Read Makassar Version – KITTA' MATANGKASA YEREMIA 5 Bible Online

YEREMIA 5 - Makassar Version – KITTA' MATANGKASA bible

YEREMIA 5

¹He pandudu'na Yerusalem, jappaimi sikontu aganga lalang ri kotanu! Boyai kemae-kemae, siagang ikau tommo anciniki. Paressai ri paranna kotaya maka nia' se're tau lambusu' nyawana, attojeng-tojenga ero' majarre' tappa'na mae ri Allata'ala? Punna nia', laNapammopporangi Batara Yerusalem.

²Nukana kalennu anynyombako mae ri Batara, nampa takammayaja anjo pattujunnu.

³Sikontutojenna ia Natuntuka Batara iamintu pa'mai' tamamminraya. Natunrungko Batara, mingka tena nujampangi. Nalicakko, mingka taerokako niajara'. Kapala batuko, siagang taerokako toba' battu ri dosa-dosanu.

⁴Kupikkiriki angkanaya, “Ah, anjo ke'nanga poro ra'ya' biasaji bawang tenaya apa-apa naasseng. A'gau' toloi ke'nanga, lanri tanaassengai apa Nakaerokia siagang Natuntuka Karaeng Allata'ala battu ri ke'nanga.

⁵Baji'mi nakua'lampa mae ri sikamma tumalompoa, nampa a'bicara siagang ke'nanga. Mattantu naassengi ke'nanga apa Nakaerokia siagang Natuntuka Karaeng Allata'ala battu ri ke'nanga.” Mingka, yangasenna anjo ke'nanga tena todong naero' Niparenta ri Batara; taerokai ke'nanga mannuruki ri Ia.

⁶Lanri kammana minjo nalanibuno ke'nanga ri singa battua ri romanga, siagang nikae-kae ri serigala battua ri parang lompoa. A'dete'mi mange-mange macang a'ballanga amboyai lanakanrea ri ampi'na kota-kotana ke'nanga, na sikamma tau assuluka nabakkai ngaseng nakanre. Kajariang ngasengi anjo sikammaya lanri jainamo dosana ke'nanga, siagang a'mole-molemi nabokoi Allata'ala.

⁷Nakana Batara, “Angngapa namusti Kupammopporang dosa-dosana ummakKu? NabokoiMa' ke'nanga siagang anynyombami ke'nanga ri tenaya na Allata'ala. Kusarei ke'nanga kanre sa'genna bassoro', mingka kammaji a'gau' bawanna, siagang masarroi a'lampa ke'nanga mange ri baine pasundalaka.

⁸Rapangi ke'nanga jarang laki co'mo' siagang sannaka balere'na; massing eroki ke'nanga ri tubai'-bainena aganna.

⁹Maka tena namusti Kuhukkung bansa kammaya anjo siagang Kubalasa' apa le'baka nagaukang ke'nanga?

¹⁰LaKusuroi musua ampanraki koko anggoro'na ke'nanga, mingka tena napanraki taba sikali. LaKusuroi anjo musua ambattasaki tangke-tangke anggoro'na ke'nanga, nasaba' anjo tangke-tangkea teai iNakke ampatangi.

¹¹Nabaliang tojeng-tojemMa' umma' Israel siagang Yehuda. INakke, Batara, anne akkana.”

¹²Umma'Na Batara teai kana tojenga napau ri passala'na Batara. Nakana ke'nanga, “Ah, tena Nalappanggaukang apa-apa. Tena nalanatujuki' bala siagang tena todong nalanikasia' bunduka siagang kacipuranga.

¹³Pare' mami anging anjo na'bi-na'bia, nasaba' tenai ri ke'nanga pasanNa Batara.”

¹⁴Nampa Nakana Batara Kaminang Makoasaya ri nakke, “Yeremia, lanri akkana kammana ngaseng anjo sikamma taua, lanitujui ke'nanga ri bala nakanaya ke'nanga tena nalakajariang. LaKupa'jari kana-kanangKu rapang pepe' lalang ri bawanu. Anne bansaya lasanrapangi kayu tunuang, nalanikanre ke'nanga ri anjo pepeka sa'genna la'busu'.”

¹⁵He umma' Israel, Napabattui Batara bansa battua ri pa'rasangang bella untu' ambundukiko. Anjo bansaya nia' memammi battu riolo dudu, tanuassengai nupahang bicaranna. Teai sipato' kassa'na ke'nanga,

¹⁶siagang sanna' ngaseng baranina tukang panana; pallaki siagang tena pangngamaseanna ke'nanga ammuno.

¹⁷Lanapaccappuki ke'nanga wassele' buttanu siagang kanre-kanreannu kammayatompa nabunoi ana'-ana'nu. Lanasamballei ke'nanga olo'-olo' sapinu siagang gimbala'nu, siagang lapanraki ngasengi poko'-poko' anggoro'nu siagang poko'-poko' aranu. Lanaancuruki ke'nanga kota-kota ammakea tembo' pattahangngang ia nupattoanga.

¹⁸Nakana Batara, “Mingka manna nakamma mamo, anjo wattua tena tonja naKuancuruki ummakKu.

¹⁹Mingka punna akkuta'nang ke'nanga angkana angngapa naKugaukang ngaseng anjo sikammaya mae ri ke'nanga, pauangi Yeremia, angkanaya antekamma batena ke'nanga ambokoiA' ri pa'rasangang kalenna ke'nanga untu' anynyomba ri rewata-rewatana bansa maraenga, kamma tomminjo la'jari atai ke'nanga ri bansa-bansa maraeng ri pa'rasangang maraeng.”

²⁰Nasuroa' Batara ampabattui anne pasanNa mae ri jari-jarina Yakub niaka ammantang ri Yehuda, angkana,

²¹ “Pilangngeri, he ikau ngaseng sikamma tau dongoka siagang toloa! Nia' matannu, mingka tena nuccini'; nia' tolinnu mingka tena nullangngere'!

²² INakke Batara; angngapa natena numalla' ri Nakke? Mustina annekkerekko mae ri Nakke! INakke ampa'jari biring tamparanga a'jari pa'baeng-baeng tamparang tenaya nakkulle nilaloi sa'genna satunggu-tungguna. Tamparanga akkullei lompo bombanna siagang a'jallo' bombanna, mingka takkulleai nalalo anjo pa'baeng-baenga.

²³Mingka kapala batuko siagang nungai angngewaya; nungai ammengka maraenga siagang ambokoiA'.

²⁴Tena le'bakako angngu'rangi untu' ampakalompoA', padahala' iNakke appabattu bosi, baji' naripakaramulanna kammayatompa narikala'busanna baraka. INakke todong assareko wattu pakkattoang tunggala' taung.

²⁵Mingka iaminjo dosa-dosanu ngaseng anrompai sikontu anjo apa bajika sa'genna tena nukasiaki baji'na.

²⁶He ummakKu, nia' ri alla'nu tau ja'dala'. Sanrapang tau attayanga sikko' natannang untu' anjakkala' jangang-jangang, kamma tomminjo ke'nanga attannangi sikko' untu' anjakkalaki taua.

²⁷Sanrapang pasoso' jangang-janganga ambonei tampa' jangang-janganna siagang jangang-jangang, kamma tomminjo ke'nanga nabonei balla'na siagang barang-barang wassele', annipuna ke'nanga. Kammaminjo na'jari koasamo siagang akkalumanynyammo ke'nanga

²⁸kammayatompa a'jari co'mo' siagang coppong tallasa'na. Tena sanggana kaja'dallanna ke'nanga. Tena na'gau' adele' lalang ri passala'na ana'-ana' kukanga, siagang tena naalleangngangi ha'na sikamma tau nijalakkanga.

²⁹Mingka iNakke, Batara, langhukkungi ke'nanga lanri yangasenna anjo sikammaya; laKubalasaki sikamma panggaukanna anne bansaya.

³⁰Nia' kajariang heba' siagang appakamalla' ri anne pa'rasanganga:

³¹a'balle-ballei na'bi-na'bia, sikamma imanga allayani situru' ri ero' pa'mai' kalenna na ikau ummakKu nungai anjo kammaya. Mingka apa lanugaukang punna battu allo kala'busanga?”