Read Makassar Version – KITTA' MATANGKASA YEHEZKIEL 1 Bible Online

YEHEZKIEL 1 - Makassar Version – KITTA' MATANGKASA bible

YEHEZKIEL 1

¹ Ri tanggala' lima bulang appa' taung makatallumpulo, lalang taung makalima baku' niengka'na Karaeng Yoyakhin mange ri butta pammelakkanga, inakke, Imang Yehezkiel ana'na Busi, niakka' ri birinna Binanga Kebar ri Babel siagang ngaseng tu Yahudi maraeng nipelaka. Ti'ring tassungkei langika nampa anggappama' paccini' ri sesena Allata'ala. Kulangngereki Batara a'bicara mae ri nakke, siagang kukasiaki antekamma kagassingang koasaNa.

⁴Acconga' nai', nakucini'mo angnging lompoa ammiri' battu wara'. Kuciniki kilaka a'lepa'-lepa' battu ri sigompoang rammang ia sannaka lompona; nampa langika ri tammulilina teai sipato' singara'na. Lalang ri anjo kila' a'lepa'-lepaka nia' kucini' apa-apa accila'-cilla' sangkamma tambaga.

⁵ Ri tangnga-tangngana anjo rammanga, nia' kucini' appa' malaeka' akka'nyi', iamintu apa attallasa', attanja' tau,

⁶mingka massing taappakki rupanna siagang ruampasang ka'nyi'na.

⁷Bangkenna lambusuki siagang accillaki sangkamma tambaga le'baka nikeso'. Karemeng bangkenna nia' kanukunna sangkamma kanuku sapi liara'.

⁸Pantaranganna anjo appaka rupanna siagang ruampasanga ka'nyi'na, nia' todong limanna ke'nanga, iamintu lima tau irawanganna tunggala' ka'nyi'na ke'nanga.

⁹Tassipasang massing ka'nyi'na anjo apa attallasaka takka'rangi nampa cappa'na massing siallei siagang cappa' ka'nyi'na anjo apa attallasa' maraenga, sa'genna anjo appaka apa attallasa' appareki nicini' kamma sulapa' appa'. Punna a'gioki, massing para a'gioki ke'nanga lambusu' mange ri dallekang natena nagilingi kalenna ke'nanga.

¹⁰ Tunggala' anjo apa attallasaka appa' ngaseng rupanna, mingka simmara'-maraengi anjo appaka rupanna; rupanna ri dallekanga attanja' taui, rupanna ri sa'ri kanang attanja' singai, rupanna ri kairia attanja' sapi liaraki, siagang rupanna ri bokoanga attanja' rajawali.

¹¹Sipasang ka'nyi'na anjo massing apa attallasaka naka'rangi nai' sa'genna assialle siagang cappa' ka'nyi'na anjo apa attalasa' niaka ba'leanna; nampa sipasang ka'nyi'na maraenga ta'lappaki naung antongkoki kalenna.

¹²Massing-massing anjo apa attallasaka a'dalle' mangei ri appaka sulapa' appada-pada, sa'genna akkulle ke'nanga a'lampa manna kemae situru' nakaerokia ke'nanga na tanagilinga kalenna ke'nanga.

¹³ Ri tangnga-tangngana anjo apa attallasaka nia' kucini' sangkamma bara pepe' yareka sulo a'rinra, a'gio'-gio' tenammari-marina, anjo pepeka a'lepa'-lepaki siagang apparacciki kila'-kila' a'lepa'.

¹⁴Anjo apa attallasaka a'gioki ke'nanga a'lampa kemae-kemae, sangkamma kila' gassinna a'gio'.

¹⁵ Lalang kuparhatikanna anjo sikammaya, nia' tommo kucini' appa' roda ri tompo'na buttaya, tasse'rei roda massing ri sa'rinna anjo apa attallasaka.

¹⁶Anjo appaka roda sangkamma kabusuki siagang accillaki sangkamma batu paramata, kammayatompa massing nia' pole se're roda maraenna iamintu tappalanga ri tangnga-tangngana.

¹⁷Lanri kammana anjo, anjo roda-rodaya akkullei a'lampa mange ri appaka sulapa'.

¹⁸ Bundala'na anjo rodaya rassi siagang mata.

¹⁹Anjo apa attallasaka a'lampai kemae-kemae situru' pangngainna ke'nanga, siagang tuli amminawanna anjo roda-rodaya, lanri nikoasai ri anjo apa attallasaka. Punna a'gio' nai' ri allaka yareka ammantangi anjo apa attallasaka, anjo roda-rodaya tuli amminawang tongi siagang ke'nanga.

²² Irateanna anjo apa-apa attallasaka nia' ta'bantang sangkamma pattongko' battu ri kaca accillaka.

²³Irawanganna anjo pattongkoka massing-massing anjo apa attallasaka napaka'rangi sipasang ka'nyi'na mange ri apa attallasa' niaka ri ba'leanna, nampa sipasang ka'nyi'na maraenga napatongkoki ri kalenna.

²⁴ Punna anri'baki ke'nanga, kulangngereki sa'ra akkape-kapena ka'nyi'na; sa'ranna sangkammai sa'ra je'ne' tu'guruka battu ri tubiri', sangkamma sa'ra bangkenna tantara jaia, sangkamma sa'ranNa Allata'ala Kaminang Koasaya. Punna ammari ke'nanga anri'ba', massing nalappa'mi ke'nanga ka'nyi'na,

²⁵mingka kalangngerangiji sa'ranna ke'nanga battu rate ri pattongko' niaka ri tompo' ulunna ke'nanga.

²⁶ Irate ri anjo pattongkoka nia' kucini' kamma empoang karaeng nipareka battu ri batu nilang, nampa irate ri anjo empoanga nia'mo kucini' ammempo sangkamma tau.

²⁷ Bageang rateanna accayai sangkamma tambaga niaka ri tangngana pepe' a'rinraya. Bageang irawana accayai sanna' singara'na,

²⁸a'rupa-rupa cura'na sangkamma tarawe. Iaminjo singara' accaya, ampa'nyatayai kahaderanNa Batara. Kucini'na anjo sikammaya, tu'guru'ma' attinompang, a'dalle' naung ri buttaya. Nampa nia'mo sa'ra kulangngere' angkana,