Read Makassar Version – KITTA' MATANGKASA YEHEZKIEL 12 Bible Online

YEHEZKIEL 12 - Makassar Version – KITTA' MATANGKASA bible

YEHEZKIEL 12

¹A'bicarai pole Batara mae ri nakke, angkana,

² “He tau, ikau niakko ammantang ri tangnga-tangngana tau nangaia angngewa. Nia' matanna ke'nanga, mingka tena naccini'; nia' tolinna mingka tena nallangngere', lanri nangaina ke'nanga angngewa.

³Lanri kammana anjo, he tau, genteng singara'na ija alloa, parutusu'mi barang-barannu nupantama' ri se'reang pa'roko' sangkamma biasaya nagaukang tau nipelaka. Lalang tenanapa nabattu bangngia, bokoimi a'nassa-nassa balla'nu sangkamma tau nieranga mange ri butta pammelakkang. Apparekko so'bolo' ri rinring balla'nu ri dallekanna sikamma anjo tau nangaia angngewa, siagang erangi anjo pa'roko' barang-barannu assulu' battu ri anjo so'boloka. Pisangi anjo pa'roko'nu ri salanggannu. A'lampa mako ri wattu sassanna bangngia; tongkoki matannu sa'genna tena nuciniki agang nuoloa. Lappassammi nacini' sikontu bansa Israel sikontu anjo nugaukanga, sollanna a'jari pappakainga' mae ri ke'nanga. Gassingka langngu'rangi ke'nanga angkanaya anjo kalenna ke'nanga tau nangai angngewaya.”

⁷Nampa kugaukammo anjo parentaNa Batara mae ri nakke. Anjo memang alloa, ri wattu allona, kuparutusu'mi barang-barangku antama ri se'reang pa'roko', sangkamma biasaya nagaukang tau annompanga. Ri wattunna appakkaramulamo bangngi, appare'ma' so'bolo' siagang limangku ri tembo' ballakku, nampa assulukka' battu ri anjo so'boloka. Niparhatikamma' ri sikontu taua nakupisang pa'rokokku ri salanggangku, nampa a'lampama'.

⁸Ammukona a'bicarami Batara ri nakke, nakana,

⁹“He tau, anjo bansa Israel, bansa nangaia angngewa, napakkuta'nangngammi ri kau apa nugaukanga antu.

¹⁰Lanri kammana anjo, pabattui mae ri ke'nanga apa Kupaua, iNakke Batara Kaminang Tinggia. Anjo pasangKu Kupitujuangi karaenga ri Yerusalem, siagang sikontu pandudu'na anjo kotaya.

¹¹Pakasingaraki mae ri ke'nanga angkanaya anjo apa nugaukanga a'jari pangngebarangi mae ri apa lakajarianga mae ri ke'nanga, iamintu: la'jari ke'nanga tau nipela' siagang tau nitahang.

¹²Lalang ri sassanna bangngia karaenna ke'nanga lanapisangi pa'roko'na irate ri salangganna nampa a'lampa. Lappareki taua so'bolo' ri temboka sollanna akkulle assulu'. Lanatongkoki matanna sa'genna tanacinika agang naoloa.

¹³ Mingka laKubuangi jalaKu untu' anjakkalaki. LaKuerangi mange ri Babel, siagang anjorengi lamate natale'baka nacini' anjo kotaya.

¹⁴Sikontu tau ammantanga ri balla' karaenga, kammayatompa sikamma tumailalanna siagang pangawala'na anjo karaenga laKupasisa'la'-sa'laki ri kere-keremae. LaKuondangi siagang laKubunoi ke'nanga.

¹⁵Ri wattunna Kupasisa'la'-sa'la' ke'nanga mange ri tangnga-tangngana bansa-bansaya ri pa'rasangang-pa'rasangang maraenga, lanaassemmi ke'nanga angkana iNakke Batara.

¹⁶Tena siapa jaina battu ri ke'nanga laKupasalama' battu ri pa'bundukanga, battu ri kacipuranga, siagang battu ri garringa, sollanna ri tangnga-tangngana anjo bansa maraenga, langngu'rangimi ke'nanga angkanaya le'baki ke'nanga a'gau' kodi sikali. Jari lamangakumi ke'nanga angkanaya iNakke Batara.”

¹⁷Nakana Batara ri nakke,

¹⁸“He tau, annekkerekko ri wattunnu angnganre, siagang annekkerekko napakamma malla' ri wattunnu angnginung.

¹⁹Pabattui mae ri sikontu bansaya apa Kupaua, iNakke Batara Kaminang Tinggia, mae ri pandudu' Yerusalem niaka ija ammantang ri tampa'na ke'nanga. Lannekkereki ke'nanga ri wattunna angnganre siagang annekkereki napakamma malla' ri wattunna angnginung. Buttana ke'nanga la'jari kalotoroki, lanri sikontu tau ammantanga anjoreng tulusu' nadakkaina hukkunga.

²⁰Kota-kota kamma-kammaya anne rassi siagang pandudu', laniancuruki; siagang sikamma koko niaka la'jari parang kalotoroki. Jari naassemmi ke'nanga angkana iNakke Batara.”

²¹Nakana Batara ri nakke,

²²“He tau, angngapai tu Israel nangai kammai napau paruntu' kana kammaya anne: ‘Kasambeangi jammanga, mingka botoa tenanga'rupayai'’?

²³Jari pabattui mae ri ke'nanga angkanaya iNakke Batara Kaminang Tinggia appiali kamma anne: Anjo paruntu' kanaya laKupattaenami, sa'genna tenamo nanipaui ri Israel. Salaku sambenna pabattuangi ke'nanga angkana narapi'mi wattunna, siagang sikontu botoa la'rupa ngasemmi.

²⁴Ri Israel tenamo pacini' yareka paboto balle-balle;

²⁵INakke Batara Kaminang Tinggia la'bicara mae ri bansa Israel, na sikontu apa Kupaua ma'nassa lakajariangi, tena nanipaunduruki pole. Pilangngeri, he tau nangaia angngewa! Lalang ri tallasa'nu laKupa'rupai sikontu apa Kupappakaingakkanga mae ri kau. INakke, Batara Kaminang Tinggia, anne akkana.”

²⁶Nakana Batara ri nakke,

²⁷“He tau, napaui tu Israel angkanaya anjo paccini'nu siagang nubotoa sallo duduiji sallang nampa la'rupa.

²⁸Lanri kammana anjo, pabattuangi ke'nanga, angkana iNakke, Batara Kaminang Tinggia, angkana; Sikontu apa Kupaua ma'nassa lakajariangi, tena nalanipaunduru'. INakke, Batara Kaminang Tinggia, anne akkana!”