Read Makassar Version – KITTA' MATANGKASA YEREMIA 48 Bible Online

YEREMIA 48 - Makassar Version – KITTA' MATANGKASA bible

YEREMIA 48

¹ Iaminne kananNa Batara Kaminang Koasaya, iamintu Allata'alana Israel, ri sesena Moab, nakana, “Cilakai pandudu'na Nebo, nasaba' runtummi kotana! Niallei Kiryataim, siagang benteng pattahanganna kassaka niancuru'mi, sa'genna siri'-siri' pandudu'na;

²lanynya'mi nakalompoang pa'maika Moab. Naallemi musu Hesybon siagang anjorengi ke'nanga a'rancana untu' ampa'lanynya' kabusuki sikontu bansa Moab. Sikamma sa'raya ri kota Madmen lanipamari ngasengi, lanri anjo kotaya lanibunduki ri tantara.

³Pilangngeri! Pandudu'na Horonaim ammarrangi angkana, ‘Kapanrakang! Kaancurang!’

⁴Ancuru'mi Moab! Sa'ra karru' ana'-ana' ca'dina kalangngerangi sa'genna mange ri Zoar.

⁵Pilangngeri sa'ra karru' ri oloang naika ri Luhit, siagang sa'ra piraunga ri oloang naunga ri Horonaim.

⁶Nakana ke'nanga, ‘Karo-karoko! Pasalamaki nyawanu! Lariko rapang keledai liaraka ri paranga!’

⁷Moab! Ikau nupattoangi kaporeannu siagang kakalumanynyangngannu. Mingka kamma-kamma anne ikau kalennu lanibetako. Kasmos, rewatanu, siagang sikamma imanga siagang pagawena laniengkaki mae nipela'.

⁸Kabusu'na kotaya laancuruki, tena manna se're lata'lappasa'. Ka'bung siagang lapparaka, lapanra' kabusuki. INakke, Batara, anne akkana.

⁹Attannangko batu nisang untu' Moab, lanri tasalloami anjo pa'rasanganga nanipanraki taba sikali. Kota-kotana laruntungi siagang tena manna sitau lammantang anjoreng.”

¹⁰Nitunrai tau tenaya naero' anggaukangi tugasa' battua ri Batara siagang attojeng-tojeng. Nitunrai tau tenaya nabi'buki pa'danna untu' ammuno.

¹¹Nakana Batara, “Battu riolo amangi tallasa'na Moab. Tale'bakai niengka' mange ri butta pammelakkanga. Ia rapangi je'ne' anggoro' nibolika sallo siagang tale'bakai nipatiri' antama' ri tampa' anggoro' maraenga. Anggoro'na tuli bau' iji siagang nyamangi.

¹²Mingka, lanarapiki sallang wattunna naKupassuroang sollanna nipatiri' Moab rapang anggoro', siagang sikamma tampa'na nikosongi siagang nireppeki.

¹³Lala'bai pa'mai'na Moab mae ri Kamos, rewatana ke'nanga, sangkamma batena Israel la'ba pa'mai'na ri Betel ia napattoanga ke'nanga.

¹⁴Antekamma nakkulle barani tu bura'nena Moab angkana, ‘Ikambe tubarani, tantara pore, le'baka niso'ri lalang pa'bundukang?’

¹⁵Moab siagang kota-kotana le'ba'mi niancuru', siagang sikamma tau rungkana kaminang bajika le'ba'mi nibuno. INakkemi le'ba' a'bicara. INakke karaeng, Batara Kaminang Koasaya.

¹⁶Nia'mi ri dallekanna pakke'buka bala lantujuai Moab, tasalloami naancuru'.

¹⁷He ikau ngaseng pa'rasangang-pa'rasangang singngampi'na Moab angngassengai masahoro'na, susa mako untu' Moab. Akkana mako, ‘Tenamo koasana Moab, lanynya'mi kalompoanna siagang kagassinganna!’

¹⁸He pandudu'na Dibon, naung mako battu ri tampa' kalompoannu; ammempo mako ri buttaya, irate ri limbu'buka. Lanri eroka ampanraki Moab, anne pa'rasangannu nia'mi battu, siagang lanaancuruki sikontu pattahangannu.

¹⁹Ikau niaka ammantang ri Aroër, ammentengko ri birinna aganga siagang parhatikangi! Pakkuta'nangngangi mae ri ke'nanga laria, siagang ta'lappasaka, angkana, ‘Apa le'ba' kajariang?’

²⁰Lappiali ke'nanga angkana, ‘Tu'guru'mi Moab, siagang a'jari tunami, jari karrukimi. Pa'la'bangi kabarrang ri sikontu birinna Binanga Arnon angkanaya ancuru'mi Moab.’ ”

²¹“Nipabattumi hukkunganga mae ri kota-kota niaka ri daera lappara' tinggia: irate ri Holon, Yahas, Mefaat,

²²Dibon, Nebo, Bet-Diblataim,

²³Kiryataim, Bet-Gamul, Bet-Meon,

²⁴Keriot, siagang Bozra. Kabusu'na kota niaka ri Moab, bella yareka ambani, nihukkung kabusuki.

²⁵Nitepo'mi kagassinganna Moab, niancuru'mi kakoasanna. INakke, Batara, anne akkana.”

²⁶Nakana Batara, “Pareki Moab nasa'ring, lanri napattampoangi kalenna mae ri Nakke. Langgulung-gulungi lalang ri langngena, siagang lanikakkali ri taua.

²⁷Sai riolo le'baki nikakkali Israel ri Moab siagang napareki carita rapang angkanaya le'baki nirapikang ke'nanga siagang ngaseng palukkaka?

²⁸Ikau pandudu'na Moab, bokoimi kota-kotanu siagang mange mako ammantang ri bulu'-bulu' batua rapang jangang-jangang bodobangkeng appareka ru'mung ri tubirika.

²⁹Teai sipato' tamponu! Kulangngere'mi antekamma borronu, tinggi langganu koborroannu, siagang katampoannu!

³⁰INakke, Batara, Kuassengi katampoannu. Bicarannu sangnging tena bonena, siagang panggaukannu tena battuanna.

³¹Lanri kammana anjo langngarru' lompoA' untu' ikau ngaseng siagang untu' sikamma tau niaka ri Kir-Heres, ibukotana pa'rasangannu.

³²Lala'biangang Kukarrukinna pandudu'na Sibma na pandudu'na Yaezer. Kota Sibma rapangi lamungang anggoro' a'la'banga mange-mange tangkenna sa'genna ri ba'leanna Tamparang Matea, kamma bellana Yaezer. Mingka kamma-kamma anne rappo-rapponna ri wattu timoroka siagang rappo anggoro'na le'ba'mi nipanraki.

³³Sa'ra-sa'ra karannuanga lanynya'mi battu ri Moab, pa'rasangang copponga. Kupamari assolong je'ne' anggoroka battu ri pakkakasa' pammaccokanna; tenamo tau appare' anggoro' siagang a'rannu-rannu.

³⁴Tu Hesybon siagang tu Eleale angngarruki, nakalangngerang karru'na sa'genna mange ri Yahas, siagang kalangngerang tongi mae ri tau battua ri Zoar sa'genna mange ri Horonaim siagang Eglat-Selisia. Angngarruki ke'nanga lanri manna je'neka ri pangkana Binanga Nimrim kalotoro' ngasemmi.

³⁵LaKupammari tu Moab attunu koro'bang ri tampa'-tampa' panynyombanna ke'nanga, siagang Kupammari ke'nanga assare koro'bang mae ri rewata-rewatana ke'nanga. INakke, Batara, anne akkana.

³⁶Sikontu kakalumanynyangnganna Kir-Heres siagang kabusu'na Moab lanynya'mi. Si'nai pa'maikKu anciniki katallassanna anjo ke'nanga; rapangA' tau appasa'ra suling kasusaang.

³⁷Le'ba' ngasemmi nacukkuru' uu'na siagang janggo'na ke'nanga, nabokkaki paling-palinna, siagang ammake kaeng karung, pammatei ri kasusaanna ke'nanga.

³⁸Irate ri sikontu tompo'na ballaka siagang ri sikamma paranga, sangnging karru' mami nilangngere'. Nasaba' Moab le'ba'mi Kureppe' rapang katoang tenayamo ningai.

³⁹Ancuru' taba sikalimi Moab! Teai sipato' siri'-siri'na Moab! Angngarruki lanri nipakatunai siagang nikakkali ri bansa-bansa niaka ri tammulilina. INakke, Batara, anne akkana.”

⁴⁰Nakana Batara, “Rapang jangang-jangang rajawali attamberoa siagang ka'nyi'na takka'ranga, kammami anjo nia' se're bansa lantamberoi Moab.

⁴¹Kota-kotana siagang sikamma pattahanganna laniallei, siagang tantarana lamallaki rapang baine eroka ammana'.

⁴²Laancuruki Moab siagang tenamo nattanja' se're bansa, lanri napattampoanna kalenna mae ri Nakke.

⁴³Lanipassidallekangi ke'nanga siagang pammunoang, kali'bong, siagang sikko'.

⁴⁴Tau laria battu ri tau lammunoa, latu'guruki antama' ri kali'bonga, siagang tau akkullea assulu' battu ri kali'bonga laniallei ri sikko'. Yangasenna anjo kammaya lakajariangi ri wattu le'baka Kupattantu untu' angngancuruki Moab.

⁴⁵Tau annompang tenaya pakkullena a'lampai a'boya pa'la'langngang ri Hesybon, mingka anjo kotaya akkanrei siagang manna balla' karaenna Sihon nikanre tongi ri pepe'. Pepeka le'ba'mi naancuru' daera pa'baeng-baenga siagang pa'monconganna Moab, pa'rasanganna tau nangaia a'bundu'.

⁴⁶Cilakami Moab! Pandudu'na anynyombaya ri Rewata Kamos le'ba'mi nipanraki, siagang ana'-ana'na ke'nanga niengka'mi salaku tau nitahang.

⁴⁷Mingka sallang, laKupa'jari bajiki ammotere' katallassanna pa'rasangang Moab. INakke, Batara, anne akkana!” Iaminjo Nagaukanga Batara mae ri Moab.