Read Makassar Version – KITTA' MATANGKASA YEHEZKIEL 11 Bible Online

YEHEZKIEL 11 - Makassar Version – KITTA' MATANGKASA bible

YEHEZKIEL 11

¹Nampa niangkaka' ri RohNa Allata'ala siagang nieranga' mange ri pakke'bu' lompo bageang rayana Balla'Na Batara. Anjoreng kucini' nia' 25 tau, kammayami nia' rua pamimping bansa, iamintu Yaazanya ana'na Azur siagang Pelaca ana'na Benaya.

²Nakana Allata'ala ri nakke, “He tau, iaminne sikamma tau anrancanakanga kaja'dallang ri anne kotaya siagang assarea pangajarang sala.

³Lanri kammana anjo pabattui pasangKu ri passala'na hukkunganga mae ri ke'nanga, he tau. Nasaba' nakana ke'nanga, ‘Tasalloami nanibangungi ammotere' anne sikamma ballaka. Anne kotaya iamintu uring naikatte anne dageng a'jari bonena. Laamangki' lalang battu ri pepe' a'jalloka lanri nila'langngiki' ri anne uringa.’ ”

⁵Nampa nikoasaia' ri RohNa Batara, nampa nisuroa' ri Batara akkana ri umma' Israel angkana, “He bansa Israel, Kuassengi apa nupaua siagang nurancanakanga.

⁶Teai sipato' jaina tau le'ba' nubuno, sa'genna rassi agang-aganga ri kotaya napakamma maya'.

⁷Lanri kammana anjo, iNakke, Batara Kaminang Tinggia, Kukana ri kau: Memang, anne kotaya sanrapangi uring, mingka dageng niaka lalang teai ikau, passangalinna maya'na sikamma tau le'baka nubuno! Nampa ikau laKubongkako assulu' battu ri anne kotaya!

⁸Mallakko ri pa'dang? LappabattuA' tau angngerang pa'dang untu' ambundukiko.

⁹LaKuerangko assulu' battu ri kotaya nampa Kupassareangko mae ri bansa maraeng. Le'ba'mi Kutappuki angkana laKuhukkung mateko.

¹⁰Lamateko lalang pa'bundukang ri pa'rasangang kalennu, na nuassemmo angkanaya iNakke Batara.

¹¹Jari, tena nulaamang lalang ri anne kotaya; tena nulasangkamma dageng niaka lalang ri uringa. LaKuondangko siagang laKuhukkungko manna pole kemaeko ammantang ri pa'rasangang Israel.

¹²Na nuassemmo angkanaya iNakke Batara siagang Kuhukkungko lanri le'ba'na nudakkai paratorang-paratorangKu siagang nubalang parekangi parenta-parentaKu lanri nuturukinna hukkung-hukkung bansa maraenga ri tammulilinu.”

¹³Lalang kupabattuna anjo kana-kana kammaya, ti'ring tu'guru'mi naung Pelaca nampa mate. Jari su'ju'ma' siagang akkio' angkana, “Aduh Batara Kaminang Tinggia! Apaka laKibuno ngasengi anne bansa Israel niaka tassesa?”

¹⁴Nakana pole Batara ri nakke,

¹⁵“He tau, ikau siagang agang-agannu niaka ri pammelakkanga nibicarako ri pandudu'na Yerusalem. Nakana ke'nanga, ‘Anjo tunipelaka bella dudui battu ri Yerusalem untu' anynyomba ri Batara. Butta Israel le'ba'mi Napassareang Batara mae ri katte.’

¹⁶Lanri kammana anjo, pabattui anne pasangKu mae ri agang-agannu nipelaka, angkana iNakke angngerangi ke'nanga a'lampa bella ri alla'na bansa-bansaya siagang ampasiaraki ke'nanga ri anjo sikamma pa'rasanganga. Mingka lalang nia'na ke'nanga anjoreng, iNakke lanrurungangi ke'nanga.

¹⁷INakke, Batara Kaminang Tinggia, ampaui angkana laKupa'rappungi ke'nanga battu ri sikamma pa'rasangang napammantangia ke'nanga tassiara', nampa Kupoterang butta Israel mae ri ke'nanga.

¹⁸Punna ammotereki ke'nanga, lanapela' ngasengi ke'nanga barhala kodia siagang appakaringi'-ringika ia nabuntuluka ke'nanga.

¹⁹ LaKuberui atinna siagang panggaukanna ke'nanga. Atinna ke'nanga terasaka sanrapang batu laKuallei nampa Kusambei siagang ati mannurukia mae ri Nakke.

²⁰Jari lamannurukimi ke'nanga ri paratorang-paratorangKu siagang majarreki ke'nanga anggaukangi sikontu parentaKu. Ke'nanga la'jari ummakKu siagang iNakke la'jari Allata'alana ke'nanga.

²¹Mingka sikamma tau nangaia anynyomba ri barhala-barhala kodia siagang appakaringi'-ringika laKuhukkungi lanri anjo panggaukang ja'dala'na ke'nanga.” Kammami anjo kananNa Batara Kaminang Tinggia.

²² Appakkaramulai anri'ba' anjo sikamma malaeka'-malaeka' akka'nyika siagang anjo roda-rodaya amminawang tongi. Caya accilla' iamintu pammatei kahaderanNa Allata'alana Israel niaki irateanna ke'nanga.

²³Nampa anjo caya accillaka nabokoi Yerusalem siagang a'letteki mange ri moncong rayanganna anjo kotaya.

²⁴Kuciniki kalengku niangka' ri RohNa Allata'ala nampa nipoteranga' mange ri sikamma tau nipelaka ri Babel. Nampa allanynya'mo anjo paccinikku.

²⁵Nampa kucarita mae ri sikamma tau nipelaka sikontu anjo apa Napappicinikanga Batara mae ri nakke.