Read Makassar Version – KITTA' MATANGKASA YEREMIA 50 Bible Online

YEREMIA 50 - Makassar Version – KITTA' MATANGKASA bible

YEREMIA 50

¹ Iaminne pasanNa Batara mae ri nakke ri sesena Babel siagang pandudu'na,

²“Attannangko pammatei siagang pa'la'bangi pau mae ri bansa-bansa angkanaya tu'guru'mi Babel! Teako rahasiakangi anjo passalaka! Merodakh, rewatana, niancuruki, siagang patung-patunna lalea reppe'mi tassimbung-simbung, kammayatompa sikamma barhalana sanna'mi batena nihina-hina.

³Nia' se're bansa battu wara' labattu ambunduki Babel, siagang ampa'jari anjo pa'rasanganga kamma parang kalotoro'. Taua siagang olo'-oloka lalari, siagang tenamo ero' ammantang anjoreng.”

⁴Nakana Batara, “Anjo wattua sallang tu Israel siagang tu Yehuda labattui siagang angngarru' amboyA', Allata'alana ke'nanga.

⁵Lanapakkuta'nangngangi ke'nanga oloang mangea ri Sion, nampa a'jappa mange anjoreng. Lappareki parjanjiang satunggu-tunggua ke'nanga siagang iNakke, siagang tuli laKuta'galaki anjo parjanjianga.

⁶UmmakKu rapangi gimbala' le'baka nilappassang lingu ri monconga ri pakalawakinna. Pitilampa-lampaimi ke'nanga battu ri moncong se'rea mange ri moncong maraenga siagang tanaassengami angkana kemae balla'na ke'nanga.

⁷Nibakkai siagang nisessai ke'nanga ri sikontu naaganga sibuntulu' ke'nanga. Nakana musu-musunna ummakKu, ‘Manna apa nigaukang mae ri ke'nanga, tena nasala, nasaba' anjo taua dorakami ri Batara. Boe-boena ke'nanga tappaki ri Batara, jari mustina ke'nanga tuli majarre' tongi mae ri Batara.’

⁸ He umma' Israel, lariko ambokoi Babel! Ikau musti appakkaramula a'lampa, sollanna amminawang maraenganga.

⁹LappagiokKa' siapa are jaina bansa kassaka battu wara' sollanna nabunduki Babel. Langngatoroki ke'nanga barisang untu' a'bundu' angngewai Babel na nabeta. Anjo ke'nanga tau cara'de' ammake sanjata pana, tenaya nale'ba' tassala batena ammana.

¹⁰Lanirampasaki Babel, siagang tau anrampasakai langngallei sikontu apa nangaia ri pa'mai'na. INakke, Batara, anne akkana.”

¹¹Nakana Batara, “He tu Babel, nuellaki ummakKu. A'lumpa'-lumpakko napakamma rannu rapang jarang assa'raya, siagang rapang sapi a'rukuka.

¹²Mingka ikau la'jari bansa kaminang tena battuannu ri alla'na sikontu bansaya. Anjo kotanu lompoa lanihinai siagang lanipakasiriki. Pa'rasangannu la'jari parang lompoi na kalotoro' siagang roso'.

¹³Lanri larroKu, nalaKupa'jari rumbangngang Babel siagang tenamo ampammantangngi. Sikontu allaloa anjoreng lata'bangka ngasengi siagang a'jari mallaki.

¹⁴He ikau ngaseng tau angngeranga sanjata pana! Atoroki barisannu untu' angkurungi siagang ambunduki Babel. Pa'dalle' mangei ri Babel ana' pananu, lanri dorakai ri Nakke.

¹⁵Ammarrangko akkio' bundu' ri tammulilina anjo kotaya! Kamma-kamma anne manyarami Babel. Tembo'-tembo'na le'ba'mi nilappo siagang niruntung. Kamma-kamma anne Kugaukangi pa'balasaka mae ri Babel. Lanri kammana anjo gaukammi mae ri ke'nanga sangkamma nagaukanga ke'nanga mae ri tau maraenga.

¹⁶Teako lappassangngi taua a'lamung-lamung yareka akkatto ri anjo pa'rasanganga. Sikontu tau annompanga ammantang anjoreng lammotere' ngasengi ri pa'rasanganna lanri mallaki ke'nanga ri tantara battua ambunduki Babel.”

¹⁷Nakana Batara, “Tu Israel rapangi pa'rappungang gimbala' niondanga siagang nipasimbung-simbunga ri singa. Uru-uruna nibunduki ke'nanga ri karaeng Asyur, nampa Nebukadnezar Karaeng Babel angngallei buku-bukunna ke'nanga.

¹⁸Lanri kammana anjo, iNakke, Batara Kaminang Koasaya, iamintu Allata'alana Israel, langhukkungi Karaeng Nebukadnezar siagang pa'rasanganna, sangkamma batena Kuhukkung karaeng Asyur.

¹⁹LaKupoterangi tu Israel mange ri pa'rasanganna ke'nanga. Langnganrei ke'nanga battu ri wassele' buttana Bulu' Karmel siagang daera Basan. Lanipakabassoroki ke'nanga battu ri wassele' buttana daera Efraim siagang Gilead.

²⁰Ri anjo wattua Israel siagang Yehuda latangkasaki battu ri dosaya, lanri laKupammopporangi sikamma tau le'baka Kupasalama'. INakke, Batara, anne akkana.”

²¹Nakana Batara mae ri se're bansa niaka battu wara', “Bunduki pandudu'na Merataim siagang Pekod. Bunoi siagang panraki ke'nanga. Gaukangi parentaKu. INakke, Batara, anne akkana.”

²²A'gamarrungi sa'ra bunduka ri pa'rasanganga, siagang a'jarimi kaancurang lompoa.

²³Sikontu pa'rasanganga nitunrungi ri Babel sa'genna ancuru', mingka kamma-kamma anne tepo'mi anjo pattunrunna! Sikontu bansaya ta'bangkai allangngereki apa kajarianga mae ri anjo pa'rasanganga.

²⁴Nakana Batara, “Babel, angngewako ri Nakke, jari lanri kammana anjo naalle mako sikko' nutannanga untu' kalennu, mingka tanuassengai kalennu.

²⁵Kusungkemi gudang sanjataKu, siagang lanri larroKu naKupasulu'mo anjo sikamma sanjataKu, lanri iNakke Batara Kaminang Tinggia siagang Kaminang Koasaya, nia' tugasa' musti Kugaukang ri Babel.

²⁶Bundukimi Babel battu ri kere-keremae, siagang lappoi sikontu gudang gandunna! Pattambungi barang-barang nirampasaka sangkamma punna appatambungko gandung! Ancuruki anne pa'rasanganga! Teako nia' nusesa!

²⁷Bunoi sikontu tantarana! Bunoi ke'nanga! Cilakami bansa Babel! Narapi'mi wattunna nihukkung ke'nanga!” (

²⁸Sikamma tau laria mange ri Yerusalem battu ri Babel nacaritai antekamma batena Karaeng Allata'alata ambalasaki panggaukanna tu Babel mae ri Balla'Na Batara.)

²⁹ Nakana Batara, “Suroi sikamma tantara angngeranga pana ambunduki Babel. Pagio' ngasengi sikamma tau cara'deka ammake sanjata pana. Kurungi anjo kotaya siagang teako lappassangngi manna sitau ta'lappasa'. Balasaki sikontu panggaukanna siagang gaukammi ri ke'nanga sangkamma le'baka panggaukanna, lanri le'baki a'gau' kurangajara' mae ri Nakke, Kaminang Matangkasaka, iamintu Allata'alana Israel.

³⁰Ri anjo alloa lamatei sikamma tau rungkaya ri agang-agang kotana, siagang sikontu tantarana niancuruki. INakke, Batara, anne akkana.

³¹Babel, ikau tinggi langga duduko! Lanri kammana anjo, iNakke, Batara Kaminang Tinggia, Allata'ala Kaminang Koasaya, angngewako. Narapi'mi wattunnu Kuhukkung.

³²Anjo bansanu tinggi langgaya latatto'roi na tu'guru'. Tena manna sitau lantulungko ampabangungko. Kota-kotanu laKutunui, siagang sikontu apa niaka ri tammulilina laKuancuruki.”

³³Nakana Batara Kaminang Koasaya, “Nijallakkangi tu Israel siagang tu Yehuda. Sikontu tau antahangai ke'nanga, najagai bajiki siagang taerokai allappassangi ke'nanga.

³⁴Mingka iNakke kassa', ampasalamaki ke'nanga; arengKu iamintu Batara Kaminang Koasaya. INakke KalengKu langngusahakangi parkarana ke'nanga siagang langngerang kaamangngang mae ri linoa. Mingka mae ri Babel lappabattuA' karicuang siagang kamallakkang.”

³⁵Nakana Batara, “Panraki Babel siagang ra'ya'na, pagawe-pagawe pamarentana, kammayatompa sikamma tau cara'de'na!

³⁶Panraki na'bi-na'bina Babel! Paballe-ballei siagang toloi ke'nanga. Panraki tantarana Babel porea! Tamaka malla'na ke'nanga!

³⁷Ancuruki jaranna siagang kareta bundu'na! Ancuruki sikamma tantara nisewana! Tamaka lammana ke'nanga! Ancuruki kakalumanynyangnganna Babel! Alleangi barang-baranna!

³⁸Kalotori sikontu binangana siagang kokonna! Nasaba', Babel rassi barhala appakaringi'-ringi', ampa'jari pongoroki sikamma tau anynyombaya ri ia.

³⁹ Lanri kammana anjo, Babel la'jarimi tampa' jing-jing siagang roh-roh ja'dala' kammayatompa jangang-jangang unta. Sa'genna satunggu-tungguna tenamo tau laero' ammantang anjoreng.

⁴⁰ Antekamma bateKu angngancuruki Sodom siagang Gomora siagang sikamma desa-desa niaka ri tammulilina, kamma tomminjo bateKu langngancuruki Babel. Tena manna sitau lammantang pole anjoreng. INakke, Batara, anne akkana.

⁴¹Se'reang bansa kassa' nia' a'gio' battu wara' ri pa'rasangang bellaya. Battui ke'nanga siagang jai karaeng untu' a'bundu'.

⁴²Sanjatana ke'nanga iamintu pana siagang poke; pallaki natangngassenga appammopporang. Rapang sa'ra tamparang a'gamarrung kammami anjo sa'ra bangkeng jaranna ke'nanga nipalaria maju ambunduki Babel.

⁴³Nalangngere'na anjo kabaraka, lammami nasa'ring karaeng Babel. Nibattuimi ri malla', siagang pa'risi'mi nasa'ring kamma baine eroka ammana'.

⁴⁴Rapang singa ammumbaya battu ri romang lompoa ri ampi'na Binanga Yordan nabattu mange ri parang pa'rukukanna gimbalaka, kamma tomminjo iNakke, Batara, labattu siagang ampalari Babel battu ri kotana ke'nanga silalonna. Nampa laKupilei sitau pamimping untu' amparentai anjo bansaya. Inai akkulle nipasangkammangA'? Inai barani appare' parkara siagang iNakke? Apaka nia' pamimping akkulle angngewA'?

⁴⁵Lanri kammana anjo, pilangngeri apa le'baka Kurancanakang mae ri kota Babel, siagang apa ero' Kugaukang mae ri pandudu'na. Manna ana'-ana'na ke'nanga lanire'resang todong a'lampa, na kabusu'na taua a'jari malla' ngasengi.

⁴⁶Punna tu'guru' Babel, nia' lakalangngerang sa'ra sannaka gegere'na, sa'genna ta'goccang sikontu linoa; sikamma sa'ra ammarranna panduduka lakalangngerangi mae ri bansa-bansa maraenga.”