna sitau battu ri ke'nanga lakkulle ammotere' mange ri Yehuda, manna pole nasanna' ero'na ke'nanga. Tojeng, tena manna sitau lakkulle ammotere' pantaranganna siapa are tau a'lilia untu' annompang.”

¹⁵Nampa battumo tau jai sikalia mae ri nakke, iamintu tu bura'ne naassenga angkanaya tubai'-bainena assarei koro'bang mae ri rewataya, siagang sikontu tubaine niaka ammenteng anjoreng, kammayatompa tu Israel ammantanga ri Patros, bageang timboro'na Mesir. Nakana ke'nanga ri nakke,

¹⁶“Taerokai ikambe ampilangngeri apa nupabattua mae ri kambe lalang arenNa Batara.

¹⁷Sikontu apa napa'janjianga ikambe, tena tanagaukanna ikambe. Tuli lassarena koro'bang ikambe mae ri Ratu Suruga, siagang appatiri' je'ne' anggoro' salaku passare mae ri ia sangkamma biasaya nigaukang ri kota-kota Yehuda siagang ri agang-aganga ri Yerusalem, iamintu nigaukanga ri boe-boena ikambe, ri sikamma karaenga siagang pagawe-pagawe pamarentana ikambe, kammayatompa nagaukanga kalenna ikambe. Anjo wattua anggannaki kanre-kanreanna ikambe, akkalumanynyangi ikambe, siagang tena sikali kasukkaranna ikambe.

¹⁸Mingka baku' ammarina ikambe assare koro'bang mae ri Ratu Suruga, siagang tenamo nippatiri' anggoro' salaku passare mae ri ia, kakurangammi ikambe ri yangaseng-ngasenna; matemi taunna ikambe lalang pa'bundukang yareka lanri kacipurang.”

¹⁹Nampa nakana anjo sikamma tubai'-bainea, “Bura'nenna ikambe nasitujui punna appare' ikambe roti kammaya Ratu Suruga pare'na siagang attunu koro'bang kammayatompa assare koro'bang anggoro' mae ri anjo rewatana ikambe.”

²⁰Appialima' mae ri sikontu anjo bura'ne baine akkana kammaya kukana,

²¹“Apaka nukana taNaassengai yareka nukana Nakaluppai Batara anjo koro'bang-koro'bang nipassareanga ri kota-kota Yehuda siagang ri agang-aganga ri Yerusalem, iamintu nipassareanga ri boe-boenu, ri karaeng-karaenga siagang sikamma pagawe pamarentanu, kammayatompa ri sikontu ra'ya'na anne pa'rasanganga siagang nupassareanga ikau kalennu?

²²Tenamo Natahangi Batara ancinikko assare koro'bang mae ri rewata-rewata maraenga. Anjo panggaukannu ja'dalaki siagang tunai. Doraka mako mae ri Batara siagang tenamo numannuruki ri parenta-parentaNa. Lanri kammana anjo, kamma-kamma memang anne ancuru'mi pa'rasangannu sa'genna tenamo nakkulle nipammantangngi, siagang arenna nipakemi a'jari kana pattunra. Tau ancinikai a'jari sanna'mi malla'na.”

²⁴Nampa kupauang ngaseng anjo taua, la'biangampa sikamma bai'-bainea, angkanaya Batara Kaminang Koasaya, akkana kammai anne mae ri tu Yehuda niaka ammantang ri Mesir, “Ikau ngaseng siagang tubai'-bainenu le'ba' mako assumpa mae ri Ratu Suruga angkanaya lattunuko koro'bang siagang lassareko je'ne' anggoro' mae ri ia. Anjo janjinnu le'ba'mi nurupai. Jari, baji'mi! Gaukangi mange anjo janjinnu!

²⁶Mingka kamma-kamma anne pilangngeri apa Kupaua mae ri kau, he tu Israel niaka ri Mesir: INakke, Batara, assumpA' lanri arengKu mala'birika, angkanaya tenamo naKupa'biangko ampakei arengKu untu' appare' janji. Takkulleako angkana, ‘Assumpa' lanri Allata'ala mattallasaka!’

²⁷LaKuusahai sollanna anggappako cilaka siagang tena numate'ne, sa'gennu mate kabusu', baji' lanri pa'bundukang kammayatompa lanri garring.

²⁸Poro siapa areji bawang lasalama' siagang ammotere' mange ri Yehuda battu ri Mesir. Jari sikontu tu Yehuda niaka ri Mesir lanaciniki angkana apaka kananna ke'nanga yareka kana-kanangKu la'rupa.

²⁹LappabattuA' cilaka mae ri kau ri tampaka anne untu' ampa'butti mae ri kau angkanaya anjo hukkungang Kurancanakanga untu' ikau, kajariang tojeng-tojengi.

³⁰ Hofra, karaeng Mesir laKupassareangi mae ri musu-musunna eroka ambunoi, sangkamma batena Kupassareang Zedekia karaeng Yehuda mae ri Nebukadnezar karaeng Babel, musunna eroka ambunoi.”