Read Makassar Version – KITTA' MATANGKASA YEHEZKIEL 19 Bible Online

YEHEZKIEL 19 - Makassar Version – KITTA' MATANGKASA bible

YEHEZKIEL 19

¹Nasuroa' Allata'ala angkelongangi anne kelong-kelong karruka mae ri ruaya karaeng Israel:

²Amma'nu rapangi singa gana ia hebaka siagang porea. Napakalompoi ana'-ana'na ri tangnga-tangngana singa-singa porea.

³Kalase'renna ana'na nadidiki siagang naajaraki a'boya apa lanakanre. Na'jarimo singa lompo angngokkoka siagang angnganrea tau.

⁴Bansa-bansa allangngerekai kabara'na a'rappungi untu' anjakkalaki. Nitannangngi sikko' lalang kali'bong nampa nialle, nampa nire'resang mange ri Mesir siagang tado'.

⁵Sia-siai anronna antayangi ana'na; nampa naasseng angkana tenami panrannuanna. Jari ana'-ana'na maraenga nalatimi a'jari singa sekke' siagang pore.

⁶Anjo ana' singaya a'jari lompoi nasilokoang siagang singa-singa maraenga. Appilajara' a'boya apa lanakanre, na'jari tommo pakanre tau.

⁷Nalappoi tembo'-tembo' pattahangnganga, napanraki kota-kotaya. Annekkere'mi pandudu'na sikontu pa'rasanganga nalangngere'na sa'ranna a'gamarrunga.

⁸Mingka bansa-bansa niaka ri daera tammulilina battu ambakkai ri kere-keremae. Ammuangi ke'nanga jala untu' anjakkalaki, na niallemo ri sikko'na ke'nanga.

⁹Nipantamaki ri kurungang singa nampa nierang mange ri Babel andallekang ri karaeng. Nijarreki jagana sollanna tenamo nakalangngerang sa'ranna irate ri bulu'-bulu' tinggina Israel.

¹⁰Amma'nu rapangi poko' anggoro' ga'ga attimboa ri koko a'biring pangka binangaya. Coppongi leko'na na'rappo lanri alla'bina je'neka anjoreng.

¹¹Kassa' tangkenna, tagampangai nitepo' siratangi nipare' takkang karaeng. Coppo'na tinggi nai' narapiki rammanga. Nikangngalikangi ri sikontu taua lanri tinggina siagang copponna leko'na.

¹²Mingka nibi'buki ri lima-lima larroa, nampa nipela' naung ri butta. Ammiriki anging battu iraya angkalotori rappo baji'na. Tepoki tangkenna, a'jari kalotoro' nampa nitunu.

¹³Kamma-kamma anne nilamungi ri parang kassi', ri butta roso' tenaya je'ne'na.

¹⁴Batanna anjo anggoroka nilepaki ri pepe' a'le'lere'; tangkenna siagang rapponna la'busu' nikanre ri pepe'. Tangkenna tenamo nattahang kamma-kamma anne; takkulleami nipare' takkang karaeng. Iaminjo karru' a'mole-molea nikelongang ri ummaka.