Read Makassar Version – KITTA' MATANGKASA PIRAUNG 5 Bible Online

PIRAUNG 5 - Makassar Version – KITTA' MATANGKASA bible

PIRAUNG 5

¹Kiu'rangi laloi, o Batara apa kajarianga mae ri kambe. Kiciniki laloi anne ikambe, Kiciniki antekamma tunanamo ikambe.

²Barang-barang warisi'na ikambe naallemi tau maraeng, balla'na ikambe tau maraemmi ampammantangngi.

³Manggena ikambe nibunomi ri musua; jandami amma'na ikambe ki'jarimo tau kukang.

⁴Manna je'ne' inung siagang kayu tunuang musti naballi ngasemmi ikambe.

⁵Rapang olo'-olo' nipassai ikambe anjama battala', mangngangi ikambe, mingka tanikellaiaki' ammari-mari.

⁶A'lampai ikambe appala'-pala' ri Mesir, appala'-pala' kanre ri Asyur.

⁷Dorakai boe-boena ikambe, anne kamma tenami ke'nanga; mingka musti ballasaki ikambe lanri dosa-dosana ke'nanga.

⁸Niparentai ikambe ri tau siratanga a'jari ata; natena tau makoasa allappassangi ikambe battu ri kakoasanna ke'nanga.

⁹Pantaranna kotaya, jai pabuno tau a'jappai; tuli a'reppeseki bala kamateanga ri wattu a'boyana kanre ikambe.

¹⁰Sessai ikambe napakamma cipuru' sa'genna kamma a'barami bukkulenna ikambe rapang pappalluang.

¹¹Tubai'-bainea ri Sion nigau' bawangi nigau' salai tuloloa ri desa-desa Yehuda.

¹²Pamimping-pamimpinna ikambe nijakkalaki nampa nigentung, tau-tau toana ikambe tenamo nanipakalompoi.

¹³Nipassai turungkana ikambe anjama battala' ri panggilinganga, ana' bura'nea niutungi ri kayu pisanganna sa'genna kodi nasa'ring.

¹⁴Tenamo nasse're tau toaya ri pakke'bu' lompona kotaya, tenamo nilangngere' musi' battu ri tau rungkaya.

¹⁵Tenami tallasa' mate'nea ri kambe; tappinrami joge'-jogeka a'jari kasusaang.

¹⁶Tenami kalompoanna ikambe cilakami ikambe napakamma doraka.

¹⁷Sinomi Bulu' Sion lanri nibokoi; kongkong romang mami a'lemere' anjoreng. Lanri kammana panra' lompomi atinna ikambe, tabajikami paccini'na ikambe napakamma angngarruka tojeng.

¹⁹Mingka iKatte, o Batara, tuli makoasa, iKatte ammarenta satunggu-tungguna.

²⁰Angngapa Kisallo kamma ambokoi ikambe? Maka tuli latakkaluppa maKi' mae ri kambe?

²¹O Batara, allemi ikambe ammotere'; eroki ikambe ammotere' mae ri Katte! Kipoterammi tallasa'na ikambe sangkamma riolo.

²²Yareka Kipela' tojeng-tojemmi ikambe? Maka tenamo sanggana larroTa mae ri kambe?