Read Makassar Version – KITTA' MATANGKASA YEREMIA 7 Bible Online

YEREMIA 7 - Makassar Version – KITTA' MATANGKASA bible

YEREMIA 7

¹Nasuroa' Batara a'lampa mange ri Balla'Na siagang ammenteng ri pakke'bu' lompo naoloa tu Yehuda punna battui ero' anynyomba. Nasuroa' ampa'la'bangi anne pasanNa mae ri ke'nanga, angkanaya, “Pinrai panggaukannu siagang batenu attallasa', nampa iNakke, Batara Kaminang Koasaya, Allata'alana Israel lassareko pangngellai ammantang tuli anrinni.

⁴Teako patappakki patipua, angkanaya, ‘Amangki', lanri anne Balla'Na Batara. Tojeng-tojeng anne Balla'Na Batara!’

⁵Pinrai katallassannu siagang panggaukannu. Adelekko tasse're-se're tau mae ri parannu tau.

⁶Tea' mako manjallakkangngi pole mae ri bansa maraenga, ana'-ana' kukanga, siagang janda-jandaya. Teako ammunoi tau tena salana ri anne pa'rasanganga. Teako anynyombai ri rewata-rewata maraenga, nasaba' anjo kammaya langngerangi kapanrakang mae ri kau.

⁷Punna nupinrai cara katallassannu siagang panggaukannu kammayatompa nupammari anggaukangi yangasenna anjo kammaya, laKusareko pangngellai ammantang tuli anrinni ri pa'rasangang le'baka Kupassareang a'jari butta pisaka mae ri boe-boenu.

⁸Mingka, sikontutojenna tena matu-matunnu tappa' ri kana-kana balle-ballea.

⁹A'lukkakko, ammunoko, a'gau' bawangko, sa'bi balle-balleko, assareko koro'bang mae ri Rewata Baal, siagang anynyombako mae ri rewata-rewata tenaya nanuassengi.

¹⁰Punna le'ba' ngasemmo anjo sikammaya nugaukang, battu mako mae anrinni ri BallakKu, nampa nukana, ‘Amangki'!’ Nampa nupatulusu' pole nugaukang anjo panggaukang palla'nu.

¹¹ Nukanaka anne BallakKu pammantangngang paella'? Yangasenna anjo panggaukannu Kucini' ngasemmi.

¹² A'lampako mange ri Silo, iamintu kota le'baka riolo Kupile a'jari tampa' panynyombang mae ri Nakke. Ciniki apa le'baka Kugaukang mae ri anjo tampaka lanri dosana ummakKu Israel.

¹³MangKu pole a'mole-mole a'bicara mae ri kau, mingka taerokako mappilangngeri. Nugaukang ngasengi sikamma anjo dosaya, siagang taerokako appiali punna akkiokKa'.

¹⁴Jari, anne BallakKu nupattoanga, siagang anne tampa' Kupassareanga mae ri boe-boenu siagang mae ri kau, laKupakamma tongi kota Silo riolo.

¹⁵LaKubongkako battu ri dallekangKu sangkamma le'ba'na Kubongka bija-bijannu, umma' Israel.”

¹⁶Nakana Batara, “Yeremia, teako pappala' doangngangi anne sikamma taua. Teako appala' tulungi yareka appala' doangngi untu' ke'nanga; teako passaiA', nasaba' taeroKa' ampilangngeri anjo pappalaka.

¹⁷Nucini'mi kalennu apa nagaukanga ke'nanga ri kota-kota Yehuda siagang ri agang-aganga ri Yerusalem!

¹⁸ Ana'-anaka appasse'rei kayu tunuang, tubura'-bura'nea apparinra pepe', siagang tubai'-bainea alleo' labu' untu' appare' kanrejawa lanapassareanga ke'nanga mae ri rewata baine, ia naarenga ke'nanga Ratu Suruga. Siagang untu' ampakapa'risiki atingKu assare tongi ke'nanga anggoro' mae ri rewata-rewata maraenga.

¹⁹Mingka sikontutojenna, teai iNakke napa'risi ke'nanga, passangalinna kalenna tonji ke'nanga, sa'genna siri'-siri' nakasia' ke'nanga.

²⁰INakke, Batara Kaminang Tinggia, lampitujui pangngalarroi lompoKu anne balla' panynyombanga, rupataua siagang olo'-oloka, kammayatompa poko'-poko' kayua siagang wassele' buttaya. La'rinra-rinrai larroKu rapang pepe' tenaya nakkulle nibuno.”

²¹Nakana Batara, “He ummakKu, nuassengi angkanaya anjo passare nutunua irate ri tampa' pakkoro'bangnganga musti nitunui sa'genna cappu', nampa passare maraenga akkullei nukanre. Mingka iNakke, Batara, Kukana, allemi kanre ngaseng!

²²Ri wattunna Kuerang boe-boenu assulu' battu ri Mesir, tena Kusarei ke'nanga paratorang ri passala'na koro'bang nitunua yareka koro'bang-koro'bang maraenga.

²³Poro Kuparentakanji bawang ke'nanga sollanna mannuruki ri Nakke, sollanna iNakke a'jari Allata'alana ke'nanga, siagang ke'nanga a'jari ummakKu. Kusuroi ke'nanga attallasa' situru' parenta-parentaKu sollanna mate'ne ke'nanga.

²⁴Mingka taerokai ke'nanga mappilangngeri siagang taerokai ke'nanga anjampangi. Ba'lalo ero' kalenna tonji ke'nanga naturukiang, iamintu ero' kapala batuna siagang ero' kaja'dallanna anjo. Tena na'jari baji' ke'nanga passangalinna a'jari ja'dalaki.

²⁵Baku' assulu'na boe-boenu battu ri Mesir sa'genna anne alloa tuli nia' Kusuro ata-atangKu, sikamma na'bia, battu mae ri kau.

²⁶Mingka tena ero' mappilangngeri siagang anjampangi. Ba'lalo pila' a'jari la'bi kapala batuko siagang la'bi ja'dalakko naboe-boenu.”

²⁷Nampa Nakana Batara, “Lanri kammana, he Yeremia, manna pole nupau ngaseng anjo sikammaya mae ri ummakKu, tena nalanapilangngeri ke'nanga kana-kanannu. Manna pole nukio' ke'nanga, mingka tena nalappiali ke'nanga.

²⁸Jari, pauangi ke'nanga angkanaya anjo ke'nanga bansa taero' mappilangngeri ri Nakke, Batara, Allata'alana ke'nanga. Taerokai ke'nanga appilajara' battu ri hukkungang le'baka nakasia' ke'nanga. Lanynya'mi kajarrekanna ke'nanga mae ri Nakke, ba'lalo tenamo nanibicarai.”

²⁹Nakana Batara, “He pandudu' Yerusalem, susa mako! Polongi uu'nu nampa nupela'! Akkelongko kelong-kelong karru' irate ri coppo'-coppo' buluka, nasaba' iNakke, Batara larro siagang Kusorongboko ngasengko.

³⁰Nagaukammi tu Yehuda kaja'dallanga. Anjo barhala-barhalana ke'nanga tenaya Kungai naboliki ke'nanga lalang ri BallakKu, sa'genna nara'massi BallakKu.

³¹ Se're tampa' pakkoro'bangngang niarenga Tofet le'ba'mi nabangung ke'nanga ri Ka'bung Lappara' Hinom untu' napake ampassareangi ana'-ana'na ke'nanga a'jari koro'bang nitunu. Padahala' iNakke tena le'bakai Kusuro anggaukangi anjo kammaya, ba'lalo tena le'bakai ammumba anjo pikkirang kammaya lalang ri pikkirangKu.

³²Lanri kammana anjo, nia' sallang se're wattu natenamo niarengi anjo tampaka Tofet yareka Ka'bung Lappara' Hinom, passangalinna Ka'bung Lappara' Panynyamballeang. Anjo buttaya la'jari butta pa'jerakkang lanri tenana tampa' maraeng.

³³Sikamma maya'na ke'nanga la'jari kanre-kanreangi mae ri jangang-janganga siagang olo'-olo' sekkeka, nampa tena tau ambongkai.

³⁴ Anne pa'rasanganga la'jari parang kalotoro' naroso'. LaKupammari sa'ra rannua siagang sa'ra passua'-suarrang pa'buntinganga ri kota-kota Yehuda siagang ri agang-agang niaka ri Yerusalem.