Read Makassar Version – KITTA' MATANGKASA PIRAUNG 3 Bible Online

PIRAUNG 3 - Makassar Version – KITTA' MATANGKASA bible

PIRAUNG 3

¹Inakkemi tau angkasiakai pa'risika lanri nitujuku ri pangngalarroiNa Allata'ala.

²Pila' bellama' nire'resang antama' ri tampa' sassang makkapuka.

³A'mole-molea' niba'ji, tuntungallo tamangngamaseang.

⁴A'bokka'-bokka' kalengku napakamma, na tepo' buku-bukungku.

⁵Sangnging sessa mami na pa'risi' kukasia'.

⁶Nipassa' ammantang lalang ri sassang rapang tau mate ri jammang allaloa.

⁷Nijarrekia' nisikko', sa'genna tenamo oloangku lassulu'.

⁸Ammarranga' appala' tulung, mingka taerokai Allata'ala ampilangngeria'.

⁹Narompai kabusuki oloangku siagang tembo'-tembo' batu natannanga.

¹⁰Rapangi kongkong romang attayang rapangi singa anruppaia'.

¹¹Naondanga' sanggengku ammengka ri oloanga, na Nakae-kae batangkalengku nampa Nabokoia'.

¹²Napabantangi anrong panaNa, nampa Nalio-lioa' siagang panaNa.

¹³Annarrusuki panaNa ri kalengku sa'genna tattinting ri atengku.

¹⁴Sila'busu' alloa' nikakkali ri sikontu taua, kunipa'jari cau-cauang.

¹⁵Poro paikaji bawang Nasareanga' untu' kanreku siagang je'ne' inungku.

¹⁶Napakesoki rupangku ri buttaya Napatunrungi gigingku ri batua sa'genna tepo'.

¹⁷Salloma' tena nakukasiaki tallasa' mate'nea; kukaluppaimi antekamma kasia'na nikanaya salewangang.

¹⁸Takuassengami nikanaya masahoro', lanynya'mi panrannuangku ri Batara.

¹⁹Punna kunawa-nawa pa'lampangku malla'bang siagang sare ballasakku rapanga' angnganre racung pai' kasia'na.

²⁰Tulusu' kunawa-nawana anjo passalaka, sa'genna kamma tunijallakkang pa'maikku.

²¹Mingka manna nakamma mamo ambangunji ammotere' panrannuangku, ri wattunna kuu'rangi anne passalaka:

²²Anjo pangngamaseanNa Batara sa'gennai satunggu-tungguna, tena la'busu'na passare baji'Na,

²³tuli beruna tunggala' bari'basa' tojeng-tojeng, anjo Batara tena le'bakai amminra pa'mai'Na!

²⁴Batara bawang, tena ruanna rapang barang-barang kupatanga. Lanri kammanami anjo, kumanrannuang mae ri Ia.

²⁵Mabajiki Batara mae ri tau manrannuanga mae ri Ia, siagang mae ri tau tuli amboyayai.

²⁶Jari, bajiki kisannang attayang sa'genna battu Batara untu' antulungki';

²⁷bajiki nakippilajara' sa'bara' ri wattunta rungka ija.

²⁸Ri wattunta Nisare kaballassang ri Batara paralluki' sannang ammempo kale-kalenta.

²⁹Parallui nipakatuna kalenta na nipassareang kalenta lanri nia'na ija panrannuang.

³⁰Manna kinipakkanai siagang nitempaka'rang, parallui nitarima ngaseng anjo kammaya.

³¹Nasaba', tena nalaNasorongbokoki' Batara untu' satunggu-tungguna.

³²Punna le'bakki' Nasare kaballassang lamangngamaseangi antu mae ri katte, lanri tuli Nakamaseanta ri pangngai tamattappu'Na.

³³Taerokai pa'mai'Na ambalang parekangki' ballasa' siagang si'na.

³⁴Punna kamma tunijallakkang pa'maitta lalang ri tahananga,

³⁵punna tappela' ha' Napassareanga Batara mae ri katte,

³⁶lanri nitunggengi kaadelanga, mattantu Naassengi siagang Naparhatikangi Batara.

³⁷Punna tena Nakaerokangi Batara apa-apaya mattantu tenana nakkulle rupataua anggaukangi apa-apaya.

³⁸Anjo bajika siagang ja'dalaka nigaukangi lanri parentaNa bawang Batara.

³⁹Angngapa namusti akkunrareng taua punna nihukkung lanri dosa-dosana?

⁴⁰Bajiki massing nisalidiki tallasatta, na kimmotere' mange ri Karaeng Allata'ala niaka ri suruga. Umba nanisungke atinta nakiappala' doang angkana,

⁴¹

⁴²“Dorakami anne ikambe siagang angngewai mae ri Katte, o Batara, na tena Kipamopporangi ikambe.

⁴³Kiondangi ikambe nampa Kibuno taccokkomi pangngamaseanTa lalang ri larroTa.

⁴⁴Anjo larroTa rapangi rammang kapalaka sa'genna takkullea nitarrusu' ri pappala' doanna ikambe.

⁴⁵Kipare'mi ikambe rapang loro ri dallekanna bonena sikontu linoa.

⁴⁶Nihinami siagang nikakkalimi ikambe ri musunna ikambe;

⁴⁷nitujui ikambe ri bala siagang kaancurang, nia'mi kambe ilalang ri bahaya siagang kamallakkang.

⁴⁸Ammatti' je'ne' matangku rapang je'ne' binanga assolong lanri ancuru'namo bansaku.

⁴⁹Tena kulammari angngarru',

⁵⁰sa'genTa iKatte Batara niaka battu ri suruga amparhatikangi ikambe.

⁵¹A'jari si'nai pa'maikku anciniki sarenna tubaine niaka ri kotana ikambe.

⁵²Rapanga' jangang-jangang, niondang ri musu natakuassenga apa salangku.

⁵³Napela' attallasaka' antama' ri bungung kalotoro' nampa natambungia' ke'nanga batu.

⁵⁴Naiki je'neka sa'genna ulungku, nakuappikkiri' angkana, ‘Narapi'mi anne a'jalakku!’

⁵⁵O Batara, akkioka' ri Katte, battu ri anjo bungung lantanga.

⁵⁶Kupala' dudui gassingka Kitongkoki tolinTa mae ri pappalakku sollanna Kitulunga'. NaKipilangngerimo pappalakku, siagang battu maKi' a'reppese'; Kikana, ‘Teako mallakki.’

⁵⁷

⁵⁸BattuKi' antulunga' ri kara-karaku o Batara, naKipasalama'mo nyawaku.

⁵⁹Kiciniki kaja'dallang nigaukanga mae ri kalengku, rancana ja'dala'na musu birisika ri kalengku. Lanri kammana anjo, o Batara, alleia' anne ri parkaraku.

⁶⁰

⁶¹IKatte, Batara, Kilangngereki antekamma bateku nihina; Kiasseng ngasengi rancanana ke'nanga.

⁶²Tuntungalloa' nabicara ke'nanga. Untu' ancilakaia', appareki ke'nanga rancana palla'.

⁶³Battu ri bari'basa' sa'genna bangngi, sangnging inakke mami nakakkali.

⁶⁴Kihukkung laloi ke'nanga situru' panggaukanna o Batara.

⁶⁵Tunraimi ke'nanga, siagang lappassammi ke'nanga tuli tappu' minasa.

⁶⁶Kiondangi siagang Kiancuru' kabusuki ke'nanga sa'genna cappu' ke'nanga nibarrasa' battu ri linoa.”