Read Makassar Version – KITTA' MATANGKASA YEREMIA 52 Bible Online

YEREMIA 52 - Makassar Version – KITTA' MATANGKASA bible

YEREMIA 52

¹Zedekia ruampulo asse're taung umuru'na ri wattunna a'jari karaeng ri Yehuda. Sampuloi asse're taung sallona ammarenta ri Yerusalem. Amma'na niarengi Hamutal, ana'na Yeremia battu ri kota Libna.

²Sangkamma Karaeng Yoyakim, Karaeng Zedekia doraka tongi ri Batara.

³Teai sipato' larroNa Batara mae ri pandudu'na Yerusalem siagang tu Yehuda, sa'genna Nabongka ke'nanga siagang tenamo Nala'langngi pole ke'nanga. Angngewai Zedekia mae ri Nebukadnezar karaeng Babel;

⁴ lanri kammana anjo battumi Karaeng Nebukadnezar siagang sikontu tantarana nampa nabunduki Yerusalem ri tanggala' sampulo bulang sampulo ri taung makasalapang pamarentahanna Zedekia. Ambangungi ke'nanga pattahangngang ri pantaranna kotaya, ambangungi tembo' pakkurung,

⁵nampa nakurung tulusu' anjo kotaya sa'genna taung makasampulo asse're pamarentahanna Zedekia.

⁶Ri tanggala' salapang bulang appa' ia todong anjo taunga, ri wattunna sanna' dudumo bala kacipuranga, sa'genna tena sikalimo lanakanre ra'yaka,

⁷ nirumbammi tembo'na kotaya ri musua. Anjo bangngia, manna pole nasitabang nakurung tu Babel anjo kotaya, sikontu tantara Yehuda lari mange ri Lappara'na Yordan. Anjorengi ke'nanga ri koko balla' karaenga angngolo, nampa assulu' battu ri pakke'bu' lompoa ampasisambungai ruaya tembo' ri anjo tampaka.

⁸Mingka tantara Babel naondangi Karaeng Zedekia nampa najakkala' ri lappara'na Yerikho. Sikontu ana' buana a'lampa ngasengi ampilari.

⁹Nampa nierang Karaeng Zedekia mange ri Karaeng Nebukadnezar ri kota Ribla ri daera Hamat, nampa nitappuki hukkungang mate nagappa.

¹⁰Anjoreng tommi ri kotaya anjo nibuno ana'-ana'na ri dallekanna, siagang sikontu pagawe pamarentana Yehuda nibuno ngaseng todong.

¹¹ Le'baki anjo nikocci'mi assulu' matanna Zedekia, nampa nisikko' siagang nierang mange ri Babel. Anjoreng nipantamaki ri tarungkua, siagang tale'bakai assulu' battu anjoreng sa'genna mate.

¹²Ri tanggala' sampulo bulang lima lalang ri taung makasampulo assalapang pamarentahanna Nebukadnezar karaeng Babel, nia'mo sitau battu mange ri Yerusalem niarenga Nebuzaradan. Iami tumailalang siagang kapala pa'lapa' barambanna Nebukadnezar.

¹³ Nebuzaradan natunui Balla'Na Batara, balla' karaenga, siagang balla'na sikontu pamimpinga ri Yerusalem.

¹⁴Nampa sikontu ana' buana naruntungi tembo'-tembo'na anjo kotaya.

¹⁵Nampa ra'ya' niaka ija ri kotaya, iamintu sikamma pajama cara'deka niaka ammantang tassesa, sikamma tau kasi-asia, siagang sikamma tau lariamo a'limbang ri tu Babel, kabusu'na niengka'mi ri Nebuzaradan mange ri Babel.

¹⁶Mingka sipa'gang ra'ya' kaminang kasi-asia siagang tenaya apa-apanna, niboli'mi ri Yehuda, siagang nasuroi anjamai koko anggoroka siagang koko-koko maraenga.

¹⁷ Benteng-benteng tambaga siagang kareta-kareta ri Balla'Na Batara siagang ba' je'ne' tambagaya nireppeki ri tu Babel, nampa sikontu tambagana niengkaki mange ri pa'rasanganna ke'nanga.

¹⁸Naengka' tongi ke'nanga barang-barang kammaya anne: sude-sudea, tampa' auna tampa' pakkoro'bangnganga, sikamma pakkakasa' kanjolia, mangko'-mangko' nipammolikia cera' olo'-olo' nisamballea untu' koro'bang, mangko'-mangko' untu' attunu dupa, siagang sikontu barang-barang tambaga maraengannaya, sarroa nipake untu' upacara ibada.

¹⁹Barang-barang bulaeng siagang pera', kammayami mangko'-mangko' ca'dia siagang tampa' bara pepe', mangko'-mangko' untu' tampa'na cera' olo'-olo' nisamballea untu' koro'bang, tampa' au, bangkeng kanjoli, mangko'-mangko' untu' dupa, siagang mangko'-mangko' untu' pappatirikang passare je'ne' anggoro', kabusu'na naallei kalenna Nebuzaradan.

²⁰Barang-barang tambaga napareka Salomo untu' Balla'Na Batara, iamintu rua benteng, kareta-kareta, ba' je'ne' siagang sampulo anrua dato' sapi antahangi anjo ba' je'neka, yangasenna sanna' battala'na, sa'genna tena nakkulle nitimbang.

²¹Anjo ruaya benteng tambaga sangkammai: massing-massing tinggina 8 metere', tammulilina 5,3 metere', siagang tangnga-tangngana kosongi. Kapala'na anjo tambagaya 75 milimetere'. Irate ri anjo tunggala' bentenga nia' ulu benteng 2,2 metere' tinggina. Ri tammulilina anjo ulu-ulu bentenga nia' anu nianyang siagang belo-belo rappo delima, yangasenna battu ri tambaga kabusu'.

²³Anjo rappo delima niaka ri anu nianyanga ri tunggala' ulu bentenga nia' sibilangngang jaina, mingka salapangpuloji angngannang kacinikang battu rawa.

²⁴Pantaranganna anjo, Nebuzaradan najakkala' tongi Imang Lompo Seraya, Zefanya, iamintu wakkele'na, tallu tau pajaga pakke'bu'na Balla'Na Batara,

²⁵tuju tumailalanna karaenga niaka ija ri kotaya, panglima, wakkele' panglima angngurusukai sura'-sura'na tantaraya, siagang annampulo tumalompo maraenga.

²⁶Yangasenna anjo taua naerangi mange ri Karaeng Nebukadnezar ri kota Ribla,

²⁷ri daera Hamat. Anjorengi nisessa ke'nanga, nampa nibuno. Kammami anjo niengka'na tu Yehuda battu ri pa'rasanganna ke'nanga nampa nierang mange ri butta pammelakkanga;

²⁸yangasenna ke'nanga nia' 4.600 tau jaina. Naengkaki Nebukadnezar ke'nanga kamma anne: 3.023 ri taung makatuju pamarentahanna, 832 jaina battu ri Yerusalem ri taung makasampulo assagantuju pamarentahanna, siagang 745 jaina niengka' ri Nebuzaradan ri taung makaruampulo antallu pamarentahanna Nebukadnezar.

³¹Ri tanggala' ruampulo allima bulang sampulo anrua ri taung makatallumpulo antuju le'ba'na niengka' Yoyakhin mange ri pammelakkanga, Ewil-Merodakh a'jari karaeng Babel ri ia memang anjo taunga napappicinikangi pangngamaseanna mae ri Yoyakhin, na nalappassang battu ri tarungkua,

³²kammayatompa nagaukammi bajika ri ia. Nasarei Yoyakhin empoang tinggiangngang nasikamma karaeng maraeng nipelaka ri Babel.

³³Nikellai ansambei pakeang tarungkuna na situlusu'na akkullei angnganre ri balla' karaenga, na allo-allona nisare doe' untu' kaparalluang tallasa'na.